ئەنگلىيە «كۈندىلىك پوچتا گېزىتى» نىڭ 23-دېكابىر خەۋەر قىلىشىچە، بىر سۈرىيەلىك مۇساپىر ئايال كەم دېگەندە ئۈچ تۈركىيەلىك ئەرنى ئالداپ ئۇلار بىلەن توي قىلىدىغانلىقىنى ئېيتقان ھەمدە تويلۇقنى ئېلىپلا قېچىپ كەتكەن.

    مەزكۇر سۈرىيەلىك ئايالنىڭ ئەسلى ئىسمى نامەلۇم. يېقىندا يۈز بەرگەن ئالدامچىلىق ۋەقەسىدە بۇ ئايال لايىق تونۇشتۇرۇش مەركىزى ئارقىلىق 38 ياشقا كىرگەن تۈركىيەلىك ئەر رىزا تۈركال بىلەن تونۇشقان، رىزا ئۇنىڭغا تۈركىيەنىڭ جەنۇبىدىكى ئۆيىدە بىللە ياشاشقا ۋەدە بەرگەن. ئەمما توي قىلىپ 2-كۈنى رىزا تويلۇققا بەرگەن 5000 فوندسىتېرلىڭ (تەخمىنەن 48 مىڭ يۈەن) قىممىتىدىكى نەق پۇل، مەرۋايىت ۋە تىللا قاتارلىق نەرسىلەرنى ئېلىپ يوقاپ كەتكەن.

    رىزا دەرھال ساقچىغا مەلۇم قىلغان ھەمدە مەزكۇر ئايالنىڭ رەسىمىنى ساقچىلارغا كۆرسەتكەن، شۇندىلا رىزا ئۆزىنىڭ زىيانكەشلىككە ئۇچرىغان تۇنجى ئادەم ئەمەسلىكىنى ھېس قىلغان، بۇ ئايال ئەسلىدە ئىلگىرى ئىككى ئەرنى ئالدىغان ئىكەن.

    ئالدانغان ئەرلەر توي مۈلىكىنى يوقاتقاندىن باشقا، يەنە لايىق تونۇشتۇرۇش ئورنىنىڭ رەسىمىيەت ھەققى ۋە توي مۇراسىمىگە كەتكەن چىقىملارنىمۇ تۆلىگەنىكەن.