خانلىق مادرىد ھۇجۇمچىسى رونالدو ئىزچىل ھالدا ئاقكۆڭۈللۈك بىلەن خەير-ساخاۋەت ئىشلىرىنى قىلىپ كېلىۋاتىدۇ. ئۇ ئىلگىرى دېڭىز تاشقىنىدا قالغان بالىلارغا ياردەم قىلغان، لىۋانلىق يېتىم بالىلارنى تەكلىپ قىلىپ، ئۇلارغا ياردەم قىلغان. ھايتىدىكى بالىلارغا پۇل ئىئانە قىلغان. ئۇ ئەمدى ئىيوردان دەرياسى قىرغىقىدا ئوت قويۇش دېلوسىدىكى بىردىنبىر ئامان قالغۇچى بىلەن كۆرۈشىدۇ. 

   بۇلتۇر 7-ئاينىڭ 31-كۈنى ئىيوردان دەرياسى قىرغىقى دۇمادىكى ئوت قويۇش دېلوسىدا، تېرورچىلار 18 ئايلىق بىر بوۋاقنى ئۆز ئىچىگە ئالغان بىر ئائىلە كىشىلىرىنى كۆيدۈرىۋەتكەن. بۇ پەلەستىنلىكلەر ئائىلىسىدە پەقەت بەش ياشلىق ئەھمەد داۋابشا ئىسىملىك بىر ئوغۇللا ھايات قالغان. لېكىن ئۇمۇ كۆيۈپ ئېغىر يارىلانغان.

   شۇ يەر ۋاقتى چارشەنبە كۈنى، خانلىق مادرىد باياناتچىسى رائۇل سېررانو كۇۋېدو پەلەستىن ئەلچىخانىسىنىڭ ئىلتىماسىنى تاپشۇرۇۋالغاندىن كېيىن، بۇ ئۆسمۈرنى خانلىق مادرىدنى زىيارەت قىلىپ، مېھمان بولۇشقا چاقىرغانلىقىنى، ئۇنىڭ ئەمدى كىرىستىيانو رونالدو قاتارلىق خانلىق مادرىد چولپانلىرى بىلەن كۆرۈشەلەيدىغانلىقىنى ئېيتتى.

   كۇۋېدونىڭ ئېيتىشىچە، كونكرېت ھالقىلار تېخى پىلانلىنىۋېتىپتۇ، ئەھمەدنىڭ كېلىش ۋاقتى تېخى ئېنىق بېكىتىلمەپتۇ. ئەھمەد ھازىر ئىسرائىلىيەدىكى بىر دوختۇرخانىدا داۋالىنىۋېتىپتۇ. ئۇ كەلگۈسى بىر نەچچە ئاي ئىچىدە خانلىق مادرىدقا كېلىپ، رونالدو قاتارلىقلار بىلەن كۆرۈشىدىكەن.