ئەنگلىيە رادىيو شىركىتى خەنزۇچە تورىنىڭ 14-يانۋاردىكى خەۋىرىگە ئاساسلانغاندا، ئامېرىكىنىڭ سابىق دۆلەت مۇداپىئە مىنىستىرى خاگېل 12-يانۋار كۈنى ۋاشىنگتوندا «سۈرىيە مەسىلىسىنى ھەل قىلغان ۋاقىتتا ئامېرىكا ئۆزىنىڭ <ئەسەدنى تەخىتتىن چۈشۈرۈش> سىياسىتى بىلەن پۇت-قولىنى چۈشەپ قويماسلىقى كېرەك ئىدى» دېگەن.

   خەۋەردە «ئامېرىكا ئىزچىل تۈردە سۈرىيە زۇڭتۇڭى بەشار ئەسەدنى ئۆكتىچىلەرگە رەھىمسىزلىك قىلدى دەپ ئەيىبلەپ، ئۇنى تەخىتتىن چۈشۈرۈشتە چىڭ تۇردى» دېيىلدى. ئەمما خاگېل ئەقىل ئامبىرى ئاتلانتىك ئوكيان كېڭىشىدە ئۆزىنىڭ دۆلەت مۇداپىئە مىنىستىرلىق ۋەزىپىسىنى ئۆتىگەن ۋاقتىنى ئەسلەپ مۇنداق دېدى:«ئەسەد ئەزەلدىن بىزنىڭ دۈشمىنىمىز ئەمەس. ئۇ دەرۋەقە رەھىمسىز <ھۆكۈمران>. دۇنيادا رەھىمسىز <ھۆكۈمران> لار ناھايىتى كۆپ، مەن رەھىمسىز <ھۆكۈمران>لارنى يوقىتىۋېتىش ئۈچۈن كەلمىگەن.»

   خاگېل 2013-يىلى 2-ئايدىن 2015-يىلى 2-ئايغىچە ئامېرىكا دۆلەت مۇداپىئە مىنىستىرلىق ۋەزىپىسىنى ئۆتىگەن، بۇنىڭدىن ئىلگىرى ئاتلانتىك ئوكيان كېڭىشىنىڭ رەئىسى بولغان. ئۇ مۇنداق دېدى:«ئامېرىكا ئىراقنىڭ رەھبىرى سادام ۋە لىۋىيەنىڭ سابىق زەھبىرى قەززافىينىڭ ئىشىدىن ئىبرەت ئېلىشى كېرەك. سادام بىلەن قەززافىي رەھىمسىز ھۆكۈمران دەپ قارالغان، ئۇلار غەرب دۆلەتلىرىنىڭ ھەربىي كۈچ ئىشلىتىشى بىلەن تەخىتتىن چۈشۈپ، ئۆلتۈرۈلدى، ئەمما ئىراق بىلەن لىۋىيە ئۇرۇش مالىمانچىلىقى ئىچىدە قالدى، تېررورچىلارمۇ پۇرسەتتىن پايدىلىنىپ بۇ ئىككى دۆلەتتە تەسىر دائىرىسىنى كېڭەيتتى.»

ئۇ يەنە مۇنداق دېدى:«سىز بىر رەھىمسىز <ھۆكۈمران>نى قوغلىۋەتسىڭىز بولىدۇ، ئەمما سىز ھازىر قانداق جاۋابقا ئېرىشكەنلىكىڭىزنى چۈشىنىشىڭىز كېرەك. بىز ئەزەلدىن مۇنداق بىر سوئالنى سوراپ باقمىدۇق: سادامدىن كېيىن كىم كېلىدۇ؟»

   خاگېل «ئوتتۇرا شەرقتە، بولۇپمۇ سۈرىيەدە يېتەرلىك دەرىجىدىكى مۇقىم ھالەت شەكىللەنمەي تۇرۇپ، ھەل قىلىش لايىھەسىنى تۈزگىلى ھەم يۈرگۈزگىلى بولمايدۇ. بۇ رۇسىيە بىلەن زىچ ھەمكارلىشىش كېرەكلىكىدىن دېرەك بېرىدۇ، مەن بۇ ھەم ئىرانلىقلار بىلەن ھەمكارلىشىش كېرەكلىكىدىن دېرەك بېرىدۇ دەپ قارايمەن. مەن رۇسىيە، ئىران ئامېرىكا ۋە ياۋروپا دۆلەتلىرى قاتناشمىسا، ئوتتۇرا شەرقتە مۇقىملىق بولمايدۇ، دەپ قارايمەن».

   خەۋەردە مۇنداق دېيىلدى:«خاگېل ۋەزىپىدىن قالدۇرۇلغاندىن كېيىن، ئۆتكەن يىلى 12-ئايدا <دىپلوماتىيە سىياسىتى> ژۇرنىلىنىڭ مەخسۇس زىيارىتىنى قوبۇل قىلىپ، ئۆزىنىڭ ۋەزىپە ئۆتىگەن مەزگىلدە ئاقساراي خەۋپسىزلىك كومىتېتىدىكىلەر بىلەن سۈرىيە مەسىلىسىدە ئاز بولمىغان زىددىيەتلەرنىڭ كېلىپ چىققانلىقىنى تىلغا ئالدى. جۇمھۇرىيەتچىلەر پارتىيەسىگە تەۋە بولغان خاگېل ئىزچىل تۈردە ئۆزىنى ئوباما ھۆكۈمىتىنىڭ يادرولۇق چەمبىرىكىدىن سىقىپ چىقىرىلدى، دەپ قارىدى».

   2013-يىلى، ئوباما ئەسەد ھاكىمىيىتىگە قىزىل سىزىق سىزىپ، «سۈرىيە ھۆكۈمەت ئارمىيەسى خىمىيەلىك قورال ئىشلىتىىپ، ئامېرىكىنىڭ بۇ ئىشقا ھەربىي جەھەتتىن ئارىلىشىشىنى كەلتۈرۈپ چىقاردى» دېگەن. ئامېرىكىدا سۈرىيە ھۆكۈمەت ئارمىيەسىنىڭ خىمىيەلىك قورال ئىشلەتكەنلىك ئىسپاتى بايقالغاندىن كېيىن، خاگېل دەرھال ئاي پالتا ناملىق باشقۇرۇلىدىغان بومبا بىلەن سۈرىيە پايتەختى دەمەشىققە ھۇجۇم قىلىشقا تەييارلانغان. ئەمما ئاخىرىدا ئوباما ئۇنى توختىتىپ قويغان. خاگېل بۇنىڭدىن قاتتىق ئۈمىدسىزلەنگەن. خاگېل ئاتلانتىك ئوكيان كېڭىشىدە كۆپچىلىككە مۇنداق دېدى:«بايانات ئېلان قىلىپ، ئەمەلگە ئاشۇرالمىدى، بۇ دەرۋەقە ئامېرىكا زۇڭتۇڭىنىڭ ئىناۋىتىنى يەرگە ئۇردى. دۇنياغا نىسبەتەن ئېيتقاندا، ئامېرىكا زۇڭتۇڭى نېمە دېسە، بولۇپمۇ دېپلوماتىيە ئىشلىرىدا باشقا رەھبەرلەر ۋە دۆلەتلەرگە نېمە دېسە، بۇ شۇنداق بولىدىغانلىقىدىن دېرەك بېرىدۇ» دېدى.