ئامېرىكا «ۋاشىنگىتون كۈندىلىك پوچتا گېزىتى» نىڭ 4-چېسلا خەۋەر قىلىشىچە، توي كىيىمى كىيىش ھەر بىر قىزنىڭ ئارزۇسى، ھەتتا توي قىلىش پىلانى يوق ياكى توي قىلىدىغان يىگىتى يوق بولسىمۇ، بۇ ئارزۇغا دەخلى بولمايدۇ. ياپونىيەدە توي قىلىش نىسبىتىنىڭ تۆۋەنلىشىگە ئەگىشىپ «بويتاق توي سۈرىتى» چۈشۈش بارغانسىرى مودا بولۇشقا باشلىدى.

    ياپونىيە تاراتقۇلىرىنىڭ خەۋەر قىلىشىچە، ناگويا شەھىرى (Nagoya) دىكى زۇتتو سۈرەتخانىسى (ZUTTO　PHOTO　STUDIO) تەخمىنەن بىر يىل بۇرۇنلا «بويتاق توي سۈرىتى» مۇلازىمىتى تۈر خىزمىتىنى ئوتتۇرىغا قويغان بولۇپ، پەقەت «كېلىنچەك» كىلا يالغۇز توي سۈرىتى تارتىش مۇلازىمىتى تەمىنلەيدۇ.

     خەۋەردە دېيىلىشىچە، بۇ خىيال راك كېسىلىگە گىرىپتار بولغان بىر بىماردىن ئىلھام ئېلىپ ئوتتۇرىغا قويۇلغان. بۇ ئايال 30 ياش بولۇپ، ياشاش ۋاقتىنىڭ ئانچە ئۇزۇن قالمىغانلىقى ئاشكارىلانغان. شۇنىڭ بىلەن ئۇ «مەيلى قانداقلا بولمىسۇن ئانامغا ئۆزۈمنىڭ توي كىيىمى كېيىپ كېلىنچەك بولغان ۋاقتىمنى كۆرسىتىشىم كېرەك» دەپ ئويلىغان ۋە زۇتتو سۈرەتخانىسىغا كەلگەن.

بۇ ئايال راك كېسىلىنى داۋالىتىش مەزگىلىدە چېچى چۈشۈپ كەتكەچكە، زۇتتو سۈرەتخانىسى ئۇنىڭغا يالغان چاچ كىيدۈرگەن ۋە ياخشى گىرىم قىلغان. ئۇ ئايال ئائىلىسىدىكىلەرنىڭ ھەمراھلىقىدا، ئۆزىنىڭ بويتاق توي سۈرىتىنى چۈشكەن.

42 ياشلىق فوتوگراف كوجى (Koji) مۇنداق دېدى:«مەن خېرىدارنىڭ بەخىتلىك ھالىتىنى كۆرگەندە بەكمۇ تەسىرلەندىم. گەرچە بۇندىن بۇرۇن سۈرەتكە چۈشىدىغانلارنىڭ ھەممىسى بىر جۈپ ئاشىق-مەشۇقلار بولسىمۇ، بويتاق توي سۈرىتىگە چۈشۈشنىمۇ توغرا چۈشىنىشكە بولىدۇ.»

    زۇتتو سۈرەتخانىسى 29 ياشلىق يەنە بىر ئايال ئوقۇتقۇچىنى كۈتىۋالغان بولۇپ، ئۇ ئانىسىنىڭ راك كېسىلىگە گىرىپتار بولغانلىقىنى بىلگەندىن كېيىن، بويتاق توي سۈرىتى چۈشۈش ئارقىلىق ئۆزىنىڭ ۋاپادارلىقىنى ئىپادىلىمەكچى بولغان. ئۇ مۇنداق دېدى، بويتاق بولسا ۋاقىت ۋە پۇلنىڭ ئەركىنلىكىدىن بەھىرلەنگىلى بولىدۇ، توي قىلىش دېگەن تەقدىر-پېشانىدىكى ئىش ئىكەن. شۇڭلاشقا ئۆزۈمنىڭ ۋاپادارلىقىمنى ئىپادىلەش ئۈچۈن، بويتاق توي سۈرىتىگە چۈشۈشنى تاللىدىم.

      خەۋەردە دېيىلىشىچە، بويتاق توي سۈرىتىگە چۈشۈش تۈرى توي كىيىمى، گىرىم قىلىش، تەخمىنەن 250 پارچە سۈرەت ۋە خاتىرە سۈرەت توپلىمى قاتارلىقلارنى ئۆز ئىچىگە ئالىدىغان بولۇپ، ھەققى تەخمىنەن 140 مىڭ يىن (تەخمىنەن 7560 يۈەن خەلق پۇلى) دىن باشلىنىدۇ. بۇ خەۋەر تارقالغاندىن كېيىن، زۇتتو سۈرەتخانىسىغا كېلىپ بويتاق توي سۈرىتى چۈشۈشنى خالايدىغانلار بارغانسىرى كۆپەيگەن ۋە زاكاسمۇ توختىماي قوبۇل قىلىنغان.

   بويتاق توي سۈرىتى چۈشىدىغان خېرىدارلارنىڭ يېشى 20 ياشتىن 69 ياشقىچە بولۇپ، بەزىلىرى ياش ۋاقتىدا توي كىيىمى كىيىپ خاتىرە قالدۇرۇش، بەزىلىرى توي ئىشى بۇزۇلغانلىقتىن كۆڭلىنى ئارام تاپقۇزۇش، ئاتا-ئانىسى ئاجرىشىپ كەتكەن ئائىلىنىڭ بالىلىرى ئانىسىغا خاتىرە قالدۇرۇش قاتارلىقلار سەۋەبلەر بىلەن كېلىدۇ.

42 ياشلىق فوتوگراف كوجى مۇنداق دېدى: «كىشىلەرنىڭ بويتاق توي سۈرىتىگە چۈشۈشىنىڭ سەۋەبى كۆپ خىل. بىز بۇ ئارقىلىق كىشىلەرنىڭ قەلبىدىكى ئازابنى يېنىكلىتىشنى خالايمىز. بۇ ھازىرقى جەمئىيەتتە يېڭىچە بىر خىل مودا بولۇشقا باشلىدى».