ئىگىلىك تىكلەشتە نىشان بولۇشى كېرەك؟
مۇنىرە توختى
يېڭىدىن ئىگىلىك تىكلىمەكچى بولغانلارنىڭ كۆپىنچىسى مەبلەغ كەمچىل بولۇش، تەجرىبىسى يېتەرسىز بولۇش سەۋەبلىك ئىگىلىك تىكلەشكە قۇربى يەتمەي قالىدۇ. بىر مۇۋەپپەقىيەت قازانغۇچى مۇنداق دېگەن : ‹‹مۇۋەپپەقىيەت قازىنىش يولىدا، سىز سەۋىرچانلىق بىلەن غەلىبىنىڭ كېلىشىنى كۈتمىسىڭىز، سەۋىرچانلىق بىلەن مەغلۇبىيەتكە يۈزلىنىشكە مەجبۇر بولىسىز››. مېنىڭ قارىشىمچە، مۇۋەپپەقىيەتنىڭ ئېنىقلىمىسى بايلىق توپلاشلا بولماستىن، بەلكى مۇھىمى كىشىلەرنىڭ ئۆزىنى تاكاممۇللاشتۇرۇشى، ئۆزىنىڭ قىممىتىنى يارىتىشىدۇر. شۇڭا ئىگىلىك تىكلىمەكچى بولغانلار چوقۇم ئۆزىنى تونۇشى، ئۆزىنىڭ يېتەرسىزلىكلىرى ئۈستىدە ئويلىنىشى كېرەك. بەزىلەر ئىگىلىك تىكلەش يولىغا ئەمدى قەدەم قويۇشىغىلا، ئازابتىن كۆز ياش تۆكىدۇ.
سىز مەيلى ئىگىلىك تىكلىمەكچى بولۇڭ ياكى ئىشلەمچى بولۇڭ، ئۆزىڭىزنىڭ نىشانى بولسۇن. نىشانىڭىز ئەمەلىيەتكە ئۇيغۇن بولسۇن. ئۇنداقتا نىشانغا قانداق يېتىمىز؟ نۇرغۇن كىشى تەۋەككۈلچى كېلىدۇ، بۇنى كىشىلەرنىڭ ھەر كۈنى نۇرغۇن پۇلغا لاتارېيە بېلىتى سېتىۋېلىشىدىن كۆرۈۋالالايمىز. ئەمەلىيەتتە نىشانغا يېتىش تاماق يېگەنگە ئوخشايدۇ، ھېچكىممۇ تاماقنى بىراقلا يەپ تۈگىتەلمەيدۇ، ياكى تاماقنى بىرلا قېتىمدا كۆپ يەپ سەمرىپ كېتەلمەيدۇ، شۇڭا سەۋىر – تاقەت بىلەن غەلىبە قازىنىشنى كۈتمىگەندە، ئاخىرىدا يۈزلىنىدىغىنى مەغلۇبىيەت بولىدۇ.
‹‹مەن نىشانىمغا يېتەلەرمەنمۇ؟›› بەزىلەر ئۆزىنىڭ يوشۇرۇن ئىقتىدارىنى بىلەلمىگەنلىكتىن، ئۆزى بەلگىلىگەن نىشانغا يېتەلمەيدۇ. شۇڭا نىشانغا يېتىش ئۈچۈن ئۆزىنىڭ يېتەرلىك بايلىق مەنبەسى، ئىقتىدارى ۋە ئەمەلىيەتكە ئۇيغۇن كۆز قارىشى بولۇشى كېرەك.
