سۈرەتلىك ھېكايە
1. بۈگۇن چۈشكە يېقىن ئايالىم تاپشۇرغان مۇقەددەس ۋەزىپىنى ئورۇنداش ئۈچۈن بالكوندىكى ئوچاق بېشىغا چىقىپ ، تاماق تەييارلىقىنى قىلىشقا باشلىدىم . كۆزۈم ئالدىمىزدىكى بىنا بىلەن بىز ئولتۇرغان بىنانىڭ ئارىلىقىدىكى كەپە ئۆينىڭ ئۆگزىسىدە يۈرگەن ئىككى ئادەمگە چۇشۇپ قالدى . سىنچىلاپ قارىسام ئۇلار بىزنىڭ رايونىمىزنى باشقۇرىدىغان ئاھالىلار كومېتىتىنىڭ ئىككى كادىرى ئىكەن . ئۆگزە ھەر خىل ئەخلەت بىلەن تولغان بولۇپ ، ئىككەيلەن ئەخلەتنى تازىلاشقا باشلىدى . مەن بۇ بىر ياخشى ئىش ئىكەنلىگىنى ھېس قىلىپ ، دەرھال ئاپپاراتىمنى ئېلىپ چىقىپ ، ئۇلارغا تۇيدۇرماستىن سۈرەتكە تارتىپ قويدۇم .
2. مەن ئاشخانىدا تۇرۇپ، ئۇلارنىڭ قىلىۋاتقان ئىشىنىڭ تەرەققىياتىغا دىققەت قىلىپ كېلىۋاتاتتىم . ئۇلار ئالدىرىمايتتى ، بىردەم ئۇنى يىغسا بىردەم سۈپۈرۈپ قوياتتى ، ئاندىن تېلېفوندا سۆزلۈشۈپمۇ قوياتتى. بىرەيلەن قولىدىكى ئىشنى توختۇتۇپ قويۇپ ، يانچۇغىدىن بىر نەرسە ئېلىپ ، ئالدىدىكى ئەخلەتكە توغرىلاۋاتاتتى . قارىسام بالا ئاپپارات بولۇپ ، ئەخلەتنى سۈرەتكە تارتىشقا تەمشىلىۋاتاتتى . مەن دەرھال ئاپاراتىم بىلەن بۇ كۆرۇنۇشنى خاتىرىۋالدىم . كۆڭلۇمدە «ئۇ قانچىلىك ئەخلەتنى تازىلىغانلىقىنىڭ ئىسپاتىنى قالدۇرىۋاتقان بولسا كېرەك» دەپ ئويلاپ ئىشىمنى قىلىۋەردىم .
3. ئىش بۇنىڭ بىلەن تۈگىمەيدىغاندەك قىلاتتى . ئۇلار يەنە قولىدىكى ئىشنى توختاتتى . مەن يەنە نېمە ئىش يۈز بېرەر دەپ ھەيرانلىق بىلەن قاراپ تۇرسام ، ھېلىقى ئاپپاراتى بارى يانچۇقىدىن ئاپپاراتىنى چىقىرىپ ، يەنە بىرسىنىڭ قولىغا تۇتقۇزۇپ ، ئۆزى سۈپۈرگىنى تۇتۇپ مەغرۇر ئەمگەك قىلىۋاتقان قىياپەتتە سۈرەتكە چۈشتى ، ئىككىسى ئالمىشىپ يەنە بىرسى بولسا گۈرجەك بىلەن ئەخلەت يېغىۋاتقان قىياپەتتە سۈرەتكە چۈشتى . كۆز ئالدىمدىكى بۇ كۆرۈنۈشلەر گەرچە مېنى بىر كۈلكىگە قىستاپ ، بىر ئاللىقانداق خىياللارغا كەلتۇرگەن بولسىمۇ يەنىلا چاقماق تېزلىگىدە خاتىرىلەپ ئالدىم .
4. ئىش يەنە ئالدىرىماي داۋاملىشىۋاتاتتى ، مېنىڭمۇ ئەتكەن ئېشىم پىشاي دەپ قالغان ئىدى . ئۇلار ئەخلەتنىڭ كۆپ قىسمىنى خالتىغا قاچىلاپ تۆۋەنگە تاشلىۋەتكەندىن كېيىن ، يەنە نېمىلەرنىدۇر ئويلىغاندەك قىلىپ ، قولىغا ئاپپاراتىنى ئېلىپ ، پاكىزرەك قىلغان يەرنى سۈرەتكە تارتىپ ، قىلىپ بولالمىغان قىسمىنى قالدۇرۇپ قويۇپ ، ئۆگزىدىن چۈشۈپ كەتتى ...
5. مەنمۇ بىراز ئەخلەت بىلەن قالغان ئۆگزىنى ئاخىرقى قېتىم بىر پارچە سۈرەت تارتىپ بولۇپ ، چوڭقۇر ئويغا غەرق بولغان ئىدىم .... ئەگەر دەۋىرداش بولغان بولساق ئوي پىكرىمىزدە كۆپ پەرق بولمايدۇ . دەۋىرداش بولمىساق ، ياش جەھەتتە پەرقىمىز بولسا ئەلۋەتتە پىكىر خىيالىمىز ئوخشاش بولمايدۇ . قېنى يۇقارقى كارتىنە سىزدە قانداق تەسىرات ۋە ئوي پىكىر پەيدا قىلدىكىن ؟ | 
يوللىغان ۋاقتى 2012-7-17 17:00:41
يوللىغان ۋاقتى 2012-7-17 18:15:28
