تۇرمۇش رىتىمىمىزنىڭ تېزلىشىشى بىلەن تور سودىسى راۋاجلىنىپ، تۇرمۇشىمىزغا تېخىمۇ چوڭقۇر سىڭىپ كىردى. شەھەر ئاھالىلىرى، بولۇپمۇ ياشلار خىزمەت، تۇرمۇش ھەلەكچىلىكىدە جىددىيلىشىۋاتقان شارائىتتا، تور سودىسى ۋاقىت چەكلىمىسى بولماسلىقتەك ئالاھىدىلىكى بىلەن ئۇلارغا ‹‹ياغدەك ياقتى››. لېكىن بىر قىسىم تور سودىگەرلىرى كىشىلەرنىڭ توردا مال سېتىۋېلىش جەھەتتىكى ئاجىزلىقلىرىدىن پايدىلىنىپ، ئۇلارنى قاقتى – سوقتى قىلىۋاتىدۇ.
ئالىيە خانىم ‹‹تاۋباۋ››دىن ئاياغ سېتىۋالغان. ئۇ ئاياغنىڭ سۈپىتىنىڭ ئانچە ياخشى ئەمەسلىكىنى كۆرۈپ، دۇكان ئىگىسى بىلەن ئالاقىلىشىپ، پۇلنى قايتۇرۇۋېلىشقا كېلىشكەن. دۇكان ئىگىسىنىڭ تەلىپى بويىچە QQدا ئۆزىنىڭ ئۇچۇرى ۋە بانكا كارتىسىنىڭ ئۇچۇرىنى ئەۋەتكەن. نەتىجىدە ئالدىنىپ، نەچچە مىڭ يۈەن زىيان تارتقان.
جۇڭگو يېزا ئىگىلىك بانكىسى شىنجاڭ تارماق بانكىسىدىكى مەسئۇل خادىم مۇنداق دېدى: ھازىر تور سودىسىدا ئالدامچىلىق دېلولىرى كۆپ يۈز بېرىۋاتىدۇ. بۇنىڭدا كۆپىنچە دۇكان ئىگىلىرى مال سېتىۋالغۇچىلارنىڭ ئۇچۇرىنى ئاشكارىلاپ قويۇش يوچۇقىدىن پايدىلىنىپ، ‹‹كارتىسىز ھەق تاپشۇرۇش››تىكى تېز سۈرئەتتە ھەق تاپشۇرۇش شەكلى ئارقىلىق توردا مال سېتىۋالغۇچىلارنى زىيانغا ئۇچرىتىۋاتىدۇ. شۇڭا ئاھالىلەر توردىن مال سېتىۋالغاندا سەگەك بولۇپ، ئۆزىنىڭ كارتا نومۇرى، مەخپىي نومۇر ۋە ھەق تاپشۇرۇش مەخپىي نومۇرىنى قوغداشقا ئەھمىيەت بېرىشى، ‹‹تاۋباۋ›› مۇلازىمىتىدىكى ناتونۇش نومۇردىن كەلگەن ھەر قانداق ئۇچۇرغا ئالدانماسلىقى كېرەك.
بىر تونۇشۇم ئىناۋەت كارتىسى توغرىسىدا سۆزلەپ مۇنداق دېدى: بىر كۈنى ئۆيدە تاماق ئېتىۋاتسام تېلېفون كەلدى، ئالسام قارشى تەرەپ ئۆزىنىڭ بانكا مۇلازىمەت خادىمى ئىكەنلىكىنى، ئىناۋەت كارتامنىڭ قىممەت دەرىجىسىنى ئۆستۈرىدىغانلىقىنى ئېيتتى. ئۆزۈمچە قىممەت دەرىجىسى ئۆسسە، سودا ئىشلىرىمغا قولاي بولىدۇغۇ دەپ ئويلاپ، قارشى تەرەپكە ئۇدا تۆت كۈن ئىسپاتلاش نومۇرىنى ئەۋەتىپ بېرىپتىمەن، ئەمەلىيەتتە ئۇلار ئالدامچىلاركەن، 20 مىڭ يۈەنگە يېقىن پۇلۇمنى ئالداپ ئېلىۋالدى.
