شىنجاڭ گېزىتى تورى خەۋىرى: ياغىمەن دېگەن يامغۇر ھەپتە ئاخىرىدا گېپىدىن يېنىۋالدى، بىراق يۇقىرى تېمپېراتۇرا ئۈن-تىنسىز كەلدى. شىنجاڭ ئۇيغۇر ئاپتونوم رايونلۇق مېتېئورولوگىيە ئىستانسىسى ئېلان قىلغان ئۈچ كۈنلۈك ھاۋارايىدىن ئالدىن مەلۇمات جەدۋىلىدىن مەلۇم بولۇشىچە، بۈگۈن (14-ئىيۇل) كۈندۈزدىن 16-ئىيۇلغىچە پۈتۈن شىنجاڭدا تېمپېراتۇرا كۆرۈنەرلىك ئۆرلەيدىكەن، ئىلى دەريا ۋادىسى، شىمالىي شىنجاڭنىڭ تەڭرىتاغ ئەتراپلىرىدىكى قىسمەن جايلاردا ℃35تىن يۇقىرى تېمپېراتۇرا كۆرۈلىدىكەن، ئەڭ يۇقىرى تېمپېراتۇرا جەنۇبىي شىنجاڭ ۋە شەرقىي شىنجاڭنىڭ كۆپ قىسىم جايلىرىدا ℃37تىن، تۇرپان-پىچان-توقسۇن ئويمانلىقى، خوتەن، بايىنغۇلىن موڭغۇل ئاپتونوم ئوبلاستىنىڭ جەنۇبى قاتارلىق جايلاردا ℃40تىن ئېشىپ كېتىدىكەن.
شىنجاڭ مېتېئورولوگىيە ئىستانسىسى ۋە ئۈرۈمچى مېتېئورولوگىيە ئىستانسىسى بۈگۈن (14-ئىيۇل) يۇقىرى تېمپېراتۇرىدىن مۇدپىئەلىنىش سېرىق رەڭلىك ئاگاھلاندۇرۇش سىگنالى تارقىتىپ، جايلاردىكى ئاممىنى ئىسسىق ئۆتۈپ كېتىشتىن ساقلىنىش خىزمىتىنى ياخشى ئىشلەشنى ئەسكەرتكەن.
كەلگۈسى 24 سائەتتە شىنجاڭدىكى كۆپ قىسىم يايلاق ۋە ئورمانلىقلاردا ئوت خەۋپى دەرىجىسى بىر قەدەر يۇقىرى بولۇپ، 3-دەرىجە بولىدىكەن.
شىنجاڭ ئۇيغۇر ئاپتونوم رايونلۇق مېتېئورولوگىيە ئىستانسىسى كەلگۈسى ئۈچ كۈندە پۈتۈن شىنجاڭدا تېمپېراتۇرا يۇقىرى، يايلاق ۋە ئورمانلىقلارنىڭ ئوت خەۋپى دەرىجىسى يۇقىرى بولغاچقا ئاھالىلەرنى ئوت ئاپىتىدىن مۇداپىئەلىنىشكە ئەسكەرتكەن؛ جەنۇبىي شىنجاڭنىڭ غەربىدە تېمپېراتۇرا يۇقىرى بولغاچقا ئەگىز كەلكۈنى كېلىش مۇمكىنچىلىكى بىر قەدەر چوڭ بولۇپ، ئالدىنى ئېلىش زۆرۈر ئىكەن؛ شىنجاڭنىڭ كۆپ قىسىم جايلىرىدا ھاۋا ئوچۇق، ئىسسىق، ئۇلترا بىنەپشە نۇر كۈچلۈك بولۇپ، سىرتلاردىكى ئوچۇقچىلىقتا ئۇزاق پائالىيەتتە بولىدىغانلار ئۇلترا بىنەپشە نۇردىن مۇداپىئەلىنىشى، ئىسسىق ئۆتۈپ قېلىشنىڭ ئالدىنى ئېلىشى كېرەككەن.
ئۈرۈمچى شەھەرلىك مېتېئورولوگىيە ئىستانسىسىنىڭ ئېيتىشىچە، بۈگۈن(14-ئىيۇل)دىن 16-ئىيۇلغىچە ئەڭ يۇقىرى تېمپېراتۇرا شەھەر شىمالى ۋە مىچۈەن-كۆكتاغ رايونىدا 35℃~38℃قىچە بولىدىكەن، داۋانچىڭ ۋە شەھەر جەنۇبىدا 32℃~ 36℃بولىدىكەن.