15- دېكابىر ئېچىلغان گۇاڭدۇڭ ئۆلكىسى جۇخەي رايونىنىڭ سەرگەردان ۋە تىلەمچىلەرنى قۇتقۇزۇش، ياردەم بېرىش، باشقۇرۇش خىزمىتى يىغىنىدا، جۇخەي شەھىرى شياڭجۇ رايونلۇق خەلق ئىشلىرى ئىدارىسىدىكى ئالاقىدار مەسئۇل خادىمنىڭ ئاشكارىلىشىچە، كۆپ ساندىكى كەسپىي تىلەمچىنىڭ كۈندىلۈك كىرىمى ئاز بولغاندا 200 يۈەندىن 300 يۈەنگىچە، كۆپ بولغاندا 1000 يۈەندىن 2000 يۈەنگىچە، ھەتتا بەزىلىرىنىڭ «يىللىق كىرىمى» ئەڭ يۇقىرى بولغاندا 300 مىڭ يۈەنگە يېتىدىكەن، ئۇلارنىڭ بەزىلىرى تېخى «تۇلپار» ماركىلىق ئاپتوموبىل ھەيدەيدىكەن. بۇ ئۇچۇر ئاشكارىلانغاندىن كېيىن، تورداشلار كەسپىي تىلەمچىلەرنىڭ قىلمىشى ئالدامچىلىققا كىرەمدۇ؟ دەپ سوراشقان.

مۇخبىرنىڭ كۆزىتىشىچە، كۆپ ساندىكى تورداش كەسپىي تىلەمچىلەر باشقىلارنىڭ ھېسداشلىقىنى قوزغاپ، ياردەمگە ھەقىقىي ئېھتىياجلىقلارنىڭ ھەققىنى ئېلىۋالىدۇ، بۇ بىر خىل بايلىق ئىسراپچىلىقى، دەپ قارىغان.

    بىر تورداش مۇنداق دېدى: «ھازىر كوچىدا كەسپىي تىلەمچىلەر ناھايىتى كۆپ، ئادەتتىكى كىشىلەر ئۇلارنى ئاسانلىقچە پەرقلەندۈرەلمەيدۇ، ئۇلارنىڭ سەۋەبىدىن ياردەمگە ھەقىقىي ئېھتىياجلىق كىشىلەر ياردەمسىز قېلىۋاتىدۇ».

    مۇخبىر تورداشلارنىڭ: «كەسپىي تىلەمچىلەرنىڭ قىلمىشى ئالدامچىلىققا ياتامدۇ؟ دېگەن سوئالىغا جاۋاب تېپىش ئۈچۈن ماتېرىياللارنى ئاختۇرۇپ، ھازىر يولغا قويۇلۇۋاتقان قانۇندا قانۇنسىز تىلەمچىلىك قىلىشنى چەكلەش توغرىسىدا بەزى بەلگىلمىلەرنىڭ بارلىقىنى، ئەمما كەسپىي تىلەمچىلەرگە قارىتىلغان ئېنىق بەلگىلىمىنىڭ يوقلۇقىنى بايقىغان.

    ئالاقىدار زاتلار مۇنداق دېدى: «ئەگەر كوچىلاردىكى تىلەمچىلەردىن قۇتقۇزۇش-ياردەم بېرىش پونكىتىنىڭ ياردىمىنى خالايدىغان-خالىمايدىغانلىقى سورالسا، كۆپ ساندىكى كەسپىي تىلەمچى ئېنىقلا رەت قىلىدۇ؛ ئۇلار ھەرگىزمۇ يېمەك-ئىچمەك، كىيىم-كېچەك ۋە باشقا نەرسىلەرنى ئالمايدۇ، پەقەت نەق پۇلنىلا ئالىدۇ، بۇنداقلار ئاساسەن كەسپىي تىلەمچىلەردۇر».