ئىز تورى-爱智网

　　  جۇڭگو ئۇيغۇرچە رادىيو تورى 30-نويابىر بېيجىڭ خەۋىرى: رۇسىيە قۇراللىق كۈچلىرىنىڭ باش ئىشتاب باشلىقى نىكولاي ماكاروۋ 29-نويابىر مۇنداق دېدى: رۇسىيە دېڭىز ئارمىيەسىنىڭ فىلوتى ئوتتۇرا يەر دېڭىزى رايونىغا مەشىق قىلىش ئۈچۈن بارىدۇ، ئۇنىڭ سۇرىيە ۋەزىيىتى بىلەن مۇناسىۋىتى يوق. رۇسىيە باش ئىشتاب بۆلۈمىنىڭ خەۋەردار ئەربابى مۇنداق دېدى: رۇسىيە شىمال فىلوتىغا قاراشلىق «ئادىمىرال كۇزنېتسوۋ» ناملىق ئاۋىياماتكا ۋە «ئادىمىرال چابانىنكو» ناملىق سۇ ئاستى كېمىسىگە قارشى تۇرۇش پاراخوتى 10-دېكابىردىن كېيىن ئاتلانتىك ئوكيان ۋە ئوتتۇرا يەر دېڭىزىغا بارىدۇ. كېلەر ئاينىڭ ئاخىرىدا، رۇسىيە فىلوتى سۇرىيە دېڭىز ساھىلىغا كىرىدۇ ھەم بۇ دۆلەتنىڭ نۇرغۇن پورتلىرىنى زىيارەت قىلىدۇ. رۇسىيە ئارمىيەسىنىڭ ئەربابى مۇنداق دېدى: رۇسىيە فىلوتىنىڭ بۇ قېتىمقى زىيارەت پىلانى بۇرۇنلا بېكىتىلىپ بولغان، بۇ نۆۋەتتىكى سۇرىيە ۋەزىيىتى بىلەن مۇناسىۋەتسىز. رۇسىيە ئارمىيەسى مۇشۇ پۇرسەتتىن پايدىلىنىپ، رۇسىيە ئوفىتسېر-ئەسكەرلىرىنىڭ كەسپىي سەۋىيەسىنى ئۆستۈرۈش ھەم رۇسىيەنىڭ دۇنيا دېڭىز-ئوكيانلىرىدىكى ھەربىي مەۋجۇتلۇقىغا ھەقىقىي كاپالەتلىك قىلىشنى ئۈمىد قىلىدۇ.