ئىگىلىك تىكلىگۈچىگە نىسبەتەن كەسىپ تاللاش ئەڭ مۇھىم. ئەگەر سىزدە سودا قىلالىغۇدەك تەجرىبە ياكى تەجرىبە سېتىۋالغۇدەك مەبلەغ بولمىسا، كەسىپ تاللىشىڭىز راۋان بولمايدۇ. ئەگەر سىزدە تىجارەت قىلالىغۇدەك تەجرىبە بولمىسا، ئۇنداقتا سىز پەن – تېخنىكا تۈرىدىكى كەسىپتىن نېرى تۇرۇپ، ئەنئەنىۋى كەسىپلەرگە يۈرۈش قىلىڭ. گەرچە ئۇنىڭ پايدىسى كۆپ بولمىسىمۇ، لېكىن خېرىدارى كۆپ بولغانلىقتىن، سودىسى نىسبەتەن مۇقىم بولىدۇ.
ئىگىلىك تىكلىمەكچى بولغان ياشلاردا ئورتاق بىر مەسىلە مەۋجۇت. يەنى، ئۆزىنى ئىگىلىك تىكلەشكە ماس كېلەمدۇ – يوق، سودا قىلىش تەجرىبىسى بارمۇ – يوق؟ بۇنىڭغا ئاددىي بىر مىسال كەلتۈرسەك، سىزدە 50 يۈەن بولسا، سىز ئۇنىڭغا يېقىن ئەتراپتىكى توپ تارقىتىش بازىرىدىن سەي – كۆكتات سېتىۋېلىپ، ئۇنى ئۆزىڭىزگە ئەڭ تونۇشلۇق بولغان ئاھالىلەر ئولتۇراق رايونىغا ئاپىرىپ سېتىڭ. بىر كۈن ئىچىدە سېتىپ بولالىسىڭىز، بۇ سىزنىڭ سودا قىلالايدىغانلىقىڭىزنى ئىسپاتلايدۇ. ئەگەر سىز بۇ سەينى ساتالمىسىڭىز، ياخشىسى سودا ساھەسىگە قەدەم تاشلىماڭ. 50 يۈەنگە سەي – كۆكتات سېتىۋېلىشقا كەلسەك، ئۇنىڭ ئادەتتە پايدىسى %40 تىن يۇقىرى بولىدۇ. بۇنداق بولغاندا سىزنىڭ كىرىمىڭىز ئەڭ ئاز دېگەندىمۇ 70 يۈەن بولىدۇ، خىراجەتكە ئون يۈەننى چىقىرىۋەتكەندە، 60 يۈەن پايدا قالىدۇ. بۇ 60 يۈەنگە يەنە داۋاملىق سەي – كۆكتات سېتىۋېلىپ ساتسىڭىز، ئىككىنچى كۈنى 74يۈەن پايدا تاپىسىز، ئۈچىنچى كۈنى 93.6 يۈەن، تۆتىنچى كۈنى 121 يۈەن... مۇشۇنداق داۋاملاشسا، بىر يىلدا سىزنىڭ كىرىمىڭىز قانچىلىك بولىدۇ؟
بۇ گەرچە جاپالىق تىجارەت يولى بولسىمۇ، لېكىن بۇنىڭدىن سىز كۆپ نەرسىلەرگە ئېرىشىسىز:
1.دەسلەپكى كىرىم جۇغلانمىسى ۋە جەريانىنى بىلىۋالىسىز.
2. ئاز دەسمايە سېلىپ، زىيان خەتىرىنى ئازايتالايسىز.
3. تىجارەتنىڭ جەريانى ۋە ئەھمىيىتىنى بىلىۋالالايسىز.
4. قانداق قىلىپ باشقىلار بىلەن ئىجتىمائىي ئالاقە قىلىشنى ھەمدە سەمىمىي سودىگەر بولۇشنى ئۆگىنەلەيسىز.
سىز ئۆزىڭىزدە بار بولغان ئەۋزەل شارائىتتىن ياخشى پايدىلىنىپ، ئىقتىدارىڭىزنى نامايان قىلىڭ، بۇ سودىگەر ھازىرلاشقا تېگىشلىك ساپا.
يوللىغان ۋاقتى 
يوللىغان ۋاقتى 
