بۈگۈن چۈشتىن بۇرۇن، جۇڭگو بىرلەشمە خەۋەرلىشىش شىركىتى بېيجىڭدا «ۋو 4G+» ئاخبارات ئېلان قىلىش يىغىنىنى ئاچقان. جۇڭگو بىرلەشمە خەۋەرلىشىش گوروھىنىڭ باش مۇدىرى ۋاڭ شىياۋچۇ يىغىندا سۆز قىلىپ، بۇ قېتىملىق تور سۈرئىتىنى يېڭىلاش خىزمىتىنىڭ مۇھىم نۇقتىسى 4G تور سىگنالى بىلەن قاپلىنىشنى تېخىمۇ مۇكەممەللەشتۈرۈش، تور سۈرئىتىنى ھەسسىلەپ ئاشۇرۇش ۋە تېلېفوندا سۆزلەشكەندىكى ئاۋاز سۈپىتىنى تېخىمۇ ئەلالاشتۇرۇشتىن ئىبارەت ئۈچ چوڭ نۇقتىغا مەركەزلىشىدىغانلىقى، بۇ ئارقىلىق خەۋەرلىشىش مۇلازىمىتى ساھەسىدە ئالدىنقى قاتاردا تۇرىدىغان يۇقىرى سۈپەتلىك 4G تورىنى بەرپا قىلىدىغانلىقىنى ئوتتۇرىغا قويغان.

ۋاڭ شىياۋچۇنىڭ دېيىشىچە، «ۋو 4G+» لايىھەسىنىڭ ئېلان قىلىنغانلىقى جۇڭگو بىرلەشمە خەۋەرلىشىش شىركىتىنىڭ ئوموميۈزلۈك ھالدا 4G تورىنى قۇرۇش، 4G تورى دەرىجىسىنى ئومۇميۈزلۈك يېڭىلاش، مۇلازىمەت سۈپىتىنى ئوموميۈزلۈك ياخشىلاش، يېڭى كەسپ، يېڭى مەھسۇلات ئوتتۇرىغا چىقىرىشنى ئومۇميۈزلۈك ئىلگىرى سۈرۈش ۋە كەڭ ئابونتلارنىڭ خەۋەرلىشىش مۇلازىمىتىگە بولغان ھەر قاتلاملىق ئېھتىياجىنى ئومۇميۈزلۈك قاندۇرۇش شۇنداقلا خەۋەرلىشىش كەسپىنىڭ گۈللىنىشى ۋە تەرەققىياتىنى ئورتاق ئىلگىرى سۈرۈش خىزمىتىنى رەسمىي تۈردە باشلىغانلىقىنى چۈشەندۈرۈپ بېرىدىكەن.

ئىگەللىنىشىچە، جۇڭگو بىرلەشمە خەۋەرلىشىش 4G+ تورىنىڭ چۈشۈرۈش سۈرئىتى ئەڭ يۇقىرى بولغاندا 300Mbps دىن ئېشىپ كېتىدىكەن، يوللاش سۈرئىتى 75Mbps دىن ئاشىدىكەن. كۆپ توشۇغۇچى دولقۇننى بىرلەشتۈرۈش تېخنىكىسىنىڭ ئوتتۇرىغا چىقىشىغا ئەگىشىپ، تور سۈرئىتى كەلگۈسىدە پەيدىنپەي يۇقىرى كۆتۈرۈلۈپ، يۇقىرى بولغاندا 1Gbps گە يەتكۈزۈلىدىكەن. 300Mbps لىق تور سۈرئىتىنىڭ ئىشقا كىرىشتۈرۈلگەنلىكى ئابونتلار ئۈچۈن ئېيتقاندا، ھەقىقىي مەنىدىكى سۈزۈكلۈك دەرىجىسى يۇقىرى فىلىملەرنى يانفونىدا بىمالال كۆرەلەيدىغان يېڭى بىر كۆچمە تور دەۋرىنىڭ يېتىپ كەلگەنلىكىدىن دېرەك بېرىدىكەن. ئىگەللىنىشىچە، بۇ خىل تور سۈرئىتىدە، چوڭلۇقى 2GB بولغان بىر كىنونى چۈشۈرۈش ئۈچۈن پەقەت بىر مىنۇت ۋاقىت كېتىدىكەن، 10MB لىق ھۆججەتنى يوللاش ئۈچۈن بىر سېكونت ۋاقىت كېتىدىكەن.

جۇڭگو بىرلەشمە خەۋەرلىشىش شىركىتى يەنە 2015-يىلىنىڭ ئاخىرىدا بارلىق ئابونتلارغا قارىتا ئاۋاز ئېنىقلىق دەرىجىسى يۇقىرى بولغان سۆزلىشىش ئىقتىدارىنى رەسمىي ئىشقا كىرىشتۈرىدىكەن. ۋاقتى كەلگەندە، جۇڭگو بىرلەشمە خەۋەرلىشىش ئابونتلىرىنىڭ تېلېفوندا سۆزلەشكەندىكى ئاۋاز سۈپىتى ۋە ئېنىقلىق دەرىجىسى زور دەرىجىدە ياخشىلىنىدىكەن.