ئۈرۈمچى شەھەر ئاھالىلىرى بۇنىڭدىن كېيىن ئۆيىنى ئىجارىگە بەرگەندە چوقۇم ئۆي ئىجارە بېرىش كىنىشكىسىنى بېجىرىشى كېرەك ئىكەن.
ئۈرۈمچى شەھەرلىك جەمئىيەت مۇلازىمىتىنى باشقۇرۇش ئىدارىسى كۆچمە نوپۇس ۋە ئىجارە ئۆيلەرنى باشقۇرۇش مەخسۇس تەربىيەلەش سىنىپى 15-ئاپرېل ئۈرۈمچىدە يۇقىرى، يېڭى تېخنىكىلىق كەسىپلەر تەرەققىيات رايونى (يېڭىشەھەر رايونى) دا دەرس باشلىغان بولۇپ، پۈتكۈل شەھەردىكى 2000دىن ئارتۇق ئۆي-زېمىن باشقۇرۇش خادىمى بۇ تەربىيەلەش سىنىپىدا كۆچمە نوپۇس ۋە ئىجارە ئۆيلەرنى باشقۇرۇشقا ئائىت قانۇن-بەلگىلىمىلەرنى ئۆگىنىپ، ئۆي ئىجارىگە بېرىش كىنىشكىسىنى ئومۇميۈزلۈك تارقىتىشقا ئاساس سالىدىكەن.
ئۈرۈمچى شەھىرى ئىجارە ئۆيلەرنى باشقۇرۇش ۋە كۆچمە نوپۇس مۇلازىمىتىنى ياخشى ئىشلەش ئۈچۈن، ئىلگىرى-كېيىن «ئۈرۈمچى شەھىرىنىڭ ئىجارە ئۆيلەرنى باشقۇرۇش نىزامى» ۋە «ئۈرۈمچى شەھىرىنىڭ ئىجارە ئۆيلەنى تىزىملاپ رويخەتكە ئالدۇرۇشنى باشقۇرۇش چارىسى»نى يولغا قويغان بولۇپ، بۇ «نىزام» ۋە «چارە»دە، ئۈرۈمچى شەھىرىدە ئىجارە ئۆيلەرنى تىزىملاپ رويخەتكە ئالدۇرۇش تۈزۈمىنى يولغا قويۇش ئوتتۇرىغا قويۇلغان ھەمدە شەرت ۋە ئۆلچەمگە توشىدىغان ئۆي ئىگىدارلىرىغا ئىجارە بېرىش كىنشكىسى تارقىتىپ بېرىدىغانلىقى، ناۋادا تىزىملىتىپ رويخەتكە ئالدۇرمىغان، مۇددەت ئىچىدە ئۆزگەرتمىگەنلەرگە ئۆي ئىجارىگە بېرىشنى باشقۇرۇش ئورنى قانۇنسىز تاپاۋىتىنى مۇسادىرە قىلىدىغانلىقى ھەمدە يۇقىرى بولغاندا ئايلىق ئىجارە ھەققىنىڭ بەش ھەسسىسىگىچە جەرىمانە قويۇلىدىغانلىقى، ئۇنىڭدىن باشقا، ئۆز ئالدىغا ۋە قالايمىقان سېلىۋالغان، ئامانلىق يوشۇرۇن خەۋپى مەۋجۈت بولغان بەش تۈرلۈك قانۇنسىز سېلىنغان ئۆيلەرگە ئىجارىگە بېرىش كىنىشكىسى بېجىرىلمەيدىغانلقى بەلگىلەنگەن.
ئۈرۈمچى شەھىرىدىكى كۆچمە نوپۇس ۋە ئىجارە ئۆي مۇلازىمىتىنى باشقۇرۇش تورى (wlmqsfwzlfwgl.com) بۇ يىل مايدىن باشلاپ رەسمىي ئېچىۋېتىلىدىغان بولۇپ، ئىجارە بېرىلىدىغان ئۆينى رويخەتكە ئالدۇرغان ئۆي ئىگىدارى بۇ تور بېكەت ئارقىلىق ئىجارە بېرىلىدىغان ئۆينىڭ ئۇچۇرىنى ئېلان قىلسا بولىدىكەن.