ئانا تىلىم __ ئاق قان كېسىلى

ئۇيغۇر تىلىم  ـــ ئاق قان كېسىلى

يوقالغان روھىمنىڭ ئاچقۇچى قېنى
ئاسماننىڭ قۇلىپىنى چاقاي دەيمەن .
رودىپاي كىشەنلىرىمنىڭ ئالدىدا ،
جىمجىتلا ئۇ دۇنياغا ئۇزاي دەيمەن .

قوشنامنىڭ ئورا كۆزلىرى ئىچىدە ،
ئۆتنە يېرىملىرىمنى ئۇنتۇپ قاپتىمەن .
دۇنيا قوشنىلىرىمنى قايتۇرۇپ بەرگىن !
2

سەدىقىلەر ئىچىدە كۆكلەيمەن ،
دۇنيا ماڭا نان تاشلاپ بېرىدۇ ،
دۇنيا ماڭا سۇڭەك تاشلاپ بېرىدۇ !
مەن سۈڭەكلەر ئىچىدە چىرىپ كېتىمەن..
ئەڭ چىرايلىق بوغۇق ئاۋازدا ،
قاۋاپ بېرىمەن دۇنياغا …

بولوت بولسام ئىزىم يوقالدى،
شامال بولسام كۆچۈپ تۇرىمەن ،
ئەڭ ئاخرىقى شام بولغىنىم راست .
ھەر قەدەمدە ئۆچۈپ تۇرىمەن .

كۆز يەتكۈسىز ئىگىزلىكم يوق ،
دەريالىرىم ، بولاقلىرىم يوق !
چەكسىزلىككە سوزىلىپ تۇرىمەن ،
كۆز يەتكۈسىز ئاسمان ھەققىدە …

بۇگۈن بەلكىم ئۆچىشىم مۈمكىن ،
دۇنيا ساڭا قاۋاپ بېرەيمۇ ؟
جەسىدىمنى تاشلىۋەتمىگىن ،
ئۇنتۇپ قالما جىمجىتلىقىمنى،
ئەڭ مۇكەممەل ئانا تىلىمدا،
ئۆھۈ قىلىپ جاۋاپ بېرەيمۇ؟

شاراقشىۋاتقان تەنلىرىم ئىچىدە ،
مۇسىبەتلىك شېئىر ئوقىدىم .
بىر ئىككى مىسرالىق كاۋاپ پۇرىقى ،
خىيالىي تۇيغۇلىرىمنى غىدىقلىماقتا….
شېئىرىمنىڭ كەينىدە قاراڭغۇلۇق بار ،
شېئىرىمنىڭ كەينىدە مەۋجۇتلىقىم بار.
شېئىرىمنىڭ كەينىدە پىچىرلاۋاتقان ،
كەكە ساقال ئانا تىلىم بار…
3

يورۇقلۇقنى كۆشەندە قىلىۋاتقان قاراڭغۇلۇق ،
بارمىقىنى شىلتىدى ماڭا ،
دۇنيا چىۋىق بىلەن ئۇرماقتا مېنى ،

قورۇقتۇم دۇنيا چېقىر كۆزىڭدىن ،
مىدىرلىساڭلا چۆچۆپ كېتىمەن ،
ئاخرىقى قېتىم پىلدىرلاۋاتسام ،
پۈۋ دىسەڭلا ئۆچۈپ كېتىمەن ،
4

ئانا تىلىم – ئاق قان كېسىلى ،
تەلمۈرىدۇ تۆت ئەتراپىغا .
يىنىككىنە ئاق رەڭ ئىچىدە ،
قىيسىيىدۇ شېرىن ئۇيقىغا.

تىپىرلايدۇ قېرىنداشلىرى ،
قۇتقۇزۇشتا بىرلىك كېلەلمەي ،
ئۇنتۇپ قالار ھازا ئېچىشنى ،
جىنازىسى چىقسا بىلەلمەي .

ھەرىپلەر رەستىسىدىن ئۆتكەن چېغىمدا ،
تىل شاپاقلىرىغا پۇتلاشتىم .
ئۆزگە تىلدا كىيىم تىكتۇرسەم ،
مانا بىر ئوبدان قاملاشتىم .

ئوغلۇمنىڭ ئىسىمى ئەرەپچە ،
مودا كىيىمەن غەرپچە ،
سۆزلىشىمەن شەرقچە….
سۆزلەشنى بىلىمەن رېستۇران ھەققىدە ،
شەھەردە دەسسىلىۋاتقان تىلىم ھەققىدە …

تۆت تەرپى بولمىغان تىك بۇلۇڭنىڭ ،
ماتىماتىكىلىق جاۋابى چىقماس .
ئانا تىلسىز كاپىشىغان گالنى ،
ئەزىرائىلمۇ ئالدىراپ سىقماس !

تومۇزغىنىڭ تىلى ئاجىز، جېنى چىڭ ،
ئانا تىلدا سايرىسا يوق ھەسرىتى .
ئۇيغۇر تۇرۇپ ئانا تىلنى يەكلىسە ،
بولور ئاڭا ھەممە ئەلنىڭ نەپرىتى!

ئانا تىلدا ئاق قان ئۆرلەپ يامىرىدى ،
بۇ قىسمەتكە ئېشەك جېنىدا ھاڭرىدى .
ئانا تىلنىڭ سەكراتىغا چىدىماي ،
‹كۆزىڭنى ئاچ ، ئانا ! › دىگن بىر ئاۋاز،
پەلەك ئارا جاراڭلىدى ، ياڭرىدى !

ئاپتۇرى : ئابلەت مۇھەممەت

مەنبەسى:ئانا تۇپراق مۇنبىرى