تۈركىيە ئاۋازى رادىيوسى خەۋىرى : جۇڭگو ھۆكۈمىتى، شىمالىي ۋە جەنۇبىي كورېيە ئوتتۇرىسىدا يۈز بېرىش ئېھتىمالى بولغان ھەر قانداق توقۇنۇشنىڭ رايون مۇقىملىقىغا تەسىر كۆرسىتىدىغانلىقىنى ئەسكەرتكەن ھالدا ھەر ئىككى دۆلەتكە قارىتا ئۆزئارا ئىغۋاگەرچىلىكتىن ئۇزاق تۇرۇش ھەققىدە چاقىرىق قىلدى.
جۇڭگو تاشقى ئىشلار مىنىستىرلىكىدىن ئېلان قىلىنغان باياناتتا، كورېيە يېرىم ئارىلىنىڭ نۆۋەتتىكى ۋەزىيىتىنىڭ ئىنتايىن مۇرەككەپ ۋە سەزگۈر ئىكەنلىكى قەيت قىلىندى.
شىمالىي ۋە جەنۇبىي كورېيەگە قارىتا جىددىي ۋەزىيەتنى پەسەيتىش ئۈچۈن دىيالوگ ئۆتكۈزۈش چاقىرىقى تەكرارلانغان باياناتتا «رايوندا قانلىق توقۇنۇش يۈز بەرسە، رايوننىڭ تىنچلىقى ۋە مۇقىملىقىغا تەسىر يېتىدۇ ھەمدە بۇنىڭدىن ئىككى تەرەپنىڭ خەلقى چوڭ زىيانغا ئۇچرايدۇ» دېيىلدى.
تۈنۈگۈن رۇسىيەمۇ جەنۇبىي كورېيەنى سېرىق دېڭىزدا ھەربىي مانېۋىر ئۆتكۈزۈش پىلانىدىن ۋاز كېچىشى كېرەكلىكىنى، ئۇنداق بولمىغاندا ۋەزىيەتنىڭ تېخىمۇ جىددىيلىشىدىغانلىقى توغرىسىدا ئاگاھلاندۇردى.
شىمالىي كورېيەدە زىيارەتتە بولۇۋاتقان ئامېرىكىلىق مەسئۇل بىل رىچاردسون رايوننىڭ ۋەزىيىتىگە «ناھايىتى كەسكىن» دەپ باھا بەردى ۋە مەسىلىلەرگە چارە تېپىش ئۈچۈن ئالىي دەرىجىلىك رەھبەرلەر يىغىنى ئۆتكۈزۈش تەكلىپىنى بەردى.
سېئۇل ھۆكۈمىتى بۈگۈندىن باشلاپ ئۈچ كۈن داۋاملىشىشى پىلانلانغان ھەربىي مانېۋىرنى ئۆتكۈزۈش ئۈچۈن تەييارلىق قىلماقتا.
بۇ قېتىمقى مانېۋىردا راست ئوقلارنىڭ قوللىنىلىدىغانلىقى قەيت قىلىنماقتا.
شىمالىي كورېيە بولسا، مانېۋىر ئۆتكۈزۈلگەن تەقدىردە بۇنىڭغا قاتتىق جاۋاب بېرىدىغانلىقىنى ئېلان قىلدى.
