بۇ پەسىلنىڭ بېشىدا، خان جەمەتى مادرىد كوماندىسىدىكى پورتۇگالىيەلىك ھۇجۇمچى كىرىستىئانو رونالدونىڭ ئىپادىسى ئانچە تۇراقلىق بولمىدى. دەسلەپتىكى يەتتە ئايلانما بىرلەشمە مۇسابىقىنىڭ ئالتە مەيدان مۇسابىقىسدە توپ ئۇرالمىدى. كېيىن مۇسابىقىنىڭ چوڭقۇرلىشىغا ئەگىشىپ بارغانسېرى ئەسلىدىكى ھالىتىگە قايتىپ كەلدى. ئىسپانىيە تاراتقۇسى «ئا س گېزىتى» نىڭ خەۋىرىگە قارىغاندا، بۇ پەسىل كىرىستىئانو رونالدونىڭ ھەرقايسى تۈردىكى مۇسابىقىدە كىرگۈزگەن توپ سانى 23 گە يەتكەن بولۇپ، بۇ جەھەتتە بايرىن مىيۇنخېن كوماندىسىنىڭ ھۇجۇمچىسى لېۋانتوۋسىكىنىڭ كىرگۈزگەن توپ سانى بىلەن تەڭلەشكەن. ئەمما كىرىستىئانو رونالدونىڭ خان جەمەتى مادرىد كەسپىي ھاياتىدا ھەر بىر مەيدانغا توغرا كەلگەن ئوتتۇرىچە توپ كىرگۈزۈش ئۈنۈمى لېۋانتوۋسىكىنىڭ بايرىن مىيۇنخېن كەسپىي ھاياتىدىكى توپ كىرگۈزۈش ئۈنۈمىدىن خېلى بەكلا ئېشىپ كېتىدۇ.

       ھازىرغا قەدەر كىرىستىئانو رونالدو بۇ پەسىل ھەرقايسى تۈردىكى مۇسابىقىدە 23 توپ كىرگۈزگەن. ئىسپانىيە ئا دەرىجىلىك بىرلەشمە مۇسابىقىسدە 12 توپ كىرگۈزگەن. ياۋروپا چىمپىيۇنلۇق بىرلەشمە مۇسابىقىسدە 11 توپ كىرگۈزگەن. بۇ سان بىلەن يېڭى پەسىللىك بىرلەشمە مۇسابىقە باشلانغاندىن بۇيان قالتىس ئويناۋتقان پولشالىق ھۇجۇمچى لېۋانتوۋسىكى بىلەن تەڭلەشكەن. لېۋانتوۋسىكى گېرمانىيە ئا دەرىجىلىك بىرلەشمە مۇسابىقىسدە 15 توپ كىرگۈزگەن. ياۋروپا چىمپىيۇنلۇق بىرلەشمە مۇسابىقىسدە يەتتە توپ كىرگۈزگەن. گېرمانىيە لوڭقىسىنى تالىشىش مۇسابىقىسدە بىر توپ كىرگۈزگەن. گەرچە ئىككى ھۇجۇمچى بۇ جەھەتتە ۋاقىتلىق تەڭلەشكەن بولسىمۇ، بىراق بىر ئىشنى ئۇنتۇپ قالماسلىق كېرەك، يەنى بۇ لېۋانتوۋسىكىنىڭ كەسپىي ھاياتىدىكى ئەڭ قالتىس مۇسابىقە پەسلى بولۇپ ھېسابلىنىدۇ.  كىرىستىئانو رونالدونىڭ ئىپادىسى ئانچە ياخشى بولمىغان ھالەتتىمۇ يەنىلا مۇشۇنداق نەتىجە ئالدى. بۇ كىرىستىئانو رونالدونىڭ ئەڭ ياخشى باشلانمىغان مۇسابىقە پەسلى ھېسابلىنىدۇ

      ياۋروپا بەش چوڭ بىرلەشمىسدە ھازىر گېرمانىيە ئا دەرىجىلىك بىرلەشمىسىدىكى سېرىق ھەرە دورتموند كوماندىسىنىڭ ھۇجۇمچىسى ئوبومىياڭ ئەڭ كۆپ توپ كىرگۈزگەن بولۇپ، گابون دۆلەت پۇتبول كوماندىسىنىڭ ئەزاسى ئوبومىياڭ 27 توپ كىرگۈزگەن. بۇنىڭ ئىچىدە گېرمانىيە ئا دەرىجىلىك بىرلەشمە مۇسابىقىسدە 18 توپ، ياۋروپا بىرلەشمە لوڭقىسدا يەتتە توپ، گېرمانىيە لوڭقىسدا ئىككى توپ كىرگۈزگەن. بۇ توپچىدىن كېيىنكىسى بارسېلونا كوماندىسىدىكى ئۇراگۋايلىق ھۇجۇمچى سۇئارېز، ئۇ يېقىندا ئېلىپ بېرىلغان دۇنيا كولۇبلار لوڭقىسىنى تالىشىش ئىككى مەيدان مۇسابىقىدە بەش توپ كىرگۈزگەن. بۇ پەسىل ھەرقايسى تۈردىكى مۇسابىقىدە كىرگۈزگەن توپ سانى 24 كە يەتكەن. كىرىستىئانو رونالدو بىلەن لېۋانتوۋسىكى 23 توپ بىلەن ئۈچىنچى ئورۇندا تۇرىدۇ.

     «ئا س گېزىتى» نىڭ كۆرسىتىشىچە، ئۆتكەن بەش پەسىلدە كىرسىتىئانو رونالدونىڭ ھەر بىر پەسىلدىكى توپ سانى 50+ بولۇپ، بۇنداق نەتىجە ياراتماق ھەقىقەتەن ئاسان ئەمەس، شۇنداقلا بۇ ئادەتتىكى ھۇجۇمچىلارنىڭ قۇلىدىن كېلىدىغان ئىشمۇ ئەمەس، خان جەمەتى مادرىد كولۇبىغا كەلگەندىن بۇيان كىرىستىئانو رونالدو 322 مەيدان مۇسابىقىگە قاتنىشىپ 336 توپ كىرگۈزگەن. بىر مەيدانغا توغرا كەلگەن توپ سانى 1.4 بولغان. بۇ خېلى داڭلىق دېگەن مەرگەنلەرمۇ ئىشقا ئاشۇرالمايدىغان سان. لېۋانتوۋسىكى بايرىن مىيۇنخېن كوماندىسدا 75 مەيدان مۇسابىقىدە 48 توپ كىرگۈزگەن. 0.64 تىن توغرا كېلىدۇ. يېقىندىن بۇيان چىققان خەۋەرلەردە، خان جەمەتى مادرىد كولۇبى لېۋانتوۋسىكىنى يۆتكەپ كەلمەكچى دېيىلگەن بولۇپ، لېكىن نۆۋەتتىكى ئەھۋالدىن قارىغاندا، CR7 يەنىلا لېۋانتوۋسىكىدىن ئۈستۈن ئورۇندا تۇرىدۇ. خان جەمەتى مادرىد يۇقۇرى قاتلىمى بۇ ئىشتا ئويلىنىپ بېقىشى كېرەك.