«تاتلىق بالام»
(ھېكايە)
تاھىرجان نىياز
يەتتە ياشلىق قەيسەرجان بىلەن مۇخبۇلجان ھەم قوشنا ھەم باشلانغۇچنىڭ 1-يىللىقىدا بىر سىنىپتا ئوقۇيدىغان ساۋاقداشلار بولۇپ، ھەر كۈنى مەكتەپكە بىرگە بېرىپ كېلەتتى. دەرستىن چۈشكەندە تاپشۇرۇقنىمۇ بىر-بىرىنىڭ ئۆيىگە چىقىپ بىرگە ئىشلەيتتى،بىرگە ئوينايتى.ئۇلارنىڭ ئاتا-ئانىلىرىمۇ ئىناق قوشنىلاردىن بولۇپ كېلىۋاتاتتى.ھەر ئىككى ئائىلىنىڭ باشلىقلىرى بۇ يالغۇز ئوغۇللىرىغا بەك كۆيەتتى.«تاتلىق بالام»دېگەن ئەركىلەتمە سۆزنى ئېغىزلىرىدىن چۈشۈرمەيتتى.نېمە دېسە دېگىنىنى ئاساسەن قىلىپ بېرەتتى. قەيسەرجاننىڭ ئاتا-ئانىسى يەككە تىجارەتچى،مۇخپۇلجاننىڭ ئاتا-ئانىسى دۆلەت كادىرلىرى بولۇپ،مەلۇم ئىدارىدائىشلەيتتى. ھېيت-بايرام،ئارام ئېلىش كۈنلىرى قەيسەرجاننىڭ ئاتا-ئانىسى تىجارەت بىلەن ئالدىراش بولۇپ ئۆيىگە كېلەلمىگەندە، مۇخبۇلجاننىڭ ئاتا-ئانىسى ئارام ئالىدىغان بولغاچقا، تىجارەتچى قوشنىسىنىڭ بالىسىنى ئۆيىگە چاقىرىپ ئۈچ ۋاق تامىقىنى بېرىپ،ھالىدىن خەۋەر ئالاتتى.ئەگەر مۇخبۇلجاننىڭ ئاتا-ئانىسى خىزمەت،كوماندىروپكا سەۋەپلىك ئۆيگە كېلەلمىگەندە تىجارەتچى قوشنىسى بۇلارنىڭ بالىسىنىڭ تۇرمۇشىدىن خەۋەر ئېلىپ تۇراتتى.ئىككى ئائىلنىڭ بۇنداق ئىناق قوشنىدارچىلىق مۇناسىۋىتىگە ئەتراپتىكىلەر ھەۋەس قىلاتتى. كۈنلەر مۇشۇ تەرىقىدە ئۆتۈپ،ئۇلارنىڭ «تاتلىق بالا»لىرىمۇ 2-يىللىققا چىقىپ قالدى.بىر كۈنى مۇخبۇلجان بىلەن قەيسەرجان مەكتەپتىن قويۇپ بەرگەندە مەكتەپ تەنتەربىيە مەيدانىدا بىرگە،قارمۇ-قارشى ئىككى كوماندا بولۇپ پۇتبول ئويناۋېتىپ بىر-بىرىگە پۇتلۇشۇپ يىقىلىپ كەتتى ۋە شۇ سەۋەپلىك گەپ تالىشىپ ئۇرۇشۇپ قالدى.ئۇرۇشۇش جەريانىدا مۇشت ئېتىشىپمۇ قالدى.ساۋاقداشلىرى دەرھال ئاجرىتىۋەتتى.قەيسەرجاننىڭ قاپىقى ئازراق ئىششىپ قالدى.ئۇلار ئۆيگە قايتىپ كېلىشتى.قەيسەرجاننىڭ ئاتا-ئانىسى ئوغلىنىڭ قاپىقىنى كۆرۈپ ،يۈرىكى ئېچىشقان ھالدا نېمە ئىش بولغانلىقىنى سورىدى.قەيسەرجان ئەھۋالنى ناھايىتى تەسلىكتە دېدى. قەيسەرجاننىڭ ئاتا-ئانىسى بۇ گەپنى ئاڭلاپلا «نېمە، بۇ قەلەندەرنىڭ بالىسى مېنىڭ بالامنى ئۇرغىدەك بوپتۇما؟»دېگىنىچە مۇخبۇلجاننىڭ ئۆيىگە چىقىپ دەرۋازىنى تېپىپ،مۇخبۇلجاننى چاقىرىپ چىقىپ بىر نەچچە تەستەك سېلىۋەتتى.ئاڭغىچە مۇخبۇلجاننىڭ ئاتا-ئانىسىمۇ چىقىپ،« بالامنى نېمىشقا ئۇرىسەن؟»دەپ قەيسەرجاننىڭ ئاتا-ئانىسى بىلەن جېدەللەشتى.مۇشتلاشتى،چاچلارنى يۇلۇشتى.كالتەك-توقماق،كەتمەن-پىچاقمۇ كۆتۈرۈشتى.خولۇم-قوشنىلار ئارىغا كىرىپمۇ«جەڭ»نى بېسىقتۇرالماي، ساقچىخانىغا خەۋەر قىلىپ پاراڭنى مىڭ تەستە بېسىقتۇردى.شۇنىڭدىن باشلاپ بۇ ئىناق قوشنىلارنىڭ ئىناقلىقىغا دەز كەتتى .بىر-بىرىگە دۈشمەنلەرچە ئالىيىشىپ ماڭىدىغان بولۇشتى. ئەمما قەيسەرجان بىلەن مۇخبۇلجان بولسا ھېچنەرسە بولمىغاندەك ئەتىسىلا يەنە بىرگە ئويناپ دوستانە يۈرۈشتى.مەكتەپكە بىرگە بېرىپ كېلىۋاتاتتى.ئۇلارنىڭ كۆڭلىدە ئۇرۇشۇپ قالغان ئىش ئەسلا مەۋجۇت ئەمەس ئىدى.بىراق، بىر-بىرىنىڭ ئۆيىگە شۇنداق كىرگۈسى بولسىمۇ،نېمە ئۈچۈندۇر كىرىشكە پېتىنالمايدىغان بولۇپ قالدى.تاپشۇرۇقلىرىنى ئۆيلىرىنىڭ ئەتىراپىدىكى سالقىن جايلارغا بېرىپ بىرگە ئىشلەپ يۈردى .
تاھىرجان نىياز(شايار ناھىيەلىك رادىيو-تېلېۋىزىيە ئىستانسىسى)
يوللىغان ۋاقتى 
