ئىز تورى-爱智网

　　   جامائەت خەۋپسىزلىك مىنىستىرلىقى پات ئارىدا كۆرۈلىدىغان تۇمانلىق ناچار ھاۋا رايىنىڭ تاشيول قاتناش بىخەتەرلىكىگە بولغان تەسىرىنى كۆزدە تۇتۇپ، 9-ئۆكتەبىر كېچىلەپ جىددىي ۋېدىئولۇق يىغىن ئاچتى. مۇئاۋىن جامائەت خەۋپسىزلىكى مىنىستىرى خۇاڭ مىڭ يىغىندا مەركەزدىكى رەھبىرىي يولداشلارنىڭ مۇھىم يوليورۇقىنىڭ روھىنى يەتكۈزدى، يېقىندا يۈز بەرگەن بىر قانچە قېتىملىق ئالاھىدە زور تاشيول قاتناش ۋەقەسىنى ئۇقتۇردى، جايلاردىكى جامائەت-خەۋپسىزلىكى ئورگانلىرىدىن مەسئۇلىيەت تۇيغۇسىنى يەنىمۇ كۈچەيتىپ، مەركەزدىكى رەھبىرى يولداشلارنىڭ مۇھىم يوليورۇقىنىڭ روھىنى ئىزچىل ئەمەلىيلەشتۈرۈپ، پۈتۈن ساقچىلارنى ھەرىكەتكە كەلتۈرۈپ، پۈتۈن كۈچى بىلەن ناچار ھاۋا رايىدىكى تۈرلۈك تاشيول قاتنىشى بىخەتەرلىكىنى باشقۇرۇش تەدبىرلىرىنى ئەمەلىيلەشتۈرۈشنى چىڭ تۇتۇپ، ئالاھىدە زور تاشيول قاتنىشى ۋەقەلىرىنىڭ يۈز بېرىشىنى قەتئىي توسۇپ، خەلق ئاممىسىنىڭ ھايات، مال-مۈلۈك بىخەتەرلىكىگە ھەقىقىي كاپالەتلىك قىلىشنى تەلەپ قىلدى. خۇاڭ مىڭ مۇنداق دەپ كۆرسەتتى: جايلاردىكى جامائەت خەۋپسىزلىكى ئورگانلىرى دۇچكېلىۋاتقان تاشيول قاتنىشى بىخەتەرلىك ۋەزىيىتىنى سەگەكلىك بىلەن تونۇش كېرەك. نۆۋەتتە، جايلاردىكى تاشيول قاتنىشى يولۇچىلار ئېقىمىنىڭ كۆپىيىشىگە ئەگىشىپ، قاتناشنى باشقۇرۇش ۋەزىپىسى كۈنسېرى ئېغىرلاشتى؛ بولۇپمۇ يېقىندا پۈتۈن مەملىكەتتىكى بىر قانچە رايوندا تۇمانلىق ھاۋا رايىدىن ئالدىن ئاگاھلاندۇرۇش بېرىلدى، ناچار ھاۋا رايى تاشيول قاتنىشى بىخەتەرلىكىگە ئېغىر تەسىر كۆرسىتىدۇ. جايلاردىكى جامائەت-خەۋپسىزلىكى ئورگانلىرى قاتناش باشقۇرۇش تارماقلىرى دەرھال ھەرىكەتكە كېلىپ ئۆز جايىنىڭ ئەمەلىيىتىگە بىرلەشتۈرۈپ، جىددىي تاقابىل تۇرۇش مېخانىزمىنى يولغا قويۇپ، كۈچلۈك ئۈنۈملۈك تەدبىر قوللىنىپ، ناچار ھاۋا رايىدىكى قاتناش بىخەتەرلىكىنى باشقۇرۇش خىزمىتىنى ھەقىقىي ياخشى ئىشلىشى كېرەك. خۇاڭ مىڭ مۇنۇلارنى تەكىتلىدى: گەۋدىلىك مەسىلىلەر، نۇقتىلىق ھالقىلارنى چىڭ تۇتۇش، بولۇپمۇ ئۇزۇن يوللۇق ئاپتوبۇسنىڭ بىخەتەرلىكىنى نازارەت قىلىپ باشقۇرۇشتا مۇنداق تەدبىرلەرنى ياخشى ئەمەلىيلەشتۈرۈش كېرەك: ماشىنىلارنىڭ سۈرئىتىگە چەك قويۇش تەدبىرىنى قەتئىي ئەمەلىيلەشتۈرۈپ، چوڭ ئاپتوبۇسلارنىڭ سۈرئەتنى ئاشۇرۇپ قانۇن بەلگىلىمىگە خىلاپ يۈرۈشىنى مەخسۇس تۈزەپ، نەق مەيداندىن باشقا قانۇن ئىجراسى ۋاسىتىسىدىن تولۇق پايدىلىنىپ، تەكشۈرۈپ بىر تەرەپ قىلىشنىڭ ئۆز ۋاقتىدا ئۈنۈملۈك بولۇشىنى ھەقىقى ئىشقا ئاشۇرۇش؛ تۇمانلىق ھاۋا رايىدىكى قاتناشنى كونترول قىلىش تەدبىرلىرىنى قەتئىي ئەمەلىيلەشتۈرۈپ، كۆرۈش دەرىجىسى 50 مېتىرغا يەتمەيدىغان تېز سۈرئەتلىك تاشيوللاردا يوللارنى تاقاپ قاتناش كونترول قىلىش تەدبىرلىرىنى قوللىنىپ، قوشنا رايونلار بىلەن بولغان ئالاقە ۋە ماسلاشتۇرۇشنى كۈچەيتىپ، راۋانلاشتۇرۇش ۋە