مۇسىبەتنامە
ئىلى چاقچاقچىلىرىنىڭ ساناقلىق ۋەكىللىرىنىڭ بىرسى،خەلقىمىزگە مەنىۋى ئازادىلىك بېغىشلاپ كىلىۋاتقان،ئۇيغۇر خەلقىنىڭ ''چاقچاق''سەنئىتىگە ئۆچمەس تۆھپىلەرنى قوشۇپ كىلىۋاتقان ئەل سۆيگەن خەلق قىزىقچىسى مەرھۇم تۇداخۇن روزاخۇن تاسادىپىي ھادىسىدە يۈرەك كېسىلى قوزغۇلۇپ،قۇتقۇزۇش ئۈنۈم بەرمەي 2012-يىلى چىللە ئېيىنىڭ 28-كۈنى يەنى رامىزان ئېيىنىڭ 9-كۈنى سائەت 3 دىن 45 مىنۇت ئۆتكەندە بىزدىن ۋاقىتسىز ئايرىلدى.
مەرھۇم تۇداخۇن روزاخۇن 1969-يىلى مىزان ئېيىنىڭ 4-كۈنى توققۇز تارا ناھىيە دۆڭمەھەللە يېزا ئۇچقۇن كەنتىدە دېھقان ئائىلىسدە دۇنياغا كەلگەن.ئوقۇش يېشىغا تولغاندىن كېيىن ناھىيەلىك چولپان باشلانغۇچ مەكتەپ ۋە 3-ئوتتۇرا مەكتەپتە ئوقۇغان.1998-يىلدىن 2001-يىلغىچە مەملىكەتلىك قانۇن خىزمەتچىلىرىنىڭ ئىشتىن سىرتقى قانۇن ئۇنىۋېرسىتېتىنىڭ قانۇن كەسپىنى تاماملاپ قانۇن مۇلازىمەت كەسپى بىلەن شۇغۇللانغان.
مەرھۇم تۇداخۇن روزاخۇن 1990-يىللىرىدىن باشلاپ ئۆزىنىڭ تىل سەنئىتى ئۈستىنلىكى بىلەن تەڭرىتېغىنىڭ جەنۇپ شىمالىدىن تاكى ئوتتۇرا ئاسىيادىكى قېرىنداش خەلقلەر ئارىسىغىچە ئاجايىپ ئېسىل كۈلدۈرگە چاقچاقلىرىنى يەتكۈزگەن ئىدى.ئۇنىڭ مول ۋە مەنىلىك سەنئەت ھاياتى ۋە ناھىيە مائارىپىغا كۆڭۈل بۆلگەن ئۈلگىلىك ئىش -ئىزلىرى شىنجاڭ ئۇيغۇر ئاپتونوم رايونىدىكى نوپۇزلۇق گېزىت-ژۇرناللاردا ۋە"چاقچاقچىلار چايخانىسى" قاتارلىق كىتابلاردا ئالاھىدە تونۇشتۇرۇلغان.
مەرھۇم تۇداخۇن روزاخۇن ھايات ۋاقتىدا ئىلى چاقچاقچىلىق سەنئىتىدە ئۆزىگە خاس پەللە ياراتقان خەلىق قىزىقچىسى ئىدى.ئۇنىڭ ۋاپاتى ئائىلە تاۋابائاتلىرى ۋە ئۇرۇق-تۇققانلىرىغىلا چوڭ يوقۇتۇش بولۇپ قالماستىن،بەلكى ئىلىنىڭ،جۈملىدىن ئۇيغۇر خەلقىنىڭ چاقچاق سەنئىتى ساھەسى ئۈچۈنمۇ ئورنىنى تولدۇرغىلى بولمايدىغان چوڭ يوقىتىشتۇر.
مەرھۇم ھايات ۋاقتىدا شىنجاڭ ئۇيغۇر ئاپتونوم رايونلۇق خەلق ئېغىز ئەدەبىياتى جەمئىيىتى،ئىلى ئوبلاستلىق خەلق ئېغىز ئەدەبىياتى جەمئىيىتىنىڭ ئەزاسى ئىدى.
گەرچە مەرھۇم بىزدىن ۋاقىتسىز ئايرىلغان بولسىمۇ،ئۇنىڭ ھايات ۋاقتىدا خەلىقكە بەرگەن كۈلكە-چاقچاقلىرى بىزدىن مەڭگۈ ئايرىلمايدۇ،بىز چوڭقۇر قايغۇلۇق ھېسسىياتىمىز بىلەن مەرھۇمنى مەڭگۈ سېغىنىپ ئەسلەيمىز.كېرەملىك ئاللاھ مەرھۇمنىڭ ياتقان جايىنى جەننەتتە قىلغاي!
يوللىغان ۋاقتى 2012-7-30 22:49:42
