دوستلىشايلى
مۇھەممەدئىمىن ھەسەن
زامانداش بىز- قېرىنداش بىز دوستلىشايلى
ئەھۋال سوراپ ئۆز-ئارا ھەم يوقلىشايلى
رەقىپلەشكەن نادانلىقتىن خوشلىشايلى
ئىلتىجا بۇ دوستلار يەنە دوستلىشايلى
بىر چاغلاردا خوشنا بولۇپ ئوينار ئىدۇق
قايسى ئۆيدە ئاش پىشسا ھەم بىللە يېدۇق
ئايرىلمايمىز ئاخىرەتلىك دوست بىز دېدۇق
ئەسلەپ بۇنى دوستلار يەنە دوستلىشايلى
بىر سىنىپتا ساۋاقداش بوپ ئوقۇغان بىز
بەزى كۈلۈپ بەزىدە ھەم چوقۇغان بىز
ھاياتلىققا دوستلۇق گۈلى توقۇغان بىز
ئەسلەپ بۇنى دوستلار يەنە دوستلىشايلى
خىزمەتداش بىز ئۇزۇن يىللىق بىللە ئۆتكەن
تەلەي كېلىپ بەزىمىزنىڭ ئەمەل ئۆسكەن
ئالدىراش دەپ دوست بولۇشقا ۋاقىت كۈتكەن
پۇرسىتىدە دوستلار يەنە دوستلىشايلى
ئادەم ئۈچۈن بۇ ھاياتتا دوستلۇق كېرەك
كۈن چۈشكەندە كىم ئەسقاتار دوستتىن بۆلەك
يالغۇزلۇقتا دوست ھەم بولۇر يار-يۆلەك
ئويلاپ بۇنى دوستلار يەنە دوستلىشايلى
بۇ ھاياتلىق بەكمۇ قىسقا تېزلا كېتەر
دوست قەدرىنى بىلمىگەننىڭ ھالى خەتەر
دوستى يوقنىڭ دەرت ھالىغا كىممۇ يېتەر
قەدىرلىشىپ دوستلار يەنە دوستلىشايلى
ئاپتور: قاغىلىق ناھىيە شاتلىق دوختۇرخانسىدىن
يوللىغان ۋاقتى 
