ئىز تورى-爱智网

　　  شىنجاڭ گېزىتى ئوبزورچىسى   ئەمگەك دۇنيانى ياراتقان. گۈزەل شىنجاڭنىڭ جۇشقۇن ھاياتىي كۈچى ئەمگەك ئارقىلىق ئۇرغۇتۇلدى. بۇلتۇر شىنجاڭدىكى ھەر مىللەت ئىشچى - خىزمەتچىلەر شىنجاڭ ئۇيغۇر ئاپتونوم رايونلۇق پارتكومنىڭ كۈچلۈك رەھبەرلىكىدە، «ئۇلۇغ ۋەتەننى قىزغىن سۆيۈپ، يۇرت - ماكاننى تېخىمۇ گۈزەل قىلىپ قۇرۇش» ئىشلىرىغا پائال ئاتلىنىپ، ئىتتىپاقلىشىپ كۈرەش قىلىپ، پۈتۈن كۈچى بىلەن تىرىشىپ، كۆرۈنەرلىك نەتىجىلەرگە ئېرىشتى، بۇ جەرياندا بىر تۈركۈم ئىلغار كوللېكتىپ ۋە ئىلغار شەخسلەر بارلىققا كەلدى؛ ئۇلار ئىلمىي تەرەققىياتقا تۈرتكە بولۇش، ئىجتىمائىي ئىناقلىقنى ئىلگىرى سۈرۈش، ئىجتىمائىي مۇقىملىقنى ساقلاشتىكى نەمۇنىچىلار، ھەر مىللەت ئەمگەكچى ئاممىنىڭ كۆزگە كۆرۈنگەن ۋەكىللىرى. شىنجاڭ ئۇيغۇر ئاپتونوم رايونى 27-ئاپرېل «1 - ماي» خەلقئارا ئەمگەكچىلەر بايرىمىنى تەبرىكلەش ھەم تەقدىرلەش يىغىنى ئېچىپ، ئىلغار كوللېكتىپ ۋە ئىلغار شەخسلەرنى تەقدىرلىدى. بىز شەرەپكە نائىل بولغان كوللېكتىپ ۋە شەخسلەرنى قىزغىن تەبرىكلەيمىز ۋە ئۇلارغا ئالىي ئېھتىرام بىلدۈرىمىز! ئەمگەك نەمۇنىچىلىرى ئەمگەكچىلەرنىڭ كۆزگە كۆرۈنگەن ۋەكىللىرى، ئۇلار ھەر مىللەت ئاممىنى رىغبەتلەندۈرۈپ، يېتەكلەپ، تەڭرىتاغنىڭ جەنۇبى ۋە شىمالىدا ئارقا - ئارقىدىن ئالەمشۇمۇل مۆجىزىلەرنى ياراتتى. يېقىنقى يىللاردا، بولۇپمۇ، مەركەزنىڭ شىنجاڭ خىزمىتى سۆھبەت يىغىنىدىن بۇيان، شىنجاڭدىكى ھەر مىللەت كادىرلار ۋە ئاممىنىڭ شىنجاڭنىڭ ھالقىما تەرەققىياتى ۋە ئۇزاق ئەمىنلىكىنى ئىشقا ئاشۇرۇشقا بولغان ئىشەنچىسى يەنىمۇ ئېشىپ، جاسارەت بىلەن ئىلگىرىلىدى، ھەر قايسى ئىشلارنى جۇشقۇن ھاياتىي كۈچ بىلەن ئىلگىرى سۈرىدىغان مەنزىرە بارلىققا كەلدى؛ 2010- ، 2011-يىلى ئاپتونوم رايونىمىزنىڭ ئىشلەپچىقىرىش ئومۇمىي قىممىتى ئىككى خانىلىق سان بويىچە ئېشىپ، يىلىغا ئوتتۇرا ھىساب بىلەن 100 نەچچە مىليارد يۈەن ئاشتى؛ شەھەر، بازار ئاھالىلىرى كىرىمىنىڭ ئېشىش نىسبىتى ئاپتونوم رايونىمىز ئىشلەپچىقىرىش ئومۇمىي قىممىتىنىڭ ئېشىش نىسبىتىدىن ئۇدا ئىككى يىل يۇقىرى بولدى. بۇ نەتىجىلەر شىنجاڭدىكى ھەر مىللەت خەلقنىڭ ئەقىل پاراسىتى ۋە جاپالىق ئەمگىكى نەتىجىسىدە بارلىققا كەلگەن بولۇپ، ئىشچىلار سىنىپى ۋە ئەمگەكچىلەرنىڭ ئۆزگىرىش ياساپ، ئىسلاھ قىلىپ، مەسئۇلىيەتنى دادىل زىممىسىگە ئېلىپ، جاسارەت بىلەن ئىلگىرىلەيدىغان دەۋر روھىنى نامايان قىلدى.　