‹‹بۇ تاغ كىمگە ئوخشايدۇ››نىڭ جاۋابى
‹‹ بۇ تاش كىمگە ئوخشايدۇ››دىگەن بىر پارچە سۈرەت مۇنبەردە ئېلان قىلىنغاندىن كېيىن تۆت كۈنگە يەتمىگەن ۋاقىت ئىچىدە 20مىڭغا يېقىن تورداش بۇ تېمىنى چەككىنىنى كۆرۈپ بەك خوش بولدۇم ،مۇنبەردە يەنە بىر قىسىم تورداشلار بۇ تاشنىڭ سۇنۋۇكۇڭغا، ئىستالىنغا،لېنىنغا، ئۆزىگە ئوخشايدىغانلىقى توغرىسىدا ئىنكاس يېزىپتۇ، بەزى مۇنبەرداشلار ئۆزەمنىڭ جاۋاپ بېرىشىمنى تەلەپ قىلىپتۇ، مەن ئالدى بىلەن بۇ تېمىغا قىزىققان،چەككەن ۋە ئىنكاس يازغان مۇنبەرداشلارغا رەھمەت ئېيتىمەن.
ئەمدى‹‹بۇ تاش كىمگە ئوخشايدۇ››دېگەن سۇئالنىڭ جاۋابىغا كەلسەك، مەن بۇنىڭغا جاۋاپ بېرىشتىن ئىلگىرى ئازراق چۈشەنچە بېرىشىمگە توغرا كېلىۋاتىدۇ،مەن 2011-يىلى 7-ئايدا فوتوگىراف تۇرسۇنمەمەت ئوسمان بىلەن بىرگە تۇنجى قېتىم چاپچال ناھىيەسى تەۋەسىدىكى جۇڭگو- قازاقسىتان چېگراسىدىكى چوغلۇق گۈللىرى پورەكلەپ ئېچىلىدىغان، غايىۋى جەننەت دەپ تەرەپلىنىپ كېلىۋاتقان بۇ تاغقا چوغلۇق گۈللىرىنى سۈرەتكە تارتىش ئۈچۈن بارغان ئىدىم،شۇ يەردە ئاتا- بوۋىلىرىدىن تارتىپ چارۋا- مال بېقىپ كېلىۋاتقان بىر چارۋىچىنىڭ ئۆيىدە چاي ئىچىۋاتقىنىمىزدا ئاپپاق ساقاللىق بىر بوۋاي بىزگە بۇ تاغدا بەش سىرنىڭ يوشۇرۇنغانلىقى توغرىسىدا سۆزلەپ بەردى.
1.تىك بىر سىزىققا توغرا كېلىدىغان كىندىك شەكىلدىكى تاغنىڭ ھاۋا بوشلىقىدا بەزى چاغلاردا بۇلۇتلار ئادەم، ئۇچار قۇش ۋە ھايۋانلارنىڭ شەكلىدە كۆرۈنىدىكەن.
2.كىندىك شەكىللىك تاغنىڭ توپىسىدا خىزىر سۈپەت بىر بوۋاينىڭ قورام تاشتىن تەبىئىي شەكىللەنگەن بىر ھەيكىلى بولۇپ، ھەيكەلگە سەپ سېلىپ قارىسىڭىز بوۋاينىڭ قۇچىقىدا يېڭى تۇغۇلغان بىر بوۋاقنىڭ شېرىن ئۇيقىدا ئۇخلاۋاتقانلىقى، بوۋاينىڭ بوۋاقنى چىڭ قۇچاقلاپ ئولتۇرغانلىقنى كۆرىدىكەنسىز.شۇ يەردىكى چارۋىچىلار بۇ تاش ھەيكەلنى ماركىس، لېنىن،ئىسىتالىن،پۇتىن ياكى سىز تۇغۇلۇشتىن بۇرۇنلا بار بولغانلىقى ئۈچۈن‹‹خىزىر تاش››دەپ ئاتايدىكەن .
3.تىك بىر سىزىققا توغرا كېلىدىغان تاغنىڭ پەس تەرىپىدە يەنە بىر تۈپ قارىغاي بار بولۇپ، بۇ قارىغايمۇ بۇ تاغدىكى باشقا قارىغايلارغا پەقەت ئوخشىمايدىكەن چۈنكى بۇ قارىغاينىڭ تۆپىسىدە موگوسىمان ئۆسكەن يوغان قالپىقى بولغاچقا شۇ يەردىكى چارۋىچىلار بۇ قارىغاينى ‹‹ئەرلىك قارىغاي››دەپ ئاتايدىكەن.تاغقا كېرىش ئېغىزىدا يوغان بىر تۈپ تاغ تىرىكى بار بولۇپ، بۇ تېرەككە سەپسېلىپ قارىسىڭىز ھامىلدار بولغان ئايالنىڭ شەكلىگە ئوخشايدىكەن شۇڭا بۇ ئەتراپتىكى ھامىلدار بولمىغان ئاياللار،بالىسى توختىمىغانلار بۇ يەرگە كېلىپ تاۋاپ قىلىدىكەن،تاغ تېرىكىگە لاتا چېگىدىكەن،كىچىك بۆشۈك ياساپ بۆشۈك ئىچىگە قونچاق بۆلەپ تېرەككە ئاسىدىكەن،شۇ يەردىكىلەر بۇ تاغ تېرىكىنى‹‹بوغاز تېرەك››دەپ ئاتايدىكەن.‹‹بوغاز تېرەك››تىن تەخمىنەن 100مېتىرچە يىراقلىقتا بىر تەبىئىي بۇلاق بولۇپ، بۇ بۇلاقنى ‹‹شىپالىق بۇلاق››دەيدىكەن ھەم بۇ يەرگە بارغانلار بۇلاق سۈيىنى ئىچىپ بولغاندىن كېيىن بۇلاققا تەنگە پۇل تاشلايدىكەن.
ئەسكەرتىش: بۇ گۈزەل ھەم رىۋايەت تۈسىنى ئالغان جىلغىغا كىرىش ئېغىزىدا ئوتتۇرا ئاسىياغا تونۇلغان ئىلىدا ياشاپ ئۆتكەن ئاتاقلىق ئۇيغۇر كېلاسسىك شائىرى سەككاكىنىڭ مازىرى بار بولۇپ، چاپچال ناھىيەسىنىڭ يۇلغۇن، سوپۇن بۇلاق،قاينۇق،ئىتىپاق، جاغىستاي قاتارلىق ئورۇنلىرىدىكى ئامما ھەر يىلى شائېرنىڭ مازىرى بار يەرگە كىلىپ،شائېرنى يات ئىتىپ نەزىر-چىراق ئۆتكۈزۈپ تۇردىكەن. تۆۋەندە بۇ بەش سىرغا ئائىت سۈرەتلەرنىمۇ قوشۇپ ئەۋەتتىم كۆرۈپ ھوزۇرلانغايسىلەر .
يوللىغان ۋاقتى 2012-9-2 17:25:55
