قارشى قىرغاقتىكى خىياللار
سەندىن ساپ ، غۇبارسىز سۆيگۈ-مۇھەببەت تىلەش ئۈچۈن ، يوقاتماقچى بولغانلىرىم بارغانسىرى كۆپىيىپ كەتتى . ئەلۋەتتە ، شۇنداق قىلىشقا ئەرزىيدۇ . سەن ماڭا سايىدەك يېپىشقان شۇ كۈندىن باشلاپ ، قەلبىمدىكى ھەسرەتلەر ھېماتسىز قالدى ، سېنىڭ مېھرى-مۇھەببىتىڭگە دەممۇدەم ئېرىشىپ تۇردۇم ، ئۆزۈمنى خۇددى چۈش دەرياسىنىڭ تىمتاس ساھىلىدا يۈرگەندەك ھېس قىلىشقا باشلىدىم . يىراقلارغا ئەركىن نەزەر سالدىم ، دەريا تاشقىنى قىرغاقلارغا قاتتىق ئۇرۇلۇپ مېنى ئالقىشلايتتى ، ئاسماننىڭمۇ چېھرىگە كۈلكە يۈگۈرۈپ ئارامى بۇزۇلغانىدى ، يۇلتۇزلار ئۈن-تىنسىز پىچىرلىشىپ ھەۋەسلىنىپ قارايتتى ، قەلبىم شۇقەدەر يېنىك ، تاڭ شەپىقىدەك شۇقەدەر بىخۇبار ئىدى . ئېھ ، سۆيۈملۈك قىزچاق ! ھايات دوقمۇشلىرىدا تىنەپ-تەمتىرەپ يۈرۈشلىرىمنى تاشلاپ ، تاڭ ئۇپۇقى بىلەن بالقىغان قارشى قىرغاققا ئۈنسىز قاراپ ئولتۇرۇپ ، ئاسمان سەتھىسىدىن ھېس-تۇيغۇلۇق ئاۋازىڭنى تىڭشايمەن . قەلبىمنىڭ خىلۋەت ساھىلىغا مېھىر-مۇھەببىتىم ، ئۈمىد-ئىستەكلىرىم ، ئوي-پىكىرلىرىم بىلەن ئاپپرىدە قىلغان مۇئەككىلىڭنى قۇچاقلاپ ، سېغىنىشلىق لەۋلىرىمنى سۈرۈپ قويىمەن . مەن خېلى ۋاقىتقىچە مۇشۇنداق ئولتۇردۇم ، تاكى سەن ۋىسال جامىنى كۆتۈرۈپ ئەكىلىپ ماڭا سۇنغىچە مۇشۇنداق ئولتۇرماقچىمەن . مانا مۇشۇ سەلتەنەتلىك ئۇلۇغ كۆرۈنۈشلەرگە لالە رەڭ قوياشنىڭ قانچىلىغان تەبەسسۇمى ، شاھانە كېچىنىڭ قانچىلىغان كۈيلىرى ، غېرىبانە يۇلتۇزلارنىڭ نەچچە رەت ئۈمىدلىك بېقىشلىرى يۇغۇرۇلغان _ ھە ! ھەي ، مېنىڭ سۈبھى يۇلتۇزۇم ، سەن نەقەدەر ئوماق ، نەقەدەر چىرايلىقسەن ! سەن مېنىڭ يەسىمەن گۈلۈم . يىللاردىن بىرى ، تۈننىڭ سىرلىق چۈمبەردىسىنى قايرىپ ، قوياش گۈلچەمبىرىكىنى بوينۇمغا ئېسىپ ، ماڭا ئۈمىد يولىنى كۆرسىتىپ كەلدىڭ . سۆيۈملۈك گۈلۈم ، سېنى كۈتىمەن ، سېنىڭ مېنى خىلۋەت ساھىلدىن قايتىپ ، ئارامبەخىش ھۇجراڭغا چاقىرىشىڭنى كۈتىمەن ...
يوللىغان ۋاقتى 2012-9-7 18:19:26
ياخشى چىقىپتىكەن.