ھازىر شىنجاڭ يېڭى دەۋر، يېڭى باسقۇچقا قەدەم قويدى، شىنجاڭ ئۇيغۇر ئاپتونوم رايونلۇق 8-قېتىملىق پارتىيە قۇرۇلتىيىدا شىنجاڭنىڭ كەلگۈسى بەش يىللىق تەرەققىيات ئۇلۇغ پىلانى تۈزۈلدى، ئاپتونوم رايونلۇق پارتكوم بۇ يىل 2011-يىلى خەلق تۇرمۇشى قۇرۇلۇشلىرىدا قولغا كەلتۈرۈلگەن كۆرۈنەرلىك نەتىجىلەر ئاساسىدا، 25 تۈردىكى خەلق تۇرمۇشى قۇرۇلۇشىدىن 90نى يۇقىرى پەللە، يۇقىرى سەۋىيە، يۇقىرى ئۈنۈمدە ياخشى تۇتۇپ، ئاممىنى خەلق تۇرمۇشى قۇرۇلۇشلىرى ئارقىلىق بەختلىك تۇرمۇشقا ئېرىشتۈرۈشنى ئوتتۇرىغا قويدى. يېڭى تارىخىي پەللىدە، شىنجاڭدىكى ھەر مىللەت ئىشچى - خىزمەتچىلەر ئىدىيە ۋە ھەرىكىتىنى مەركەز ۋە ئاپتونوم رايوننىڭ مۇھىم ئورۇنلاشتۇرمىلىرى ئاساسىدا بىرلىككە كەلتۈرۈپ، ئەمگەك نەمۇنىچىلىرىدىن ئۆگىنىپ، ئەقىل-پاراسىتى ۋە كۈچىنى كەڭ كۆلەمدە قۇرۇش، كەڭ كۆلەمدە تەرەققىي قىلىش ئەمەلىيىتىدە ئۇيۇشتۇرۇپ، شىنجاڭنىڭ ھالقىما تەرەققىياتىغا تۈرتكە بولۇپ، كېيىن تەرەققىي قىلىپ ئېشىپ كېتىش ئۈچۈن تېخىمۇ چوڭ تۆھپە قوشۇشى كېرەك. ئەتراپىمىزدىكى ئەمگەك نەمۇنىچىلىرى ۋە ئىلغار خىزمەتچىلەردىن ئۆگىنىپ، تەقدىرىمىزنى شىنجاڭنىڭ تەرەققىياتى بىلەن زىچ بىرلەشتۈرۈپ، زامانىۋى مەدەنىيەتنى يېتەكچى قىلغان باشلامچىلاردىن بولۇشقا تىرىشىپ، شىنجاڭچە روھنى ئەمەلىيەتتە كۆرسىتىپ، ۋەتەننىڭ بىرلىكى، مىللەتلەر ئىتتىپاقلىقى، ئىجتىمائىي ئىناقلىقنى قوغداش مۇقەددەس بۇرچىمىزنى زىممىمىزگە ئېلىپ، ئومۇميۈزلۈك ھاللىق جەمئىيەت بەرپا قىلىش ئۇلۇغ ئىشلىرىدا يۈكسەك خوجايىنلىق مەسئۇلىيەت تۇيغۇسى ۋە كۈچلۈك بۇرچ تۇيغۇسى بىلەن ئىشچىلار سىنىپىنىڭ ئاساسىي قوشۇنلۇق رولىنى تولۇق جارى قىلدۇرۇپ، شىنجاڭنىڭ ئىسلاھات، تەرەققىيات، مۇقىملىق ئىشلىرىنىڭ ئالدىنقى سېپىدە قەتئىي ئېغىشماي چىڭ تۇرۇپ، يېڭى نەتىجە يارىتايلى. تىرىشقاندىلا ئۆزگىرىش ياسىغىلى بولىدۇ، تىرىشىدىغانلا بولساق ئۆزگىرىش ياسىيالايمىز. ھازىر تۈرلۈك قىيىنچىلىقلارنى يېڭىپ، جاسارەت بىلەن ئىلگىرىلەۋاتىمىز، كەلگۈسىگە بولغان ئىشەنچىمىز ھەسسىلەپ ئېشىۋاتىدۇ، ھەممەيلەن ئىش ئورنىمىزدا تىرىشىپ ئىشلەپ، مول نەتىجىلەرنى يارىتىپ، ئەمگەك ئارقىلىق ۋۇجۇدقا كەلگەن بەخت ۋە خۇشاللىقتىن تەڭ بەھرىمەن بولايلى! www.iz.la
