ھەسەنجان قەييۇم : بالىلار شىئېرلىرى

ھەسەن6

  ھەسەنجان قەييۇم

ئانا مەنمۇ ئوقۇيمەن

كىچىڭ دىمە ئۇكامدەك ،
جىلتە ئېسىپ ئاكامدەك .
شائىر بولاي ئاتامدەك ،
ئانا مەنمۇ ئوقۇيمەن .

مېنى بەرگىن مەكتەپكە ،
يېشىم توشار تەلەپكە .
ئىرىشكۈم بار شەرەپكە .
ئانا مەنمۇ ئوقۇيمەن .

ئۆتتى خەتمە تويلىرىم ،
ئۆسۈپ كەتتى بويلىرىم .
ئوقۇش مېنىڭ ئويلىرىم ،
ئانا مەنمۇ ئوقۇيمەن .

ماڭا جىلتە ئېلىپ بەر ،
دەپتەر قەلەم سېلىپ بەر .
مەن بىلىمدىن ياساي پەر ،
ئانا مەنمۇ ئوقۇيمەن .


ئەجەپ ئۇچتى لەگلىكىم

ئارزۇيۇمدۇر مېنىڭكى ،
لەگلەك ياساپ ئۇچۇرماق .
ئايلاندۇرۇپ سامانى ،
بىر مۆجىزە قۇچۇرماق .

ھاجەت ئەمەس ئاكىجان ،
ياساپ بەرگەن لەگلىكىڭ .
پەقەت ساڭا تەئەللۇق ،
سېنىڭ قىلغان ئەمگىكىڭ .

ياساي مەنمۇ بىر لەگلەك ،
ئەجىر قىلىپ قولۇمدىن .
قايتۇرمىغىن ئاكىجان ،
مەن تاللىغان يولۇمدىن .

شۇنداق قىلىپ مەن بۇگۈن ،
ياساش ئۈچۈن تۇتۇندۇم .
تەييارلىغاچ قەغەز ، يىپ ،
خىيالىمدا ئۇچۇردۇم .

زېھىن قويۇپ ئاخىرى ،
ياساپ چىقتىم بىر لەگلەك .
ئەقىل بىلەن مېھنەتتىن ،
كۆتۈرۈلدۈم بىر پەللەك .

ئۇزۇن قىلىپ باغلىدىم ،
لەگلىكىمنىڭ يىپىنى .
بىلىۋالدىم مەن بۇگۈن ،
ئەجىر قىلىش ئىپىنى .

قويۇپ بەردىم ھاۋاغا ،
  ئەجەپ ئۇچتى لەگلىكىم .
خوشال قىلدى ۋاي مېنى ،
ئۆز ئىجادىم ، ئەمگىكىم .

yadikar

ياخشى چىقىپتۇ بۇ شېئىرلار. ئىجادىيىتىڭىز تېخىمۇ رۇناق تاپقاي!

dohturbiz

يازمىڭىزغا تەشەككۈر