بىر نەپەر ئامېرىكىلىق ئوۋچى قانۇنلۇق ھالدا بىر تاغ شىرىنى ئېتىپ ئۆلتۈرگەندىن كېيىن بۇ شىرنىڭ باش قىسمىدا چىش ۋە بۇرۇت ئۆسۈپ قالغانلىقىنى بايقىغان.

     بۇ تاغ شىرى 12-ئاينىڭ 30-كۈنى ئۆلتۈرۈلگەن بولۇپ قوغداش رايونىدىكى خادىملار ئاشكارىلىغان ئۆلتۈرۈلگەن تاغ شىرىنىڭ سۈرىتىنى كۆرگەن ياۋايى ھايۋاناتلار تەتقىقاتچىسى ھەيران قالغان.

8-يانىۋار ئېلان قىلىنغان خەۋەردا خىزمەتچى خادىملارنىڭ ھازىرچە ئۆلتۈرۈلگەن شىرنىڭ باش قىسمىدىكى بۇ ئەھۋالنى چۈشەندۈرۈشكە ئامالسىزلىقىنى ئېيتقان.

     دېيىلىشىچە، ئۆلتۈرۈلگەن ئەركەك تاغ شىرىنىڭ باش قىسمىغا ئۆسۈپ قالغان چىش بەلكىم ھامىلە ۋاقتىدا ئۆلگەن يەنە بىر شىر ھامىلىسىنىڭ قالدۇق قىسمىغا تۇتىشىپ قالغان بولۇشى مۇمكىن ئىكەن. بۇ خىل تۇتىشىلغان ئۆسمىنىڭ تەركىبىدىكى توقۇلمىلاردا چىش، بۇرۇت، تۈك، ھەتتا پۇت-قوللارنىڭ ئۆسۈپ چىقىش مۇمكىنچىلىكىمۇ بار ئىكەن. بىراق بۇ خىل ئەھۋال ئادەم ۋە ھايۋاناتلاردا تولىمۇ كەم ئۇچرايدىكەن.

     تەتقىقاتچى خادىملارنىڭ باياناتتا دېيىشىچە مەزكۇر رايوندىكى بىئولوگىيەشۇناسلار ئەزەلدىن بۇ خىلدىكى غەيرىي ئاھۋالنى ئۇچرىتىپ باقمىغان ئىكەن.

     ئۆلتۈرۈلگەن بۇ تاغ شىرى ئۇندىن بۇرۇن ئوۋچى ۋېستوننىڭ چېگرادىكى تۇرالغۇسىغا ھۇجۇم قىلىپ، ئەرمەك ئىتىنى ئۆلتۈرۈپ قويۇشقا تاسلا قالغان ئىكەن، خىزمەتچى خادىملارنىڭ دېيىشىچە ئوۋچىنىڭ ئىتى ھايات قالغان. ئارقىدىن ئوۋچى ئاپشاركىسىنى ئەگەشتۈرۈپ ئۈچ سائەتچە شىرغا ئەگەشكەندىن كېيىن ئۇنى ئېتىپ ئۆلتۈرگەن. ئاخباراتتا دېيىلىشىچە، تاغ شىرىنى ئوۋلاش قانۇنلۇق قىلمىش بولۇپ، پەقەت ئوۋ ئوۋلاش كىنىشكىسى بولسىلا بەلگىلەنگەن پەسىلدە ئوۋچىلار ئوۋ ئوۋلىسا بولىدىكەن.