گوۋۇيۈەن ئىشخانىسى جامائەت خەۋپسىزلىكى مىنىستىرلىقى، قاتناش-تىرانسپورت مىنىستىرلىقى ئارقىلىق «ماتورلۇق قاتناش ۋاسىتىلىرى شوپۇرلىرىنى تەربىيەلەش ئىمتىھان تۈزۈمى ئىسلاھاتىنى ئىلگىرى سۈرۈش ھەققىدىكى پىكىر»نى چىقاردى. پىكىردە مۇنۇلار ئوتتۇرىغا قويۇلدى: شوپۇر تەربىيەلەش ئىمتىھان تۈزۈمى ئىسلاھاتىنى ئىلگىرى سۈرۈشتە، بىخەتەرلىك بىرىنچى بولۇش، خەلققە قولايلىق يارىتىش، پايدىلىق بولۇش، ئاشكارا رىقابەتلىشىش، ئادىل، پاك بولۇش پىرىنسىپىدا چىڭ تۇرۇش كېرەك. 2016-يىلىنىڭ ئالدىنقى يېرىمىدا ئىسلاھات خىزمىتىنى ئورۇنلاشتۇرۇپ، مۇھىم ئىسلاھات ئىشلىرى سىنىقىنى باشلاش؛ 2017-يىلى ئىسلاھاتنى تېخىمۇ چوڭقۇر يولغا قويۇش؛ 2018-يىلى ئىسلاھاتنىڭ نۇقتىلىق خىزمەت ۋەزىپىسىنى ئورۇنلاپ، ئېچىۋېتىلگەن، تەرتىپلىك، ئادىل رىقابەتلىشىدىغان، مۇلازىمىتى ياخشى، باشقۇرۇشى قېلىپلاشقان شوپۇر تەربىيەلەش بازىرى سىستېمىسى، ئاشكارا، ئېنىق، ھوقۇق ۋە مەسئۇلىيىتى روشەن، يۈرۈشتۈرۈشى يۇقىرى ئۈنۈملۈك، ئادىل، پاك بولغان شوپۇرلۇق ئىمتىھانىنى باشقۇرۇش تۈزۈلمىسىنى ئاساسەن ئورنىتىپ، تەربىيەلەش ئىمتىھانىدىكى قولايسىزلىق، قېلىپسىزلىق، تېجەشلىك بولماسلىق قاتارلىق مەسىلىلەرنى ئاساسەن ھەل قىلىش لازىم. پىكىردە، ئالتە جەھەتتىكى 27 تۈرلۈك ئاساسلىق ۋەزىپە ئايدىڭلاشتۇرۇلدى. پىكىردە مۇنۇلار تەلەپ قىلىندى: ناھىيە دەرىجىلىكتىن يۇقىرى يەرلىك ھەر دەرىجىلىك خەلق ھۆكۈمەتلىرى شوپۇر تەربىيەلەش ئىمتىھان تۈزۈمى ئىسلاھاتىنى بىر مۇھىم خەلق تۇرمۇشى قۇرۇلۇشى قىلىپ، كونكرېت يولغا قويۇش لايىھەسىنى تۈزۈپ، ئەتراپلىق ئورۇنلاشتۇرۇشى ۋە يولغا قويۇشى كېرەك. ئالاقىدار تارماقلار فۇنكسىيەلىك ئىش تەقسىماتىغا ئاساسەن، يېقىندىن ماسلىشىپ، يۈرۈشلۈك سىياسەتلەرنى تۈزۈشى؛ ئىسلاھاتنى پۇختا، تەرتىپلىك ئىلگىرى سۈرۈپ، ئىز قوغلاپ باھالاش ۋە نازارەت قىلىش، تەكشۈرۈش، يېتەكلەشنى كۈچەيتىشى لازىم.