ئاگېنتلىقى ، يوھاننېسبۇرگ ، 24-دېكابىر تېلېگراممىسى : دۇنيا سەھىيە تەشكىلاتى 24-دېكابىر ئېلان قىلغان ئەڭ يېڭى سانلىق مەلۇماتلاردىن قارىغاندا ، بۇ يىلنىڭ ئالدىنقى يېرىمىدا غەربىي ئافرىقا دۆلەتلىرىدە يامرىغان ئېبولا ۋىرۇسىدا ھازىرغا قەدەر پۈتۈن دۇنيا بويىچە جەمئىي 19 مىڭ 497 ئادەم يۇقۇملانغان بولۇپ ، ئارىدىن 7588 ئادەم ھاياتىدىن ئايرىلغان . ب د ت نىڭ ئالاقىدار مەسئۇلى روژدېتسۋا ۋە يېڭى يىل بايراملىرىدا يۇقۇم رايونىدىكى كىشىلەرنى ئۇرۇق-تۇغقانلىرى ، دوست-بۇرادەرلىرى بىلەن يىغىلىش قىلغاندا ئالاھىدە دىققەت قىلىشقا ئەسكەرتتى .

ئىگىلىنىشىچە ، ئېبولا ۋىرۇسى بۇ يىل فېۋرالدا ئەڭ ئالدى بىلەن كېنىيەدە بايقىلىپ ، ئارقىدىن قوشنا دۆلەت سېررالېئون ۋە لىبىرىيەگە تارقالغان ، بۇ ئۈچ دۆلەت ھازىرغا قەدەر ئېبولا ئاپىتى ئەڭ ئېغىر يۈز بەرگەن رايون بولۇپ قالغان . سانلىق مەلۇماتلارغا قارىغاندا ، ھازىرغا قەدەر سېررالېئوندا بۇ ۋىرۇس بىلەن يۇقۇملانغانلار ئەڭ كۆپ بولۇپ ، جەمئىي 9004 ئادەم يۇقۇملىنىپ ، ئارىدىن 2582 ئادەم قازا قىلغان . بىراق ، بۇ ۋىرۇس بىلەن قازا قىلغانلار ئەڭ كۆپ دۆلەت لىبىرىيە بولۇپ ، 7862 ئادەم يۇقۇملىنىپ ، ئارىدىن 3384 ئادەم قازا قىلغان . كېنىيەدە بۇ ۋىرۇس بىلەن يۇقۇملانغانلار ۋە قازا قىلغانلارنىڭ سانى يۇقىرقى ئىككى دۆلەتكە قارىغاندا سەل ئاز بولۇپ ، 2597 ئادەم يۇقۇملىنىپ ، ئارىدىن 1607 ئادەم قازا قىلغان .

يۇقىرىقى ئۈچ دۆلەتتىن باشقا ، نىگېرىيەدە 20 ئادەم ئېبولا ۋىرۇسى بىلەن يۇقۇملىنىپ ، ئارىدىن سەككىز ئادەم ھاياتىدىن ئايرىلغان ، مالىدا سەككىز ئادەم يۇقۇملىنىپ ، ئارىدىن ئالتە ئادەم ھاياتىدىن ئايرىلغان ، ئامېرىكىدا تۆت ئادەم يۇقۇملىنىپ ، ئارىدىن بىر ئادەم قازا قىلغان ، سېنېگالدا بىر ئادەم يۇقۇملانغان ، ئىسپانىيەدە بىر ئادەم يۇقۇملانغان ، بىراق ، بۇ ئىككى دۆلەتتىكى يۇقۇملانغۇچىلارنىڭ ھاياتىغا خەۋپ يەتمىگەن.

24-دېكابىر ب د ت باش كاتىپىنىڭ لىبىرىيە ئىشلىرى بويىچە ئالاھىدە ۋەكىلى Landgren كۆرسىتىپ : ‹‹ بۇ يىل ئۆكتەبىردىن بۇيان لىبىرىيە ئېبولا ۋىرۇسىغا زەربە بېرىش كۈرىشىدە كۆپ ئىلگىرىلەشلەرنى قولغا كەلتۈردى ، لىبىرىيە ئاممىسى بۇنىڭدىن پەخىرلەنسە بولىدۇ ›› دېگەن .