جىنلى شىركىتى بۈگۈن دوڭگۈەندىكى جىنلى سانائەت باغچىسىدا مەھسۇلات ئېلان قىلىش يىغىنى ئېچىپ، جىنلى M5 Plus ناملىق يېڭى يانفونىنى رەسمىي ئېلان قىلغان. بۇ يانفونغا 5020 مىللىئامپىرلىق باتارىيە سەپلەنگەن، بارماق ئىزىنى تونۇش ئىقتىدارى قوشۇلغان.

جىنلى ئىلگىرى 6020 مىللىئامپىرلىق باتارىيە ئىشلىتىلگەن M5 ناملىق يانفوننى بازارغا سالغان، بۇ قېتىم ئېلان قىلىنغان M5 Plus يانفونى دەل ئۇنىڭ دەرىجىسى ئاشۇرۇلغان نۇسخىسى ئىكەن، گەرچە باتارىيە سىغىمى كىچىكلىتىلگەن بولسىمۇ، ئەمما يانفون گەۋدىسى بۇرۇنقىدىن نېپىز ۋە يېنىك لايىھەلەنگەن، سەپلىمىسى ئاشۇرۇلغان.

     قاتتىق دېتال سەپلىمىسىگە كەلسەك، جىنلى M5 Plus يانفونىغا ئېنىقلىقى 1080*1920 گە يېتىدىغان 6.0 دىيۇملۇق ئېكران، لىيەنفاكې MT6753 تىپلىق سەككىز يادرولۇق بىر تەرەپ قىلغۇچ، 3GB لىق ئىچكى ساقلىغۇچ، 64GB لىق ئاساس ساقلىغۇچ قاتارلىقلار سەپلەنگەن، قوش 4G كارتىسىنى تەڭ ئىشلىتىشكە بولىدىكەن. يۇقاردا دېيىلگەندەك، بۇ يانفونغا 5020 مىللىئامپىرلىق چوڭ سىغىملىق باتارىيە ئىشلىتىلگەن، قوش ئۆزەكچىلىك تېز سۈرئەتتە زەرەتلەش تېخنىكىسى قوللىنىلغان بولۇپ، توكى ئۈچ كېچە-كۈندۈز ئىشلىتىشكە يېتىدىكەن. ئاساس كامېراسىنىڭ ئېنىقلىقى 13 مىليون پىكسېل بولۇپ، بارماق ئىزىنى تونۇش رايونى يانفوننىڭ ئالدى يۈزىگە جايلاشقان، يەنە بىر ئالاھىدىلىكى، ھازىرقى ئاساسىي ئېقىمغا ۋەكىللىك قىلىدىغان ئوڭ-تەتۈرىنى ئوخشاشلا چاتقىلى بولىدىغان Type-C ئېغىزى سەپلەنگەن. مەشغۇلات سىستېمىسى جەھەتتە، بۇ يانفونغا ئاندىرويىد 5.1 ئاساسىدا ئېچىلغان amigoOS 3.1 ناملىق سىستېما قاچىلانغان ئىكەن.

     سېتىلىش باھاسىغا كەلسەك، جىنلى M5 Plus يانفونىنىڭ باھاسى 2499 يۈەن بولۇپ، مەھسۇلات ئېلان قىلىش يىغىنىدا، جىنلى يەنە «M5 چاڭشىياڭ» يانفونىنىمۇ بىللە ئېلان قىلغان، ئۇنىڭ باھاسى 1999 يۈەن ئىكەن، 12-ئاينىڭ 25-كۈنى رەسمىي بازارغا سېلىنىدىكەن. ئىستېمالچىلار M5 Plus يانفونىنى جىنلى ئورگان تەرەپ سودا شەھەرچىسى ۋە مەملىكەتنىڭ ھەر قايسى جايلىرىدىكى سېتىش نۇقتىلىرىدىن سېتىۋالسا بولىدىكەن.