مەشرەپ: بىر كۈن

yadikar

ئەگەر سەن خانى خاقانسەن، ئۆلەرسەن ئاقىۋەت بىر كۈن،
ۋەگەر سەن شاھى دەۋرانسەن، ئۆلەرسەن ئاقىۋەت بىر كۈن.
ئەگەر مىڭ يىل ئۆمۈر كۆرسەڭ تىرىكلىك كويىدا غاپىل،
ئەجەلنىڭ شەربەتىن ئاخىر ئىچەرسەن، ئاقىۋەت بىر كۈن.
مىنىپ سەن ئەسپى گەۋھەرنى جاھاننى سەير ئېتىپ يۇرسەڭ،
ياغاچ ئاتقا، ئايا غاپىل، مىنەرسەن، ئاقىۋەت بىر كۈن.
تەكەببۇر تەختى ئۇستىدە كېيىپسەن ئەگىنگە زىبا،
ياقاسى، يېڭى يوق توننى كېيەرسەن، ئاقىۋەت بىر كۈن.
چىراغى مەشئەلىنى ياندۇرۇپ ئەيشى تەلەپ قىلساڭ،
چىراغى يوق قارا گۆرگە كىرەرسەن، ئاقىۋەت بىر كۈن.
كەل ئەي مەشرەپ، تەۋەززۇ قىل، خۇدا يادى بىلەن بولغىن،
بۇ يۈرگەننىڭ ھېسابىنى بېرەرسەن، ئاقىۋەت بىر كۈن.

ablatahmat

ئاجايىپ ياخشى غەزەلدە بۇ،مۇمكىن بولسا ناخشىسىنمۇ يوللاپ قويسىلا بوپتىكەن.