ئاپتونوم رايونىمىز بۇلتۇر 1 – دېكابىر توك ئىشلەتكۈچىلەر بىلەن توك چىقىرىش شىركەتلىرىنىڭ بىۋاسىتە سودىلىشىشىنى نۇقتىدا سىناق قىلىپ، ‹‹توكنى بىۋاسىتە سېتىۋېلىش›› سودا ئەندىزىسىنى يولغا قويدى، ھازىر بىۋاسىتە سودىلىشىشنى نۇقتىدا سىناق قىلىش خىزمىتى ئوڭۇشلۇق بولۇپ، بۇ يىلقى تۇنجى تۈركۈمدىكى نۇقتىدا سىناق قىلىش خىزمىتى باشلاندى.
ئاپتونوم رايوننىڭ 19 – ئاپرېل ئېچىلغان تۆۋەن باھالىق توك سىياسىتىدىن تاراتقۇلارنى خەۋەرلەندۈرۈش يىغىنىدا، دۆلەت ئېلېكتىر تورى شىنجاڭ ئېلېكتىر ئېنېرگىيە شىركىتىنىڭ مۇئاۋىن دىرېكتورى جاۋ چىڭشەن مۇنداق دېدى: ھېسابلاش ئارقىلىق، ھازىر توك ئىشلەتكۈچىلەر بىلەن توك چىقىرىش كارخانىلىرىنىڭ بىۋاسىتە سودىلىشىشتىن كېيىنكى ھەر كىلوۋات سائەت توكنىڭ باھاسى تەخمىنەن 0.36 يۈەندىن 0.40 يۈەنگىچە بولغان. بۇلتۇرقى نۇقتىدا سىناق قىلىش ئاساسىدا بۇ يىل تۇنجى تۈركۈمدىكى نۇقتىدا سىناق قىلىش خىزمىتى ئومۇميۈزلۈك قانات يايدۇرۇلدى.
ئاپتونوم رايونلۇق ئىقتىساد ۋە ئۇچۇرلاشتۇرۇش كومىتېتى بۇ يىل ئاپتونوم رايوننىڭ ‹‹شىنجاڭدىكى توك ئىشلەتكۈچىلەر بىلەن توك چىقىرىش كارخانىلىرىنىڭ بىۋاسىتە سودىلىشىشىنى نۇقتىدا سىناق قىلىشنى يولغا قويۇش لايىھەسىنى بېسىپ تارقىتىش توغرىسىدىكى ئۇقتۇرۇش››ىغا ئاساسەن تۇنجى تۈركۈمدىكى توك ئىشلەتكۈچىلەر بىلەن توك چىقىرىش كارخانىلىرىنىڭ بىۋاسىتە سودىلىشىشىنى نۇقتىدا سىناق قىلىدىغان كارخانىلارنىڭ تىزىملىكىنى ئېلان قىلدى.
جاۋ چىڭشەن مۇنداق دېدى: بۇ يىلقى تۇنجى تۈركۈمدىكى نۇقتىدا سىناق قىلىنىدىغان كارخانىلار 30 – مارت دۆلەت ئېلېكتىر تورى شىنجاڭ ئېلېكتىر ئېنېرگىيە شىركىتىنىڭ سودا مەركىزىدە بىۋاسىتە سودىلىشىشنى نۇقتىدا سىناق قىلدى، بىۋاسىتە سودىلىشىشنى نۇقتىدا سىناق قىلىشقا 41 كارخانا قاتناشتى، بۇنىڭ ئىچىدە 15 توك چىقىرىش كارخانىسى، 26 توك ئىشلەتكۈچى كارخانا بار. سودا سۇپىسىدا توك چىقارغۇچى يەتتە كارخانا بىلەن توك ئىشلەتكۈچى 24 كارخانا ئوڭۇشلۇق سودىلاشتى، سودا مىقدارى 2 مىليارد كىلوۋات سائەتكە يەتتى.
سودىلىشىش ئەھۋالىدىن قارىغاندا، توك ئىشلىتىش مىقدارىنى ئەمەلىي ھېسابلىغاندا توك ئىشلىتىش تەننەرخى 1 مىليارد 200 مىليون يۈەن، ھەر كىلوۋات سائەت توكنىڭ باھاسى 0.0307 يۈەندىن 0.1355 يۈەنگىچە تۆۋەنلىگەن.