زوڭلاڭ سەيلىگاھى
مۇساجان ياسىن
قاغىلىق ناھىيە مەركىزىنىڭ شەرقىدىن بەش كىلومېتىر كېلىدىغان جايىدا شىنجاڭ –شىزاڭ تاشيولى باشلىنىدىغان <<ئاچال>>يەنى،نۆل كىلومېتىر دەيدىغان بىر جاي بار.بۇ جايدىن جەنۇپقا قاراپ،14كىلومېتىر ماڭغاندىن كېيىن، شەرقىي –جەنۇپقا قايرىلىپ ئوتتۇرا كىچىك سۇ ئامبىرى ۋە سۇ ئېلېكتىر ئىستانسىدىن ئۆتۈپ،ئۇلۇغ ئۆستەڭ دەرياسىنىڭ قىنىنى بويلاپ،جەنۇپقا قاراپ ئالتە كىلومېتىر ماڭسىڭىز،كۆز ئالدىڭىزدا ياپيىشىللىققا پۈركەنگەن يېڭى بىر دۇنيا نامايان بولىدۇ. مانا بۇ- سەيلىگاھ ،قاغىلىق ناھيەسىدىكى زوڭلاڭ يېزىسىنىڭ ئاياغ ئۇچىغا جايلاشقان زوڭلاڭ مازىرىدۇر.
تاغ،سۇ ۋە يېشىللىق مەنزىرلىرى مۇجەسسەملەنگەن تەبىئي سەيلىگاھتا بۇلاق سۇلىرى ھەممە جايدا زۇمرەتتەك كۈۋەجەپ تۇرىدۇ، تۇپرىقى نەمخۇش ،يەر يۈزىنى ياپيېشىل ئوت -چۆپلەر قاپلاپ تۇرىدۇ. ئۇلۇغ ئۆستەڭ دەرياسىنىڭ شەرقىي قىرغىقىدا ئىگىزلىكى 140مېتىر كېلىدىغان تاشلىق چال قەد كۆتۈرۈپ تۇرىدۇ.چالىنىڭ چوققىسىدا <<سۇلتان سۈبۈر ئاتا ۋەلى غازى>>نىڭ قەبرىسى بار.چالىنىڭ ئاستىدىن بۇلاق سۇلىرى تەپچىپ چىقىپ تۇرىدۇ ۋە ئاستى تەرەپتىكى دىئامېتىرى تۆت مېتىرچە كېلىدىغان، <<ئاغۇ بۇلاق>> دەپ ئاتىلىدىغان (كىشىلەر<< ئايغىر بۇلاق >> دەپ ئاتىشىدۇ) يۇمىلاق بۇلاققا چۈشۈپ، ئايىغى دەرياغا قۇيۇلۇپ كېتىدۇ.چالىنىڭ تۈۋىدە 100نەچچە يىلدىن ئاشقان تۆت تۈپ قەدىمىي سۆگەت دەرىخى بار بولۇپ، دىئامېتىرى بىر مېتىردىن ئارتۇق كېلىدۇ؛ بۇ سۆگەتلەرنىڭ تېنىسى بىر نەچچە جايدا يەرگە پېتىپ ،يىلتىزلاپ،يەنە يۇقىرغا قاراپ ئۆركەشسىمان ئۆسكەن بولۇپ، بۇ ھال بۇ جاينىڭ مەنزىرىسىگە سىرلىق تۈس بېرىپ، سىزنى ئاجايىپ خىيالى دۇنياغا كىرىپ قالغاندەك تۇيغۇغا كەلتۈرىدۇ. ئەگەر سىز غەيرەت قىلىپ چالغا يامىشىپ چىقسىڭىز ،توپىدىكى قىرنىڭ جەنۇبىدا قەدىمقى جەڭگاھىنىڭ قالدۇق ئىزلىرىنى كۆرىسىز . مازارنىڭ جەنۇپ،شىمال تەرەپلىرىدىكى چالىنىڭ ياپىسىدا قۇمۇش ۋە يۇلغۇن قاپلاپ كەتكەن قەدىمىي قەبرىستانلىق بار .ھازىر ،مازارغا تەئەللۇق نەرسىلەردىن چالىنىڭ تېگىدىن بىر ئېغىز تاش ئۆي ساقلىنىپ قالغان .1990-يىلدىن كېيىن بۇ جاينىڭ تەبئىي ئەۋزەل شارائىتى ناھىيە ۋە يېزىنىڭ دىققىتىنى قوزغاپ، مەبلەغ سېلىپ، قايتا قۇرۇش ئىشىنى باشلىغان. ھەر يىلى كۆچەت تىكىش بايرىمى مەزگىلىدە ناھىيە ۋە يېزىدىكى ئىدارىلەر ۋە كەسپىي كارخانا -ئورۇنلاردىكى ئىشچى –خىزمەتچىلەر ۋە ئوقۇغۇچىلارنى سەپەرۋەر قىلىپ،ئېرىق چېپىپ،يول ئېلىپ،جىرىم سېلىپ،شىپاڭ ياساپ، تۇربىلاشتۇرۇپ، سېستىمىلىق يېڭىلىق ئېلىپ بېرىپ، زوڭلاڭ مازار تەبىئىي مەنزىرىلىك ساياھەت ئورنىغا ئايلاندۇرغان، يىراق-يىقىندىن كىشىلەر كېلىپ، باھار سەيلىسى قىلىپ قايتقان.
1982-يىلى ناھىيەلىك تۇپراق تەكشۈرۈش ئەترىتى بۇ جايدىكى 3.75مېتىر چوڭقۇرلۇقتا قېزىلغان تۇپراق كەسمە يۈزىدىن تۇخۇم شاكىلى،ئوتۇن كۆمۈرى قاتارلىقلارنى بايقىغان .بۇنىڭدىن بۇ جايلاردا 3750يىل ئىلگىرى ئىنسانلار مەدەنىيەت پائالىيتىنىڭ بولغانلىقىنى قىياس قىلىش مۇمكىن .بۇ جاي ھازىر ئاپتونوم رايون دەرىجىلىك قوغدىلىدىغان ئورۇن بولۇپ،ناھىيەنىڭ ساياھەتچىلىكىنى تەرەققىي قىلدۇرۇش پىلانى بويىچە بۇلتۇر 6-ئايدا ئالتە مىليون مەبلەغ سېلىنغان زوڭلاڭ ساياھەت ئورنى پۈتۈش ئالدىدا تۇرماقتا .
يوللىغان ۋاقتى 2012-7-30 14:41:56
بۇ يازمىنى ئاخىرىدا TEREXQAN تەھرىرلىگەن. ۋاقتى 2012-7-31 01:27 
