ئىراق شىمالىي ئاتلانتىك ئەھدى تەشكىلاتىدىن تۈركىيەگە ئىراقتىكى قىسىملىرىنى چېكىندۈرۈپ چىقىش توغرىسىدا بېسىم ئىشلىتىشىنى ئۆتۈندى، رۇسىيەنىڭ تىرىشچانلىقى ئىراقنىڭ رەھمىتىگە ئېرىشەلمىدى.ئىراق زۇڭلىسى ھەيدەر ئابادى 8-دېكابىر شىمالىي ئاتلانتىك ئەھدى تەشكىلاتىنىڭ باش كاتىپى يانس ستولتېنبېرگقا تېلېفون بېرىپ، ئۇنىڭدىن تۈركىيەگە ئىراقتىكى قىسىملىرىنى چېكىندۈرۈپ چىقىش توغرىسىدا بېسىم ئىشلىتىشىنى ئۆتۈندى.رۇسىيە شۇ كۈنى بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ يېپىق كېڭىشىنى چاقىرىپ، تۈركىيەنى يەنە قاراملىق قىلماسلىققا دەۋەت قىلدى.ئابادى ستولتېنبېرگقا مۇنداق دېدى: شىمالىي ئاتلانتىك ئەھدى تەشكىلاتىنىڭ ئەزاسى تۈركىيە ئىراق ھۆكۈمىتىنىڭ تەكلىپى ياكى بەرگەن ھوقۇقىغا ئېرىشمەي تۇرۇپ، ئۆز ئالدىغا چېگرا ئاتلاپ ئەسكەر ئەۋەتىپ، «ئىسلام دۆلىتى» ئەسەبىي تەشكىلاتى ئىگەللىۋالغان موسۇل شەھىرىگە يېقىن ئەتراپتا ئورۇنلاشتۇرۇپ، ئىراقنىڭ ئىگىلىك ھوقۇقىغا تاجاۋۇز قىلدى.ئابادى بىر باياناتتا: شىمالىي ئاتلانتىك ئەھدى تەشكىلاتى نوپۇزىنى ئىشقا سېلىپ، تۈركىيەنى ئىراقتىن دەرھال قوشۇن چېكىندۈرۈشكە دەۋەت قىلىشى كېرەك، دېدى.ئىراق تېلېۋىزىيەسىدە شۇ كۈنى مۇنداق خەۋەر بېرىلدى: ئىراق شۇ كۈنى كەچتە بىرقانچە ھەربىي ئايروپىلاننى ئىشقا سېلىپ، تۈركىيە قىسمى جايلاشقان جايلارنى رازۋېدكا قىلدى.تۈركىيە ھەربىي خادىملىرى دېكابىرنىڭ باشلىرىدا ئىراققا كىرگەن، تۈركىيە بۇنى چېنىققۇچىلارنىڭ قەرەللىك پوست ئالمىشىشى، مەقسەت ئىراقنىڭ «ئىسلام دۆلىتى»گە زەربە بېرىپ، موسۇلنى قايتۇرۇۋېلىشىغا ياردەم بېرىش، دېگەن. ئىراق ھۆكۈمىتى 6-دېكابىر مۇنداق دېدى: تۈركىيە ئىراقنىڭ ئىگىلىك ھوقۇقىغا ئېغىر تاجاۋۇز قىلدى، تۈركىيەدىن 48 سائەت ئىچىدە ئەسكەر چېكىندۈرۈشنى تەلەپ قىلىمىز، بولمىسا بىرلەشكەن دۆلەتلەر تەشكىلاتى خەۋپسىزلىك كېڭىشىگە ئەرز سۇنۇشنى ئۆز ئىچىگە ئالغان ھەرىكەت قوللىنىمىز.ئېنىقكى، ئىراقنىڭ ئۇلتىماتۇمى نەتىجىسىز قالدى. تۈركىيە 350 ھەربىدىن تەشكىل تاپقان ئىككىنچى تۈركۈمدىكى قىسىمنىڭ چېگرىدىن ئۆتۈپ موسۇلغا كىرىشىنى ۋاقتىنچە توختاتتى، ئەمما كىرىپ ئورۇنلىشىپ بولغان قىسىملىرىنى چېكىندۈرمىدى.