1-ئاينىڭ 22-كۈنى،جۇڭگولۇق سودىگەرلەر گېزىتىنىڭ A10 بىتىدە، 24 ياشلىق شاڭنەنلىك قىز چېڭ يۆنىڭ ئۆيىدىن چىقىپ كەتكەن كېسەلچان ئاپىسىنى ئىزدەشنى قەتئىي توختاتمىغانلىقى، ئۇ شەنياڭدا ئاپىسىغا ناھايىتى ئوخشايدىغان ئىككى سەرگەردان ئايالنى بايقاپ، DNA تەكشۈرتۈپ ئاپىسى تونۇماقچى بولغانلىقى ھەققىدە خەۋەر بېرىلىپ، جەمئىيەتنىڭ دىققەت ئېتىبارىنى قوزغىغانىدى. 1-ئاينىڭ 26-كۈنى تەكشۈرۈش نەتىجىسى چىققان بولۇپ، بۇ ئىككى سەرگەردان ئايالنىڭ چىڭ يۆ بىلەن ھېچقانداق قانداشلىق مۇناسىۋىتى يوقكەن. چېڭ يۆ ئاپىسىنى داۋاملىق ئىزدەيدىغانلىقىنى، ھەرگىزمۇ ئاسانلىقچە بەل قويىۋەتمەيدىغانلىقىنى بىلدۈردى.

      ئىككى سەرگەردان ئايالنى قانداق ئورۇنلاشتۇرۇش مەسىلىسى ھەققىدە، 1-ئاينىڭ 26-كۈنى جۇڭگولۇق سودىگەرلەر گېزىتى مۇخبىرى شەنياڭ ناھىيىسى شىجاۋچۈەن يېزىلىق ھۆكۈمەت بىلەن ئالاقىلەشكەن بولۇپ، خىزمەت خادىملار مۇنۇلارنى بىلدۈردى: «بۇنىڭدىن بۇرۇن بۇ ئىككەيلەننى ياشانغانلار ساناتورىيەسىگە ئاپىرىپ قويغانىدۇق، ئەمما ئۇ ئىككەيلەن باشقا ياشانغانلار بىلەن چىقىشالمىغاچقا، ئۇلارنى قۇتقۇزۇپ پونكىتىغا ئاپىرىپ تېخىمۇ ياخشى ئورۇنلاشتۇرۇپ قويۇش ئۈچۈن، ئىككى كۈندىن بۇيان ناھىيىلىك خەلق ئىشلىرى تارماقلىرى بىلەن ئالاقىلىشىۋاتىمىز».

      چېڭ يۆ مۇنداق دېدى: «يېقىندىن بۇيان سەرگەردانلارغا كۆڭۈل بۆلىدىغان پىدائىيلار تەشكىلاتى قۇرۇپ، ئۇلارنىڭ ئۆز ئۆيىنى تېپىۋىلىشىغا ياردەم بېرىشنى ئويلىشىپ قالدىم». ئۇنىڭ بۇ ئويىغا قارىتا ئەتراپىدىكى ئۇرۇق-تۇققان، دوست-بۇرادەرلىرى ئۆز كۆز-قاراشلىرىنى ئوتتۇرىغا قويدى.

تاغىسى چېڭ سەيگۈي مۇنداق دېدى: «چېڭ يۆنىڭ ئاپىسىنى ئىزدىشىنى مەنمۇ قوللايمەن، ئەمما يەنىلا ئۇنىڭ بۇ ئىش بىلەنلا بولۇپ كەتمەسلىكى ھەققىدە نەسىھەت قىلىمەن، قانداقلا بولمىسۇن ئۇ تېخى ياش، ئۆز تۇرمۇشى بار».

چېڭ يۆنىڭ تولۇقسىز ئوتتۇرىدىكى ساۋاقدىشى چېڭ سىنلىڭ مۇنداق دېدى: «چېڭ يۆنىڭ ئاپىسى چوقۇم ئۇنىڭ ئۆزىنى ئىزدەپ ئۇيان-بۇيان چېپىپ يۈرۈشىنى ئەمەس، ياخشى تۇرمۇش كەچۈرۈشىنى ئۈمىد قىلىدۇ. ئۇنىڭ ئاپىسىنى تېزراق تېپىۋىلىشىنى ئۈمىد قىلىمەن. ئەمما بۇ ئىش بىلەنلا بولۇپ كېتىپ، ئىستىقبالىغا، كەسپىگە ۋە تۇرمۇشىغا تەسىر يەتكۈزۈپ قويمىسىكەن دەيمەن».

