شىنجاڭ ئۇيغۇر ئاپتونوم رايونى مائارىپ نازارىتىنىڭ رەھبەرلىرى خېجىڭدا
شىنجاڭ ئۇيغۇر ئاپتونوم رايونى مائارىپ نازارىتىنىڭ مۇئاۋىن نازىرى قەيسەر شابانباي ، مائارىپ نازارىتى ئاساسى مائارىپ بۆلۈمىنىڭ بۆلۈم باشلىقى موۋۋېن شىن ۋە ئۇلار بىلەن بىرلىكتە كەلگەن مۇناسىۋەتلىك رەھبەرلەر ، ئوبلاست ۋە ناھىيەمىزنىڭ مائارىپقا مەسئۇل رەھبەرلىرى بىلەن بىرلىكتە خېجىڭ ناھىيەلىك 3-باشلانغۇچ مەكتەپنىڭ ئۆلچەملەشكەن مەكتەپ قۇرۇش خىزمىتىنى تەكشۈردى. مەكتىپىمىزدىكى بارلىق ئوقۇتقۇچىلار ئۆزلىرىنىڭ مىللىي كىيىملىرىنى كىيىپ ، ئۇلارنى قىزغىن كۈتۈۋالدى. مەكتىپىمىز مۇدىرى تايىر قاسىم تەكشۈرگۈچىلەرگە مەكتەپنىڭ ئومۇمىي ئەھۋالىنى تونۇشتۇردى. قەيسەر شابانباي ھەر بىر ھالقىلارنى ئىنچىكىلىك بىلەن كۆرۈپ ، مەكتەپ رەھبەرلىرى ۋە ئوقۇتقۇچىلار بىلەن ئەركىن مۇنازىرە ئېلىپ باردى . مەكتىپىمىزدىكى رەھبەرلەر ۋە ئوقۇتقۇچىلار سورىغان سوئاللارغا تەمتىرىمەستىن ناھايىتى ياخشى جاۋاپ بەردى.قەيسەر شابانباي ئۆلچەملەشكەن مەكتەپ قۇرۇش خىزمىتىنىڭ مۇھىملىقىنى تەكىتلەپ ئۆتتى. شۇنىڭ بىلەن بىرگە ئەسلىھەلەرنىڭ تولۇقلىنىش ئەھۋالىنى تەكشۈردى. نەق مەيداندا ئوقۇتقۇچىلارغا مەشغۇلات قىلدۇرۇپ، ئۇلارنىڭ قابىلىيىتىنى سىناپ كۆرۈپ باقتى. ئوقۇتقۇچىلاردىن ئۆلچەملەشكەن مەكتەپ قۇرۇش جەريانىدىكى قىيىنچىلىقلارنى، شۇنىڭدەك تولۇقلاشقا تېگىشلىك ئەسلىھەلەرنى سوراپ ئۆتتى ھەمدە ناھىيە رەھبەرلىرىنىڭ مەكتىپىمىزنىڭ ئەسلىھەلىرىنى ئىمكانقەدەر تولۇقلاپ بېرىشىنى تەكىتلىدى. ناھىيە رەھبەرلىرى پۈتۈن كۈچى بىلەن خىزمەتلەرنى ياخشى قانات يايدۇرۇشقا كاپالەت بەردى.
يوللىغان ۋاقتى 2012-7-26 00:31:07