ئىگىلىشىمچە، ئىناۋەت كارتىسىنىڭ ئۇزاق مەزگىللىك قىممەت دەرىجىسىنى ئۆستۈرۈشتە، ئادەتتە كارتىنىڭ قىممەت دەرىجىسىنى ئۆستۈرۈش سالاھىيتىنى ھازىرلىغان كارتا ئىگىسىگە بانكا ئۇچۇر ئەۋەتىدىكەن، كارتىنىڭ قىممەت دەرىجىسىنى ئۆستۈرۈش – ئۆستۈرمەسلىكنى كارتا ئىگىسى ئۆزى بەلگىلەيدىكەن.
جۇڭگو يېزا ئىگىلىك بانكىسى شىنجاڭ تارماق بانكىسىدىكى مەسئۇل خادىم بۇ ھەقتە مۇنداق دېدى: ھازىر ئىناۋەت كارتىسىدىن ئۈنۈملۈك پايدىلىنىۋاتقانلار كۆپ، ئالدامچىلار تەرىپىدىن زىيانغا ئۇچراۋاتقانلارمۇ ئاز ئەمەس. يەنى بىر قىسىم ئالدامچىلار بانكا مۇلازىمەت خادىمىنىڭ سىياقىغا كىرىۋېلىپ، كارتىنىڭ قىممەت دەرىجىسىنى ئۆستۈرۈش باھانىسى بىلەن كارتا ئىگىسىنىڭ ئۇچۇرىنى ئىگىلىۋېلىپ، ئۇلارنىڭ پۇللىرىنى ئېلىۋېلىۋاتىدۇ. بۇنداق ئەھۋال ياشلار ئارىسىدا كۆپرەك يۈز بېرىۋاتىدۇ. شۇڭا شەھەر ئاھالىلىرى ئىناۋەت كارتىسىنىڭ قىممەت دەرىجىسىنى ئۆستۈرۈش رەسمىيىتىنى چوقۇم پوكەيگە بېرىپ بېجىرىشى، كىملىك نومۇرى، بانكا كارتا نومۇرى، مەخپىي نومۇر ھەم ئىسپاتلاش نومۇرىنى خالىغانچە ئاشكارىلىماسلىقى كېرەك. بولۇپمۇ ئىسپاتلاش نومۇرى كارتىدىكى پۇلنىڭ بىخەتەرلىكىگە كاپالەتلىك قىلىشتىكى بىرىنچى ئۆتكەل ھېسابلىنىدۇ. ئەگەر يۇقىرىقىدەك مەسىلىلەرگە يولۇقسا، بانكىنىڭ ئىناۋەت كارتا مۇلازىمىتىدىن مەسلىھەت سورىسا بولىدۇ.
ھازىر نۇرغۇن كىشى ئىناۋەت كارتىسى بېجىرىپ، ئۇنىڭدىن سودا ئىشلىرىدا بولسۇن ۋە ياكى تۇرمۇشىدا بولسۇن مۇۋاپىق، ئۈنۈملۈك پايدىلىنىۋاتىدۇ. لېكىن بەزىلەر كارتا ئارقىلىق ئىستېمال قىلغاندا، پوكەيدىكى مۇلازىمنىڭ كارتىدىن قانچىلىك ھەق ئېلىۋاتقانلىقى بىلەن كارى بولماسلىق، كارتىنى باشقىلارغا بېرىپ ھەق تاپشۇرۇشقا ھاۋالە قىلىش، دېگەندەك بىخۇدلۇق قىلىش سەۋەبلىك زور زىيانلارغىمۇ ئۇچراۋاتىدۇ. شۇڭا كارتا ئىشلەتكەندە ئەستايىدىل بولۇش، ئالدامچىلارنىڭ مەقسىتىگە يېتىشىگە يوچۇق ئېچىپ بەرمەسلىك كېرەك.