تارقاقلاشتۇرۇش تەدبىرلىرىنى ئالدىن تەشكىللەش؛ قاتناش جىددىي تاقابىل تۇرۇش باشقۇرۇش تەدبىرلىرىنى قەتئىي ئەمەلىيلەشتۈرۈپ، جىددىي تاقابىل تۇرۇش مېخانىزمىنى ۋاقتىدا يولغا قويۇپ، رەھبىرى كادىرلار خىزمەت ئورنىدا تۇرۇپ، ساقچى كۈچىنىڭ يوللاردا دىجورنىلىق قىلىشتا يېتەرلىك بولۇشىغا كاپالەتلىك قىلىش؛ 7 كىشىلىكتىن يۇقىرى ئاپتوموبىللارنى جەزمەن تەكشۈرۈش تەدبىرىنى ئەمەلىيلەشتۈرۈپ، نورمىدىن ئاشۇرۇپ يولۇچى سالغان ئاپتوبۇسلارنى بىردەك يولۇچىلارنى چۈشۈرۈپ باشقىغا يۆتكەپ، يۈكنى ئاشۇرۇپ سۈرئەتنى تېزلىتىپ ماشىنا ھەيدەشكە ھەرگىز يول قويماسلىق، قانۇنغا خىلاپ ھەرىكەتنى تۈگەتمەي تۇرۇپ قويۇپ بەرمەسلىككە كاپالەتلىك قىلىش؛ بېكەتتىن چىقىش، شەھەردىن چىقىش، تېز سۈرئەتلىك تاش يوللارغا كىرىش، تەۋەلىكتىن ئۆتۈش قاتارلىق ئۆتكەللەردىكى تەكشۈرۈش تەدبىرىنى قەتئىي ئەمەلىيلەشتۈرۈپ، ساقچى كۈچىنى ئىلمىي ئورۇنلاشتۇرۇپ، مۇھىم ئۆتكەللەرنى چىڭ تۇتۇش؛ ئۇزۇن يوللۇق　ئاپتوبۇسنىڭ بىخەتەرلىكىنى باشقۇرۇش تەدبىرلىرىنى قەتئىي ئەمەلىيلەشتۈرۈپ، ئاپتوبۇسنىڭ پۈتۈن جەريانىنى ھەرىكەتچان نازارەت قىلىپ كونترول قىلىشنى كۈچەيتىپ، چارچاپ ماشىنا ھەيدەشنى قەتئىي توسۇش؛ كارىۋاتلىق ئاپتوبۇسنىڭ كېچىدە يۈرۈش بىخەتەرلىكىنى باشقۇرۇش تەدبىرلىرىنى قەتئىي ئەمەلىيلەشتۈرۈپ، قاتناش تىرانسپورت تارماقلىرىغا پائال ماسلىشىپ، سەھەر سائەت 2 دىن سائەت بەشكىچە قاتنايدىغان كارىۋاتلىق ئاپتوبۇسلارنى يېقىن ئەتراپتىكى مۇلازىمەت رايونىغا ياكى بېكەتلەرگە ئاپىرىپ دەم ئالدۇرۇش، سەھەر سائەت 1 دىن بۇرۇن نىشانغا يېتىپ بارالمايدىغان ئاپتوبۇسلارنىڭ قاتناش لىنىيەسىنى تېزدىن تەڭشەپ، كېچىدە بولۇپمۇ يېرىم كېچىدە ئاپتوبۇسنىڭ يۈرۈشىنى ئەڭ زور دەرىجىدە ئازايتىش؛ تۈرلۈك باشقۇرۇش مەسئۇلىيەت تۈزۈمىنى قەتئىي ئەمەلىيلەشتۈرۈپ، خەلق ئاممىسىغا يۈكسەك مەسئۇلىيەت بولۇش روھى بىلەن، قانۇن بويىچە مەسئۇلىيىتىنى ئەمەلىيلەشتۈرۈپ، يولۇچىلار تىرانسپورت شىركەتلىرى ۋە شوپۇرلارنى باشقۇرۇشنى كۈچەيتىپ، ئالاقىدار قائىدە تۈزۈملەرنىڭ ئەمەلىيلىشىش ئەھۋالىنى قەرەللىك تەكشۈرۈپ، ئالاھىدە زور تاشيول قاتنىشى ۋەقەسى يۈز بەرگەن ھامان مەسئۇلىيىتىنى تەكشۈرۈپ ئېنىقلاپ، ئالاقىدار خادىملارنىڭ مەسئۇلىيىتىنى قانۇن بويىچە سۈرۈشتۈرۈش لازىم. خۇاڭ مىڭ مۇنداق دەپ كۆرسەتتى: تۇمان قاتارلىق ناچار ھاۋا-رايىغا يولۇققاندا، رادىيو، تېلېۋىزور ، ئىنتېرنېت تورى، يول ئېلېكتىرونلۇق ئېكرانى، يانفون ئۇچۇرى قاتارلىق تاراتقۇلار ئارقىلىق، ئالدىن سىگنال بېرىش ئۇچۇرلىرى ۋە قاتناش جىددىي تاقابىل تۇرۇش تەدبىرلىرىنى كەڭ دائىرىدە ئېلان قىلىپ، بىخەتەر ھەيدەشتە دىققەت قىلىشقا تېگىشلىك ئىشلارنى ئەسكەرتىپ، شوپۇرلارنىڭ بىخەتەرلىك ئېڭىنى يەنىمۇ كۈچەيتىش، يولغا چىقىش لىنىيەسى ۋە ۋاقتىنى مۇۋاپىق تاللاش، بىخەتەر سەپەرگە چىقىشقا كاپالەتلىك قىلىشنى سەمىگە سېلىش لازىم.