ئىران پارىس تېلېۋىزىيە ئاخبارات تورىنىڭ 12- ئاينىڭ 7- كۈنىدىكى خەۋىرىگە قارىغاندا، ئىراننىڭ غەربىي-شىمالىي قىسىمىدىكى ئىككى ئۆلكىدە H1N1 تارقىلىشچان زۇكىمى ( يەنى چوشقا زۇكىمى ) تارقىلىپ كەتكەن، ئۆتكەنكى ئۈچ ھەپتە ئىچىدە جەمئىي 33 كىشى مۇشۇ خىل يۇقۇملۇق زۇكام بىلەن يۇقۇملىنىپ قازا قىلغان، يۇقۇم ئەھۋالى ھەتتا تېھرانغىچە كېڭىيىپ كېتىشى مۇمكىنكەن.

ئىران سەھىيە مىنىستىرلىكىنىڭ مىنىستىرى سايالى مۇنداق دېگەن: كېرمان ئۆلكىسىدە جەمئىي 28 ئادەم چوشقا زۇكىمى بىلەن يۇقىملىنىپ قازا قىلدى، ئۇلارنىڭ ئىچىدە يەنە تۆت نەپەر ھامىلدار ئايال بار. كېرمان ئۆلكىلىك تىببى ئۇنىۋېرسىتېت مەسئۇلىنىڭ بىلدۈرۈشىچە، ئۈچ ھەپتە ئىلگىرى H1N1 تارقىلىشچان زۇكام ۋىرۇسى بايقالغاندىن بۇيان ئۇلار باشلامچىلىق بىلەن يۇقۇم ئەھۋالىنى ۋاقتىدا دوكلات قىلغان، ھازىرغا قەدەر 600 كىشى دوختۇرخانىغا كىرىپ داۋالانغان.

7- دېكابردىن باشلاپ كېرمان ئۆلكىسىدىكى مەكتەپلەر ئىككى كۈن دەرس توختاتقان، يۇقۇم ئەھۋالىنىڭ يەنىمۇ يامراپ كېتىشىنىڭ ئالدىنى ئېلىش ئۈچۈن، سەھىيە مىنىستىرلىكى مۇتەخەسسىسلەرنى كېرمان ئۆلكىسىگە بېرىپ تەكشۈرۈش ئېلىپ بېرىشقا ئەۋەتكەن.

A تىپلىق H1N1 يۇقۇملۇق زۇكىمى چوشقا زۇكىمىنىڭ ئاساسلىق تۈرى بولۇپ، كېسەللىك ئالامىتى ئادەتتىكى يۇقۇملۇق زۇكامغا ئوخشاپ كېتىدۇ. 2009- يىلى ئامېرىكا بىلەن مىكسىكىدا A تىپلىق H1N1 يۇقۇملۇق زۇكىمى بايقالغاندىن كېيىن، يۇقۇم ئەھۋالى تېز سۈرئەتتە كېڭەيدى، دۇنيا سەھىيە تەشكىلاتى بۇ يىل 6- ئايدا ئېلان قىلغان يۇقۇم ئەھۋالى دوكلاتىغا ئاساسلانغاندا، 2010- يىلى 8- ئايغا قەدەر جەمئىي 214 دۆلەتتە بۇ خىل يۇقۇملۇق كېسەل كۆرۈلۈپ، 185 مىڭ ئادەم ھاياتىدىن ئايرىلغان.