روسىيە سۈنئىي ھەمراھ تورىنىڭ خەۋىرىگە ئاساسلانغاندا، جۇڭگودىكى ئەڭ چوڭ ئىنتېرنېت ئىزدەش ماتورى بولغان بەيدۇ شىركىتىنىڭ لېدىرى لى يەنخوڭ چارشەنبە كۈنى ئېچىلغان 2-نۆۋەتلىك دۇنيا ئىنتېرنېت چوڭ يىغىنى (World Internet Conference) دا سۆز قىلىپ، بەيدۇنىڭ روسىيە بازىرىغا كىرىش ئويى بارلىقىنى، روسىيەدىكى ئىزدەش ماتورى Yandex بىلەن بولغان ھەمكارلىق مۇناسىۋىتىنى كۈچەيتىشنى ئۈمىد قىلىدىغانلىقىنى بىلدۈرگەن.

       لى يەنخوڭ سۆزىدە مۇنۇلارنى دېگەن: «بىز روسىيە بازىرىغا ئىنتايىن قىزىقىمىز، بىز يەنە روسىيەلىكلەرنىڭ Yandex نى دائىم ئىشلىتىدىغانلىقىنى ئوبدان بىلىمىز. Yandex نىڭ روسىيە بازىرىدا قولغا كەلتۈرگەن نەتىجىلىرى بىزدە ناھايىتى چوڭقۇر تەسىر قالدۇردى، بىز Yandex بىلەن بولغان ھەمكارلىق مۇناسىۋىتىنى تېخىمۇ كۈچەيتىشنى ئۈمىد قىلىمىز. مەن كونكرېت ۋاقتنى ئېنىق ئېيتالمايمەن، ئەمما بىزنىڭ قىزىقىشىمىز راست».

    لى يەنخوڭ يەنە روسىيە كارخانىلىرىنىڭ جۇڭگو تور بازىرىغا بولغان قىزىقىشى كۈچىيىۋاتقانلىقىنى ئېيتقان. «بىز كۆپلىگەن روسىيە كارخانىلىرى بىلەن سۆھبەت ئېلىپ باردۇق، ئەمما تېخى كونكرېت تۈر ئۈستىدە كېلىشىم ھاسىل قىلمىدۇق».

بۇ قېتىملىق دۇنيا ئىنتېرنېت چوڭ يىغىنى ۋۇجىندا ئېچىلغان بولۇپ، 18-دېكابىرغىچە داۋاملىشىدىكەن.