2016-يىلى يېڭى يىلنىڭ قوڭغۇرىقى چېلىنغان پەيتتە، ھەر قايسى  دۆلەتلەرنىڭ سىياسىيونلىرى يېڭى يىللىق تەبرىك سۆزى قىلىپ، بىر يىلدىن بۇيان  دۆلەتنىڭ تەرەققىياتىدا قولغا كەلتۈرۈلگەن مۇۋەپپەقىيەتلەرنى ئەسلەپ ئۆتتى، تېخىمۇ  گۈزەل كەلگۈسىگە نەزەر سالدى، تېخىمۇ بىخەتەر، تېخىمۇ ئاسايىشلىق جەمئىيەت قۇرۇشنى  ئۈمىد قىلىدىغانلىقىنى بىلدۈرۈشتى. ئەنگلىيەنىڭ باش ۋەزىرى كامىرون تەبرىك سۆزىدە  مۇنداق دېدى: مەن ئەنگلىيە بىلەن ياۋروپانىڭ مۇناسىۋىتىنى ھەل قىلىش ئۈچۈن  تىرىشماقتىمەن، ئاخىرىدا ئەنگلىيە ئاممىسى «بىزنىڭ ياۋروپا ئەللىرى ئىتتىپاقىدا  داۋاملىق قېلىشىمىز، ياۋروپادىكى قوشنىلىرىمىز بىلەن بىرلىكتە تېخىمۇ قۇدرەت  تېپىشىمىز، تېخىمۇ باياشات تۇرمۇش كەچۈرىشىمىز، ياكى ئۆز يولىمىزغا مېڭىشىمىز» نى  قارار قىلىدۇ. چاۋشەننىڭ ئالىي رەھبىرى كىم جۇڭئۇن مۇنداق دېدى: 2016-يىلى  زېھنىمىزنى يىغىپ ئىقتىسادىي جەھەتتە كۈچلۈك دۆلەت قۇرۇپ چىقىمىز، ئىقتىسادنى  راۋاجلاندۇرۇش ۋە خەلقنىڭ تۇرمۇش سەۋىيەسىنى ئۆستۈرۈش جەھەتتە يېڭى پۇرسەتنى  كۈتىۋالىمىز. جەنۇبىي ئافرىقا زۇڭتۇڭى زۇما مۇنداق دېدى: جەنۇبىي ئافرىقا  ھۆكۈمىتىنىڭ 2016-يىلىدىكى ئاساسلىق ۋەزىپىسى تەڭپۇڭسىزلىق، نامراتلىق، ئىشسىزلىق  ئەھۋالىنى داۋاملىق ياخشىلاش، ئاز ساندىكى كىشىلەرنىلا ئىقتىسادىي تەرەققىياتنىڭ  پايدىسىغا ئېرىشتۈرۈپ قالماي، بەلكى كۆپ سانلىق كىشىلەرنىڭ ئىقتىسادىي تەرەققىيات  پۇرسىتىگە ئېرىشىشىگە كاپالەتلىك قىلىش. بىرلەشكەن دۆلەتلەر تەشكىلاتى مۇھىت پىلان  مەھكىمىسىنىڭ ئىجرائىيە مۇدىرى ستېنىر مۇنداق دېدى: مەھكىمىمىز يېڭى يىلدا يېڭىلىق  يارىتىش ۋە مەسىلىلەرنى ئىلمىي ھەل قىلىش جاسارىتى بىلەن، جەمئىيەتكە تېخىمۇ ياخشى  تۆھپە قوشىدۇ.