ئەتراپىدىكى ئۇرۇق-تۇققان، دوست-بۇرادەرلىرىنىڭ تەكلىپلىرىگە قارىتا چېڭ يۆ ئاپىسىنى ئىزدەشتە چىڭ تۇرىدىغانلىقىنى، ئاسانلىقچە بەل قويىۋەتمەيدىغانلىقىنى بىلدۈرۈپ مۇنداق دېدى: «خىزمەتنى قاچانلا قىلىۋالسام بولىۋېرىدۇ، ئەمما ئاپامنى ئىزدەش دېگەن چوڭ ئىش. ئەگەر ھايات بولسا، ئۇنداقتا ئۇ نەدە؟ ھايات بولمىسا، زادى قايەردە ئالەمدىن ئۆتتى؟ مەن بۇلارنى ئېنىق بىلىشىم كېرەك».

      چېڭ يۆنىڭ ئاپىسىنى ئىزدەشتە چىڭ تۇرغانلىقىدەك خەۋەر جۇڭگولۇق سودىگەرلەر گېزىتىدە بېرىلىشى بىلەن، جەمئىيەتنىڭ دىققىتىنى قوزغىدى. تورداشلار مۇنداق دەپ سۆز قالدۇرۇشتى:

«ياخشى قىزىم، سىزدىن ناھايىتى تەسىرلەندىم. گۈزەل تىلەكلەر سىزگە يار بولسۇن، يوللىرىڭىز ئوچۇق بولسۇن. ئاپىڭىز بىلەن تېزرەك جەم بولىشىڭىزنى تىلەيمەن».

«جەمئىيەتتە بۇنداق ياخشى قىزلار كۆپرەك بولسا، بىچارە سەرگەردانلارمۇ ئازايغان بولاتتى».

      يەنە بەزى تورداشلار ئۇنىڭغا مۇنداق نەسىھەتلەرنى قالدۇرۇشتى:

    «چېڭ يۆ، قىسمەتلىرىڭىزگە ناھايىتى ئېچىندىم، ئەمما سىزدىن چوڭ بولۇش سۈپىتىم بىلەن ۋاقىتنى مۇۋاپىق ئورۇنلاشتۇرىشىڭىزنى، بارلىق ۋاقتىڭىز ۋە زېھنىڭىزنى ئاپىڭىزنى ئىزدەشكىلا ئىشلەتمەسلىكىڭىزنى ئۈمىد قىلىمەن».

     بۇ ئىشقا قارىتا، جۇڭگولۇق سودىگەرلەر گېزىتىنىڭ مۇخبىرى چېڭ يۆ بىلەن ئۇچراشقان پىسخولوگىيە مۇتەخەسسىسىدىن ئەھۋال ئىگەللىدى، ئۇ مۇنۇلارنى بىلدۈردى: «چېڭ يۆ ئاپىسىنى ئىزدەشكە بەكلا بېرىلىپ كەتكەچكە، ئۇنى بۇ ئىشتىن توسۇپ نەسىھەت قىلغۇچىلارغا قارىتا زىتلىشىش كەيپىياتى شەكىللىنىدۇ، مەنمۇ ئىلگىرى ئۇنىڭغا پىسخولوگىيىلىك يېتەكلەش ئېلىپ بارماقچى بولغانىدىم، ئەمما نەتىجىسى ئانچە ياخشى بولمىدى. چېڭ يۆ قۇرامىغا يەتكەچ، ئۆزىنىڭ ھۆكۈم قىلىش ئىقتىدارى بار. ئۇنىڭ ھازىرقى ھالىتىنى ئۆزگەرتىش ئۈچۈن ئالدىرىماي يېتەكچىلىك قىلىشقا توغرا كېلىدۇ، قىيىنچىلىقنى ھېس قىلدۇرغاندىن كېيىن، تاللاش ھوقۇقىنى ئۇنىڭ ئۆزىگە بېرىشىمىز كېرەك».