ئىز تورى-爱智网

　　   ھۆكۈمەت ئاپتوموبىلى ئىسلاھاتىغا زىچ مۇناسىۋەتلىك ئىككى چوڭ سىياسەت ئاممىنىڭ دىققىتىنى ئالاھىدە تارتتى. بىرىنچى، سانائەت ۋە ئۇچۇرلاشتۇرۇش مىنىستىرلىقى، دۆلەت ئىشلىرى مەھكىمسى ئورگانلار خوجىلىق ئىدارىسى، ج ك پ مەركىزىي كومىتېتىغا بىۋاسىتە قاراشلىق ئورگانلار خوجىلىق ئىدارىسى يېقىندا بىرلىكتە «پارتىيە-ھۆكۈمەت ئورگانلىرىنىڭ ھۆكۈمەت ئىشىغا ئىشلىتىلىدىغان ئاپتوموبىل تىپىنى تاللاش مۇندەرىجىسىنى باشقۇرۇش تەپسىلىي پىرىنسىپى»نى ئېلان قىلىپ، تۇنجى قېتىم پارتىيە-ھۆكۈمەت ئورگانلىرى سېتىۋالىدىغان، ھۆكۈمەت ئىشىغا ۋە قانۇن ئىجرا قىلىش، ۋەزىپە ئۆتەشكە ئىشلىتىلىدىغان ئاپتوموبىل موتورىنىڭ گاز چىقىرىش مىقدارى 1.8 لىتىردىن، باھاسى 180 مىڭ يۈەندىن ئېشىپ كەتمەسلىكى كېرەك، دەپ ئېنىق تەلەپ قىلدى. ئىككىنچى، دۆلەت ئىشلىرى مەھكىمىسى قانۇن-تۈزۈم ئىشخانىسى يېقىندا «ئورگان ئىشلىرىنى باشقۇرۇش نىزامى (پىكىر ئېلىش نۇسخىسى)»نى ئېلان قىلىپ، تۇنجى قېتىم ئورگان ئىشلىرىنى باشقۇرۇشنى قانۇن-تۈزۈم يولىغا سالدى، پىكىر ئېلىش نۇسخىسىدا ھۆكۈمەت ئىشىغا ئىشلىتىلىدىغان ئاپتوموبىلنى سەپلەش پىرىنسىپى، ناھىيە دەرىجىلىكتىن يۇقىرى ھۆكۈمەتنىڭ ھۆكۈمەت ئىشىغا ئىشلىتىلىدىغان ئاپتوموبىل ئىسلاھاتىنى ئىلگىرى سۈرۈش مەسئۇلىيىتى، ھۆكۈمەت ئىشىغا ئىشلىتىلىدىغان ئاپتوموبىلنىڭ ماي سەرپىياتى ۋە رېمونت قىلىش، ئاسراش ھەققىنى باھالاش، شۇنداقلا ھۆكۈمەت ئىشىغا ئىشلىتىلىدىغان ئاپتوموبىلنى باشقۇرۇشقا دائىر جازالاش تەدبىرلىرى يۈكسەك قاراتمىلىققا ئىگە قىلىنىپ، ھۆكۈمەتنىڭ قانۇن-تۈزۈم ۋاسىتىسىدىن پايدىلىنىپ ھۆكۈمەت ئاپتوموبىلى ئىسلاھاتىنى يەنىمۇ ئىلگىرى سۈرۈش ئىرادىسى نامايان قىلىندى. ئۈچ تارماق بىرلىكتە ئېلان قىلغان «پارتىيە-ھۆكۈمەت ئورگانلىرىنىڭ ھۆكۈمەت ئىشىغا ئىشلىتىلىدىغان ئاپتوموبىل تىپىنى تاللاش مۇندەرىجىسىنى باشقۇرۇش تەپسىلىي پىرىنسىپى»دا، «موتورنىڭ گاز چىقىرىش مىقدارى بىلەن ئاپتوموبىل باھاسىغا چەك قويۇش» ئەڭ يارقىن نۇقتا بولدى، گاز چىقىرىش مىقدارى 1.8 لىتىردىن، باھاسى 180 مىڭ يۈەندىن ئېشىپ كەتمەسلىك ئېنىق بەلگىلەندى. قانداق قىلغاندا ئاپتوموبىل سېتىۋالغاندىن كېيىنكى رېمونت، ئاسراش خىراجىتىگە ئەھمىيەت بەرگىلى بولىدۇ؟ بۇنىڭ ئۈچۈن پىكىر ئېلىنغاندىن كېيىنكى «ئورگان ئىشلىرىنى باشقۇرۇش نىزامى» ئارقىلىق نازارەتنى كۈچەيتىش كېرەك. مەسىلەن: «ئورگان ئىشلىرىنى باشقۇرۇش نىزامى (پىكىر ئېلىش نۇسخىسى)» دا، ھۆكۈمەت ئاپتوموبىلى سېتىۋېلىشتا، ئەرزان-قولاي بولۇش، ئېنېرگىيە تېجەش-مۇھىت ئاسراش تەلىپىگە ئۇيغۇن كېلىدىغان ئوتتۇرا-تۆۋەن دەرىجىلىك ئاپتوموبىللارنى سەپلەش مەخسۇس تەكىتلەندى. ھۆكۈمەت ئىشى بىلەن ئاپتوموبىل سەپلەشكە توغرا كەلگەندە، ھۆكۈمەت ئىشىغا ئىشلىتىلىدىغان ئاپتوموبىل سەپلەش ئۆلچىمىنى كەسكىن ئىجرا