جاھان ئاگېنتلىقى 6-ماي خەۋىرى؛ لەگلەك تورى تەرجىمىسى: سەئۇدى ئەرەبىستاننىڭ يەمەن چېگرىسىدىكى نەجران رايۇنى ئىككى قېتىم راكىتا ھۇجۇمىغا ئۇچرىدى، يەمەن تەرەپتىن ئېتىلغان راكىتا ھۇجۇمىدا بىر ئەسكەرنى ئۆز ئىچىگە ئالغان 5 نەپەر كىشى ھاياتىدىن ئايرىلدى، ۋە 11 كىشى يارىلاندى.
سەئۇدى ئەرەبىستان رەسمى خەۋەر ئاگېنتلىقى «SPA» نىڭ نەجران رايۇنى مۇداپىئە ئورنىدىن نەقىل قىلغان خەۋىرىگە قارىغاندا، يەمەن تەرەپتىن ئېتىلغان بىر راكىتا رايۇندىكى پادىشاھ سەلمان كوچىسىدىكى نەجران قاماقخانىسى ئەتراپىدا ۋەزىپە ئىجرا قىلىۋاتقان ساقچى ماشىنىسىغا تەگكەن، راكىتا ھۇجۇمىدا بىر كىشى ھاياتىدىن ئايرىلغان. يەنە بىر راكىتا بولسا مەزكۇر كوچىدىكى شەخسى بىر ماشنىغا تېگىپ، ماشىنىدىكى 2 كىشى ۋە يولدا كېتىۋاتقان 2 كىشى ھاياتىدىن ئايرىلغان. خەۋەرگە ئاساسلانغاندا يەمەن تەرىپىدىن ئېتىلغان راكىتا ھۇجۇملىرىدا 11 كىشى يارىلانغان. بۇ ھۇجۇمنى قايسى تەرەپنىڭ سادىر قىلغانلىقى ھەققىدە ئۇچۇر بېرىلمىدى. سەئۇدى ئەرەبىستان تاشقى ئىشلار مىنىستىرلىكىدىن ئېلان قىلىنغان باياناتتا، بۇ ھۇجۇمنى سادىر قىلغۇچىلارغا ئەڭ قاتتىق شەكىلدە جاۋاب قايتۇرىدىغانلىقى تەكىتلەندى. بۇ ھۇجۇمنى يەمەندىكى شىئە ھۇسىي قۇراللىقلىرى سادىر قىلغان بولۇشى ئېھتىمالغا يېقىن.
يەمەندە ھۇسىي قۇراللىقلىرىنىڭ كېڭىيىشىنى توختىتىش ئۈچۈن سەئۇدى ئەرەبىستان باشچىلىقىدا بىرلەشمە ئارمىيە قۇرۇلۇپ 26-مارتتا «كەسكىن قارار بورىنى» ھەرىكىتى نامىدا يەمەنگە ھاۋا ھۇجۇمى قوزغىغان ئىدى. يەمەندە پرېزىدېنت ئابدۇرەببۇ مەنسۇر ھادى ھۆكۈمىتىنىڭ جىددى مۇراجىئەت قىلىشى بىلەن يەمەنگە قوزغالغان ھەربىي مۇداخىلە ھەرىكىتى 21-ئاپرېلدا ئاخىرلاشقان ئىدى. بىرلەشمە ئارمىيە باياناتچىسى گېنىرال ئەھمەد ئەسىرى، يەمەن خەلقى ئۈچۈن «ئۈمىدكە قايتىش» ھەرىكىتىنىڭ باشلانغانلىقىنى ئېيتقان ئىدى.