سۈرەتتە: سېئۇل ئالىي سوتى
 
يەر شارى تورى مۇخبىرى لى شياۋفېي خەۋىرى: يەر شارى تورىنىڭ كورىيەدە تۇرۇشلۇق ئالاھىدە تەكلىپلىك مۇخبىرىنىڭ سوت مەيدانىدىن ئەۋەتكەن خەۋىرىگە ئاساسلانغاندا، شۇ جاي ۋاقتى 9- ئاينىڭ 13- كۈنى سائەت 14 (بېيجىڭ ۋاقتى سائەت 13 دە) تە، كورىيە سېئۇل ئالىي سوتى جۇڭگولۇق كاپىتان چېڭ داۋېينىڭ كورىيەنىڭ دېڭىز ساقچىسىنى ئۆلتۈرۈش دېلوسىغا قارىتا 2- سوت ئېچىپ، چېن داۋېيغا 23 يىللىق مۇددەتلىك قاماق جازاسى بېرىش ۋە 20 مىليون ۋون (خەلق پۇلىغا 112 مىڭ يۈەن) جەرىمانە قويۇشنى ھۆكۈم قىلدى. يەنە بىر كاپىتان ليۇ ليەنچېڭغا تۆت يىللىق مۇددەتلىك قاماق جازاسى بېرىش ۋە 20 مىليون ۋون (خەلق پۇلىغا 112 مىڭ يۈەن) جەرىمانە قويۇشنى ھۆكۈم قىلدى. دېلوغا چېتىشلىق قالغان ماتروسلارغا 1- سوتتا بېرىلگەن جازا ساقلاپ قېلىندى.
2011- يىلى 12- ئاينىڭ 12- كۈنى، كورىيە ئىنچېئون رايونىدىكى ئىككى نەپەر دېڭىز ساقچىسى سېرىق دېڭىز رايونىدا جۇڭگولۇق بېلىقچىلار بىلەن توقۇنۇشۇپ قېلىپ، بىر ساقچى يارىلانغان، بىر ساقچى قازا قىلغان. كورىيە تاراتقۇسىنىڭ ئېيتىشىچە، كورىيە دېڭىز ساقچىلىرى دېڭىزدا «قانۇنسىز بېلىق تۇتۇۋاتقان» جۇڭگولۇق بېلىقچىلارنى تۇتۇپ قالغان چاغدا، جۇڭگولۇق كېمە باشلىقى پۇلاڭلاتقان ئۆتكۈر ئەسۋاب سانجىلىپ كېتىپ، لى فامىلىلىك كورىيە دېڭىز ساقچىسى داۋالاش ئۈنۈم بەرمەي قازا قىلغان.
كورىيە ئىنچېئون يەرلىك سوتى بۇ يىل 4- ئايدا ئېچىلغان 1- سوتتا بۇ دېلونى بېجىرىپ، چېڭ داۋېيغا 30 يىللىق مۇددەتلىك قاماق جازاسى بېرىش ۋە 20 مىليون ۋون (خەلق پۇلىغا 112 مىڭ يۈەن) جەرىمانە قويۇشنى ھۆكۈم قىلغانىدى. چېڭ داۋېي قاتارلىقلار ھۆكۈمگە قايىل بولماي، نارازىلىق ئەرزى سۇنغانىدى.