ھازىر كىشىلەردە بەدەن ئېغىرلىقى ئېشىپ كېتىش ۋە سېمىزلىك كېسىلىگە گىرىپتار بولۇش نىسبىتى كۈنسېرى ئۆرلەۋاتىدۇ.
ئاپتونوم رايونلۇق خەلق دوختۇرخانىسىدىن ئۇقۇشىمچە، ھازىر مەملىكىتىمىزدە بەدەن ئېغىرلىقى ئېشىپ كەتكەنلەر 200 مىليونغا، سېمىزلىك كېسىلىگە گىرىپتار بولغانلار 90 مىليونغا يېتىدىكەن. بەدەن ئېغىرلىقى ئېشىپ كېتىش ۋە سېمىزلىك كەلتۈرۈپ چىقارغان قەنت كېسىلى، يۇقىرى قان بېسىمى كېسىلى بارغانسېرى كۆپىيىپ، كىشىلەرنىڭ ساغلاملىقى ۋە ھاياتىغا خەۋپ ئېلىپ كېلىۋېتىپتۇ.
ئاپتونوم رايونلۇق خەلق دوختۇرخانىسىنىڭ مۇئاۋىن باشلىقى كېرەم ئابدۇرېھىم بۇ ھەقتە توختىلىپ مۇنداق دېدى: ھازىر كىشىلەرنىڭ بەدەن ئېغىرلىقى ئارتىپ كېتىش ۋە سېمىزلىك كېسىلىگە گىرىپتار بولۇش نىسبىتى داۋاملىق ئېشىۋاتىدۇ، بۇ كېسەللىك دۇنيادىكى ئىنسان ھاياتىغا تەھدىت سېلىۋاتقان ئۈچ چوڭ كېسەللىكنىڭ بىرىگە ئايلىنىپ قالدى. سېمىزلىك كېسىلى ئاساسەن بىنورمال غىزالىنىش، مۇۋاپىق چېنىقىشقا ئەھمىيەت بەرمەسلىكتىن كېلىپ چىقىدۇ. بەزى كىشىلەر زىيادە غىزالىنىپ، ئاز ھەرىكەت قىلغانلىقتىن ئاسانلا سېمىزلىك كېسىلىگە گىرىپتار بولۇپ قالىدۇ. بۇ كېسەللىك ھازىر بالىلاردىمۇ كۆپلەپ كۆرۈلۈۋاتىدۇ. شۇڭا سېمىزلىك كېسىلىنىڭ ئالدىنى ئېلىش ئۈچۈن چوقۇم نورمال غىزالىنىش، مۇۋاپىق چېنىقىش، بەدەن ئېغىرلىقىدا ئۆزگىرىش بولغاندا چوقۇم دوختۇرخانىغا بېرىپ ۋاقتىدا تەكشۈرتۈش لازىم.