قىلىپ، ھۆكۈمەت ئىشىغا ئىشلىتىلىدىغان ئاپتوموبىل ئىشتاتى بىلەن سانىنى قاتتىق تىزگىنلەپ، ھۆكۈمەت ئىشىغا ئىشلىتىلىدىغان ئاپتوموبىلنى سەپلەش، يېڭىلاش، ئىشلىتىشنى باشقۇرۇش تۈزۈمى بەرپا قىلىش كېرەك. بۇنىڭدىن سىرت، پىكىر ئېلىش نۇسخىسىدا ئورگان ئىشلىرىنى يۈرۈشتۈرۈشكە كېرەكلىك مال ۋە مۇلازىمەتنى سېتىۋالغاندا، تولۇق رىقابەتكە چۈشۈش، ئەرزان - قولاي بولۇش، سۈپەتلىك - باھاسى ئەرزان بولۇش پىرىنسىپىغا ئەمەل قىلىش كېرەك. بۇ تەدبىرلەر ئارقىلىق ھازىرقى ھۆكۈمەت ئىشىغا ئىشلىتىلىدىغان ئاپتوموبىل سېتىۋېلىش، ئىشلىتىش ھالقىسىدا ساقلىنىۋاتقان قىسمەن يوچۇقلارنى ئۈنۈملۈك نازارەت قىلىپ باشقۇرغىلى، قىسمەن 4S دۇكانلىرىنىڭ رېمونت قىلى−ش ۋە ئاسراش يولى بىلەن «ھۆكۈمەت پۇلىنى خەجلەش»، زاۋۇت بېكىتكەن باھاغا يەنە باھا قوشۇپ سېتىش ئەھۋالىدىن ساقلانغىلى بولىدۇ. بۇنىڭدىن سىرت، ھۆكۈمەت ئاپتوموبىلى ئىسلاھاتىنى قانۇن-تۈزۈم يولىغا سېلىش «ئورگان ئىشلىرىنى باشقۇرۇش نىزامى (پىكىر ئېلىش نۇسخىسى)»دا ئېنىق ئەكس ئەتتۈرۈلدى. مەسىلەن: پىكىر ئېلىش نۇسخىسى ناھىيە دەرىجىلىكتىن يۇقىرى خەلق ھۆكۈمىتى ھۆكۈمەت ئىشىغا ئىشلىتىلىدىغان ئاپتوموبىلنى ئىجتىمائىيلاشتۇرۇش ئىسلاھاتىنى ئىلگىرى سۈرۈشى، ناھىيە دەرىجىلىكتىن يۇقىرى خەلق ھۆكۈمىتى خامچوتتا بەلگىلەنگەن نورما ۋە چىقىم ئۆلچىمى بويىچە ئورگانلارنىڭ خىراجەت خامچوتىنى بېكىتىشى؛ ھۆكۈمەت ئىشى بىلەن كۈتۈۋېلىش خىراجىتى، ھۆكۈمەت ئىشىغا ئىشلىتىدىغان ئاپتوموبىل سېتىۋېلىش ۋە ئۇنى ئىشلىتىش خىراجىتى، ھۆكۈمەت ئىشى بىلەن چەت ئەلگە (چېگرا ئاتلاپ) كوماندىروپكىغا چىقىش خىراجىتىنى خامچوتقا كىرگۈزۈپ باشقۇرۇشى، ئۇنىڭ ئورگان خىراجىتى خامچوت ئومۇمىي سوممىسىدا ئىگىلىگەن كۆلىمى ۋە نىسبىتىنى قاتتىق تىزگىنلىشى كېرەك، دەپ ئېنىق بەلگىلەندى. ئۇنىڭدا «ھۆكۈمەتنىڭ ئۈچ ئىشى»غا ئىشلىتىلىدىغان خىراجەتنى چىقىم قىلىش پىلانى تۈزۈش، باشقا خامچوت مەبلىغىنى يۆتكەپ ئىشلەتمەسلىك، مۇناسىۋەتلىك خىراجەتنى يۆتكەپ باشقا ئىشقا ئىشلەتمەسلىك تەلەپ قىلىندى. دىققەت قىلىشقا ئەرزىيدىغىنى، پىكىر ئېلىش نۇسخىسىدا ئورگانلارنىڭ خىراجىتى ۋە مەبلەغ باشقۇرۇشى قېلىپلاشتۇرۇلغاندىن سىرت، قانۇنىي جاۋابكارلىق چىڭىتىلدى، يەنى، بۇ نۆۋەتلىك ھۆكۈمەت ئاپتوموبىلى ئىسلاھاتىدا قانۇن-تۈزۈم يولىغا سېلىش ئەڭ چوڭ يارقىن نۇقتا بولدى. ھۆكۈمەت ئاپتوموبىلى سېتىۋېلىش، ئىشلىتىش ۋە قاتناش جەريانىدا كۆرۈلگەن خىلمۇخىل مەسىلىلەرنى قانۇن بويىچە ھەل قىلغاندا، جەمئىيەتتىكى ھەر ساھەنىڭ ھۆكۈمەت ئاپتوموبىلى ئىسلاھاتىدىن كۈتكەن ئۈمىدىگە قانائەتلىنەرلىك جاۋاب قايتۇرغىلى بولىدۇ، بۇنىڭدىن خەلق ئۈچۈن ھاكىمىيەت يۈرگۈزۈش ئاساسىي مەقسىتى نامايان بولىدۇ، بۇ، ۋەزىيەتنىڭ تەقەززاسى بولۇپلا قالماي، يەنە خەلقنىڭ ئارزۇسى.　

بىز ھەممىمىز ئىز تورىنى ياخشى كۆرىمىز!