ئەنگىلىيە ‹‹ كۈندىلىك پوچتا گېزىتى ›› نىڭ 7-ئاۋغۇستتىكى سانىغا ھامىلىدار بىر ئايالنىڭ يوغان قورسىقى بىلەن قىيىنلىقى دەرىجىسى يوقىرى بولغان سېرك ھەرىكەتلىرىنى ئىشلەۋاتقان كۆرۈنۈشى بېسىلغان . سۈرەتتىكى باش قەھرىمان 39 ياشلىق ئايال مىچېل ئارۋىن بولۇپ ، ئۇ ئامېرىكىنىڭ نيۇيوركتىكى خانىشلار رايونىدىن كەلگەن سېرىك ئۆمىكىنىڭ كەسپىي ئارتىسى ، بوشلۇقتا ئۇچۇش ماھىرى ئىكەن . بىر ئاي ئىلگىرى ، ھامىلىدار بولغىنىغا سەككىز ئاي بولغان مىچېلنىڭ فوتوگرافى ئۇنىڭ بوشلۇقتا ئىشلىگەن قىيىنچلىق دەرىجىسى بىر قەدەر يۇقىرى بولغان ھەر خىل ماھارەتلىرىنى سۈرەتكە ئالغان .

سۈرەتتە مىچېل تەنھەرىكەت كىيىمى كىيىپ ، كەسىپداشلىرىنىڭ ياردىمىدە بوشلۇقتا بېشىنى تۆۋەنگە قىلىپ ئېسىلىپ تۇرغان ، ئۇنىڭ كۆتۈرۈلۈپ چىققان قورسىقى كىشىلەرنىڭ ئالاھىدە دىققىتىنى تارتقان . يەنە بىر سۈرەتتە ، ئۇ يەنە ئۆزىنىڭ ئەۋرىشىمچانلىقىنى نامايان قىلىپ ، ئىنچىگە چىۋىق ئۈستىدە ھەرخىل ھەرىكەتلەرنى ئىشلىگەن . ئىگىلىنىشىچە ، ئۇنىڭ مۆلچەرلەنگەن تۇغۇت ۋاقتى 26-ئاۋغۇست بولۇپ ، ھامىلدار بولۇپ 39 ھەپتىگىچە ئۇ ئىزچىل تۈردە ئۆمەكنىڭ مەشىقىگە قاتنىشىپ كەلگەن .

مىچېلنىڭ ئۇسسۇل كەسپى بىلەن شوغۇللانغانلىقىغا ئون نەچچە يىل بولغان بولۇپ ، ئۇ ئۆزىنىڭ خىزمىتىنى ناھايىتى ياخشى كۆرىدىكەن . ئۇ مۇخبىرنىڭ زىيارىتىنى قوبۇل قىلغاندا مۇنداق دېگەن : مەن ھامىلىدارلىق مەزگىلىمدە باشقىلارغا ئوخشىمايدىغان سۈرەتلەرگە چۈشكۈم بار . گەرچە ھامىلىدار بولساممۇ ، بەدەن شەكلى ۋە كۈچ مەشىقىگە ناھايىتى ئەھمىيەت بەرگەنلىكىم ئۈچۈن ، سالامەتلىكىم ئىزچىل ياخشى بولدى ، لېكىن بۇ خىزمەتنى قىلسام روھىي ھالىتىم ناھايىتى ياخشى بولۇپ قالىدۇ ، مەن پەقەت ئۆزەم ياخشى كۆرگەن ئىشلارنى قىلىشنىلا ئويلايمەن . يەرلىكتىكى تۇغۇت بۆلۈمى دوختۇرلىرى ۋە تۇغۇتلۇق ئاياللارغا ياردەملەشكۈچىلەر ئۇنى قوللايدىغانلىقىنى بىلدۈرۈپ ، ئېھتىيات قىلسىلا ، بۇ ھەرىكەتلەر ھامىلىنىڭ يېتىلىشىگە تەسىر كۆرسەتمەيدۇ ، دەپ قارىغان . شۇڭا ئۇ دوختۇرنىڭ تاپىلىشى بويىچە ، مارافون ۋە چوڭقۇر سۇدا ئۈزۈش قاتارلىق ھامىلىگە زىيان يەتكۈزىدىغان ھەرىكەتلەرنى توختاتقان .

ئۇنىڭ بىر يېقىن دوستى توردىن ئۇنىڭ يوغان قورسىقى بىلەن قىيىنلىقى دەرىجىسى يۇقىرى بولغان ھەرىكەتلەرنى ئىشلىگەن سۈرىتىنى كۆرۈپ ھەيران قالغان ، لېكىن نۇرغۇن تورداشلار ئۇنى قوللايدىغانلىقىنى بىلدۈرۈپ سۆز قالدۇرغان . بۇنىڭ ئىچىدە بىر تورداش مۇنداق دېگەن : بەك قالتىسكەن ، بوۋاق بىلەن ئاپىسى بىرلىكتە ھەرىكەت ئىشلەپتۇ ئەمەسمۇ ! . ئۇ ئىشلەۋاتقان ئۆمەكنىڭ باشلىقى بۇ سۈرەتلەرنى كۆرگەندىن كېيىن ‹‹ تارىختىكى ئەڭ ھېسسىياتچان ئانا ›› دېگەن .