شىياۋمى شىركىتى بۈگۈن 11-نۆۋەتلىك ئاممىۋى مەبلەغ توپلاش مەھسۇلاتىنىڭ ئۇچۇرىنى ئاشكارىلىغان، كىشىلەر ئالدىن پەرەز قىلغاندەك، بۇ قېتىمقى يېڭى مەھسۇلات دەرۋەقە بالىلار قول سائىتى بولۇپ، ئۇنىڭغا «مىتۇ» (米兔) بالىلار تېلېفون قول سائىتى دەپ ئىسىم قويۇلغان.

        ئىگەللىنىشىچە، «مىتۇ»  بالىلار تېلېفون قول سائىتىنى شىياۋمى ئېكولوگىيە زەنجىرىگە تەۋە كارخانا شىياۋ لىڭ تېخنىكىسى تەرىپىدىن ئىشلەپچىقىرىلغان بولۇپ، سېتىلىش باھاسى 269 يۈەن ئىكەن. بۇ بىر ئەقلىي ئىقتىدارلىق قول سائىتى بولۇپ، ئاۋاز سۈپىتى يۇقىرى بولغان قوش يۆنىلىشلىك پاراڭلىشىش، ئورۇن بەلگىلەش ۋە رادىئاتسىيەسى دەرىجىدىن تاشقىرى تۆۋەن بولۇش قاتارلىقلارنى ئۆزىنىڭ ئەڭ يارقىن ئالاھىدىلىكى قىلغان؛ بۇ قول سائىتى شىياۋمىنىڭ ئايلىق ئىجارىسى يوق تېلېفون كارتىسى (بىرلەشمە خەۋەرلىشىش 2G تورىنى قوللايدۇ) نى قوللايدىكەن، مەملىكەت تەۋەسىدە تېلېفون قوبۇل قىلسا ھەقسىز بولۇپ، شەھەر ئىچى ۋە ئۇزۇن يوللۇق تېلېفون ئۇرسا ھەر مىنۇتىغا پەقەت بىر مو ئېلىنىدىكەن؛ بۇ قول سائىتى يەنە ياڭراتقۇ ئارقىلىق سۆزلىشىش ۋە بىر كۇنۇپكا ئارقىلىق تېلېفون ئۇرۇش قاتارلىق ئىقتىدارلارغا ئىگە ئىكەن؛ سىمسىز تورنى قوللايدىكەن، ئورۇن بەلگىلەش ئىقتىدارى كۈچلۈك بولۇپ، ئېنىقلىق نىسبىتى 10 مېتىرغا يېتىدىكەن.

       يۇقارقىلاردىن باشقا، بۇ قول سائىتى يەنە بىخەتەر رايوندىن ئايرىلىشنى ئۇقتۇرۇش، بىر كۇنۇپكا بىلەن قۇتقۇزۇش، ئورۇن خاتىرىسى، بىر كۇنۇپكا بىلەن يول باشلاش، بىر كۇنۇپكا بىلەن ئاۋاز يوللاش قاتارلىق ئىقتىدارلارنىمۇ ھازىرلىغان ئىكەن. رازمېرى 40x15x189 مىللىمېتىر، ئېغىرلىقى 37 گىرام كېلىدىكەن، كۆك ۋە ھال رەڭلىك ئىككى خىل نۇسخىسى بولۇپ، ئىچىگە 300 مىللىئامپىرلىق باتارىيە سەپلەنگەن، توكى ئالتە كۈن ئەتراپىدا ساقلىنىدىكەن، نورمال ئىشلەتكەندە ئىككى كۈن يېتىدىكەن. بىر يانفون بىلەن بەش دانە قول سائىتىنى ئۆز-ئارا ئۇلاشقا بولىدىكەن، ئاندىرويىد يانفونىنىلا قوللايدىكەن، iOS نى ھازىرچە قوللىمايدىكەن.

      بالىلارنىڭ بىخەتەرلىكى ھەر بىر ئاتا-ئانا بولغۇچى ئەڭ كۆڭۈل بۆلىدىغان مەسىلە، شىياۋمى مۇشۇ سودا پۇرسىتىنى كۆرۈپ يەتكەن، قارىغاندا شىياۋمى شىركىتى كەلگۈسىدە بالىلارغا يۈزلەنگەن تاقىما كۆچمە ئۈسكۈنە ساھەسىدىمۇ بىر كىشىلىك ئورۇنغا ئىگە بولىدىغان ئوخشايدۇ.