ياخشىلارنىڭ قەلبى نۇرىستان،
ئەلنىڭ قوينى گۈلزار،گۈلىستان.
ئايرىلغانلار ھايا-نۇمۇستىن،
باھارىڭغا چىللار زىمىستان.
***
قۇرۇق شاختا بۇلبۇل سايرىماس،
قۇرۇق تاغار ئۆرە تۇرالماس.
مۇھەببەتتىن ھايات مەنىلىك،
مۇھەببەتسىز قىممىتى بولماس.
***
مېھىرلىكتۇر ئاناڭغا ئوخشاش،
كىندىڭ قېنىڭ تۆكۈلگەن تۇپراق.
يۈز ئۆرىسەڭ، تۇزكورلۇق قىلساڭ،
خارۇ-زارسەن ھارجايدا،ھەرۋاق.
***
ياخشى نىيەت تۆرگە باشلايدۇ،
يامان نىيەت دەردكە تاشلايدۇ.
باشقىلارغا قارا سانىساڭ،
شادلىق ساڭا قوچاق ئاچمايدۇ.
***
ئەلنىڭ مېھرى قۇياشتۇر –قوياش،
ياخشىلارنىڭ قەلبى بىر تۇتاش.
كۆڭۈللەردىن كۆڭۈللەرگە يول،
نۇرلاندۇرار پاك –ھالال ياشاش.
***
راھەت بىلەن جاپا يانمۇ-يان،
ئەڭگۈشتاردۇر ئىتىقاد ،ۋىجدان.
ئەتراپىغا چاچار خۇشپۇراق،
ئاقىللارنىڭ قەلبى گۈلىستان.
***
يىتىملەرنى باغرىڭغا باسقىن،
مىسكىنلەرگە باغرىڭنى ئاچقىن.
« روھىم ساغلام،پاك » بولسۇن دېسەڭ،
ھالالدىن يە، ھارامدىن قاچقىن.
يوللىغان ۋاقتى 
