جاھان ئاگېنتلىقى 12-ماي خەۋىرى؛ لەگلەك تورى تەرجىمىسى: يەمەندە بەش كۈنلۈك ئۇرۇش توختىتىش باشلىنىشىغا ئاز قالغاندا سەئۇدى ئەرەبىستان-يەمەن چېگرىسىدا ۋەزىيەت كەسكىنلەشتى. ھۇسىيلەر چېگرادا راكىتا ھۇجۇمى قوزغىغان بولۇپ بىرلەشمە ئارمىيە قىسىملىرى قارشىلىق بىلدۈردى. رىياد ھۆكۈمىتى يەمەن چېگراسىغا «زور ياردەمچى قوشۇن» ئەۋەتتى. سەئۇدى ئەرەبىستان مۇداپىئە مىنىستىرلىكى دۈشەنبە كۈنى چېگرا رايۇندا يۈز بەرگەن توقۇنۇشتىن كېيىن ئارمىيە قىسىملىرىنى چېگراغا يېقىن نەجران رايۇنىغا ئورۇنلاشتۇرغانلىقىنى بىلدۈردى. يەمەندىكى ئىراننىڭ قوللىشى ئاستىدىكى ھۇسىي قۇراللىقلىرى، بىرلەشمە ئارمىيە قىسىملىرىنىڭ سادا ۋە ھاججا رايۇنىغا 150 قېتىم راكىتا ھۇجۇمى قوزغىغاندىن كېيىن سەئۇدى ئەرەبىستاندىكى جىزان ۋە نەجران رايۇنلىرىغا راكىتا قۇيۇپ بەرگەنلىكىنى جاكارلىدى. سەئۇدى ئەرەبىستان، راكىتا ھۇجۇمىدا نەجراندىكى بىر پۇقرانىڭ ئ‍ۆلگەنلىكى ۋە راكىتانىڭ ھەربىي رايۇن ئەتراپىدىكى بىر مەكتەپ ۋە ئولتۇراق رايۇنغا چۈشكەنلىكىنى بىلدۈردى. بىرلەشمە ئارمىيە ئايرۇپىلانلىرى تائىز رايۇنى بىلەن پايتەخىت سەنئانىڭ شەرقىدىكى مارىب رايۇنىغا ھاۋادىن زەربە بەردى.
شەنبە كۈنى ئامېرىكا تاشقى ئىشلار مىنىستىرى جون كېررىي بىلەن سەئۇدى ئەرەبىستان تاشقى ئىشلار مىنىستىرى ئادىل جۇبەيىر، يەمەندە 12-مايدىن باشلاپ 5 كۈنلۈك ئۇرۇش توختىتىش ئېلان قىلىنغانلىقىنى جاكارلىغان ئىدى. بۇ باياناتتىن كېيىن ھۇسىي قۇراللىقلىرى سەئۇدى ئەرەبىستاننىڭ ئىنسانىي ياردەم يەتكۈزۈش ئۈچۈن ئوتتۇرغا قويغان 5 كۈنلۈك ئۇرۇش توختىتىش تەكلىپىنى قۇبۇل قىلغان ئىدى. بۇ قاراردىن كېيىن ئىران يەمەنگە پاراخوت ئارقىلىق ئىنساني ياردەم يەتكۈزىدىغانلىقىنى ئېلان قىلدى.