تۈركىيە قىسمىنىڭ ئىراققا كىرگەنلىكى توغرىسىدا، رۇسىيەنىڭ بىرلەشكەن دۆلەتلەر تەشكىلاتىدىكى دائىمىي ۋەكىلى ۋىتالى چۇركىن بىرلەشكەن دۆلەتلەر تەشكىلاتى خەۋپسىزلىك كېڭىشىنى چاقىرىپ، يېپىق يىغىن ئاچتى.چۇركىن مۇنداق دېدى: بىز بىرلەشكەن دۆلەتلەر تەشكىلاتىنىڭ باش كاتىپى بان كىمون ۋە خەۋپسىزلىك كېڭىشىدىكى باشقا ئەزا دۆلەتلەرنىڭ دىققىتىنىڭ بېشى قىززىپ قالغان تۈركىيەنى سەگىتىپ قويۇشىنى، ئۇلارنىڭ بۇ مەسىلىنى ئىراق ھۆكۈمىتى رازى بولىدىغان ئۇسۇلدا ھەل قىلىشىنى ئۈمىد قىلىمىز.چۇركىننىڭ ئېيتىشىغا قارىغاندا، تۈركىيەنىڭ ئىراققا ئەسكەر ئەۋەتىشى ئامېرىكا ئۈچۈنمۇ تاسادىپىلىق ئىكەن، بۇ تۈركىيەنىڭ ئويلىمىغان ئىشلارنى قىلىدىغانلىقىنى كۆرسىتىدىكەن، بۇ ھەرىكەت ئىراقلىقلارنىڭ قارشىلىقىغا ئۇچراپلا قالماي، ئامېرىكىنىمۇ تەڭلىكتە قالدۇرغان.ئۇ تۈركىيەنى سۈرىيەنى ئۆز ئىچىگە ئالغان ھەرقانداق جايدا يەنە قاراملىق قىلماسلىققا دەۋەت قىلدى.ئەمما رۇسىيەنىڭ ئالدىراقسانلىقى كۆڭۈلدىكىدەك ئۈنۈمگە ئېرىشەلمىدى، ھەتتا ئىراقمۇ بۇنىڭغا رەھمەت ئېيتمىدى.ئىراقنىڭ بىرلەشكەن دۆلەتلەر تەشكىلاتىدىكى دائىمىي ۋەكىلى مۇھەممەد ئەلى ھاكىم شۇ كۈنى تاراتقۇلارغا مۇنداق دېدى: بىز ئۈچۈن ئەسقاتىدىغىنى ئىراق بىلەن تۈركىيەنىڭ ئىككى تەرەپلىك سۆزلىشىشى، بۇ سۆزلىشىش ھازىر ناھايىتى ئوڭۇشلۇق بولۇۋاتىدۇ.ئۇنىڭ سۆزىچە، رۇسىيە بىرلەشكەن دۆلەتلەر تەشكىلاتى خەۋپسىزلىك كېڭىشىنى چاقىرىپ تۈركىيەنىڭ ئىراققا ئەسكەر ئەۋەتكەنلىكىنى مۇزاكىرە قىلىشتىن بۇرۇن، ئىراقنىڭ پىكرىنى ئالمىغان.رۇتېر ئاگېنتلىغى باھا بېرىپ، رۇسىيەنىڭ بۇنچە ئاكتىپ بولۇشى 24-نويابىر تۈركىيەنىڭ رۇسىيە ھەربىي ئايروپىلانىنى ئېتىپ چۈشۈرگەنلىكى بىلەن زىچ مۇناسىۋەتلىك، رۇسىيە تۈركىيەگە بېسىم ئىشلىتىدىغان پۇرسەتلەرنى ئىزدىمەكتە، دېدى.تۈركىيە زۇڭلىسى ئەھمەد داۋۇتئوغلى مۇنداق دېدى: تۈركىيە رۇسىيە بىلەن سۆزلىشىشكە تەييارلىنىپ بولدى، ئەمما ھەرقانداق نەرسىنى بىزگە تېڭىشقا مەڭگۈ يول قويمايمىز. ئۇ يەنە مۇنداق دېدى: رۇسىيە جازا تەدبىرى قوللانغان ئەھۋالدا، زۆرۈر بولسا، بىزمۇ جازا قوللىنىمىز.