باش ئورگىنى جەنۋەگە جايلاشقان دۇنيا سەھىيە تەشكىلاتى 28-ئاۋغۇست ئېبولا يۇقۇمىغا تاقابىل تۇرۇش پىلانىنى ئېلان قىلىپ، ئالتە ئايدىن توققۇز ئايغىچە ئېبولا ۋىرۇسىنىڭ تەسىرىگە ئۇچرىغان دۆلەتلەردە تارقىلىشى ۋە خەلقئاراغا كېڭىيىشىدىن ساقلىنىشنى ئېنىق ئوتتۇرىغا قويدى.

بۇ پىلاننى ئىجرا قىلىشقا كەلگۈسى ئالتە ئايدا 489 مىليون ئامېرىكا دوللىرى كېتىشى مۇمكىن، پىلاندا يۇقۇمنىڭ ئېغىر تەسىرىگە ئۇچرىغان دۆلەتلەردە، ئۈچ ئاي ئىچىدە يېڭىدىن كېسەل كۆپىيىش ۋە يېڭىدىن كېڭىيىش يۈزلىنىشىنى ئۆزگەرتىش؛ ئالتە ئايدىن توققۇز ئايغىچە يۇقۇمنىڭ پايتەخت، ئاساسلىق پورت ۋە باشقا رايونلارغا تارقىلىشىنى توسۇش ئوتتۇرىغا قويۇلدى. بۇنىڭدىكى ئاساسلىق تەدبىرلەر-كېسەلگە دىياگنوز قويۇش، باشقۇرۇش، كۆزىتىش، دەپنە قىلىشنى قېلىپلاشتۇرۇش ۋە مەھەللىلەر قاتنىشىش قاتارلىق يۈرۈشلۈك ئارىلىشىش ۋاسىتىلىرىنى ئۆز ئىچىگە ئالىدۇ.

پىلاندا يېڭىدىن يۇقۇم پەيدا بولغان دۆلەتلەردە جىددىي لايىھەنى يولغا قويۇپ، دەسلەپ بايقالغان كېسەللەرنىڭ يۇقۇم تارقىتىشىنى سەككىز ھەپتە ئىچىدە توسۇشقا ھەقىقىي كاپالەتلىك قىلىش ئوتتۇرىغا قويۇلدى. پىلاندا ئېبولا يۇقۇمىنىڭ تەسىرىگە ئۇچرىغان دۆلەتلەرنىڭ قوشنىلىرى ھەم خەلقئارا قاتناش مەركەزلىرىدە، بىر ئاي ئىچىدە مۇكەممەل بولغان يۇقۇمنى تەكشۈرۈش تەييارلىقى ۋە جىددىي لايىھەنى ئوتتۇرىغا قويۇش بېكىتىلدى.

كونكرېت ئىجرا جەھەتتە، پىلاندا سىجىللىقىغا ھەقىقىي كاپالەتلىك قىلىدىغان ئادەم كۈچى بايلىقىنى تەڭشەپ، تەجرىبىخانىدا تېزدىن تەكشۈرۈپ، شەخسىي مۇداپىئە بۇيۇملىرى، دېزىنفېكسىيە سۇيۇقلۇقى، جەسەت خالتىسى تەمىناتى قاتارلىق جەھەتلەردىكى خەلقئارا ھەمكارلىقنى كۈچەيتىش ئوتتۇرىغا قويۇلدى.

دۇنيا سەھىيە تەشكىلاتى 28-ئاۋغۇست ئېلان قىلغان يۇقۇمنىڭ ئەڭ يېڭى ئەھۋالى ھەققىدىكى ئۇقتۇرۇشقا قارىغاندا، 26-ئاۋغۇستقىچە، گىۋىنىيە، لىبېرىيە، سېررالېئون، نىگېرىيەدە دىياگنوز قويۇلغان، گۇمان قىلىنغان ۋە يۇقۇملىنىشى مۇمكىن بولغان ئېبولا كېسىلى 3069 بولغان، 1552 ئادەم قازا قىلغان.

خەۋەردە مۇنداق دېيىلىدۇ: ئېبولا يۇقۇمى تېزدىن يامرىماقتا، %40 تىن ئارتۇق كېسەل ئۆتكەن 21 كۈندە پەيدا بولدى، نۆۋەتتە بۇ يۇقۇم بىلەن ئۆلۈش نىسبىتى %52 كە يەتتى، كونكرېت ئەھۋال جەھەتتە، سېررالېئوندىكى ئۆلۈش نىسبىتى %42، گىۋىنىيەدىكى ئۆلۈش نىسبىتىگە %66 بولدى.

ئېبولا ۋىرۇسى-ھازىرغىچە بايقالغان جانغا زامىن بولۇش نىسبىتى ئەڭ يۇقىرى ۋىرۇسلارنىڭ بىرى بولۇپ، تېخىچە ئۈنۈملۈك داۋالاش ئۇسۇلى تېپىلمىدى. بۇ ۋىرۇس ئېبولا قاناش قىزىتمىسى پەيدا قىلىدۇ، يوشۇرۇن مەزگىلى 20 كۈنگە يېتىدۇ. نۆۋەتتە بۇ ۋىرۇس بىلەن يۇقۇملىنىشنىڭ ئاساسلىق يوللىرى يۇقۇملانغۇچىنىڭ قېنى، ئاجراتمىلىرى ۋە باشقا بەدەن سۇيۇقلۇقى بىلەن بىۋاسىتە ئۇچرىشىش ياكى بۇ يۇقۇم بىلەن قازا قىلغۇچىنىڭ جەسىتى بىلەن ئۇچرىشىش بولماقتا.