ئاقسۇ دەرياسىنىڭ لاتقىسىدەك ۋەيرانە يۈرۈكۈمدىن چاغاندا ئېتىلغان پوجاڭزىدەك سالام!
ھۆرمەتلىك: كۆزى پولتاي، ئېغىزى دورداي جانانىم: ئايپاتەمياخشىمۇسىز؟ كۈنلىرىڭىز ئاران مېڭىۋاتقان تېراكتۇدەك ياخشى كېتىۋاتامدۇ؟ ئىسلىۋەتكەن دوقمۇشتەك سۆرۈن تەلەتىڭىز قەدىر ئەھۋالمۇ؟ يىرتىلىپ كەتكەن كالاچتەك كۈلۈپ يۈرەمسىز ياكى يىغىدىن ماڭقىلىرىڭىز چۇۋۇلۇپ كەتسە ئانىسىنى ئىمىۋاتقان موزايدەك يالاپ يۈرەمسىز؟ بىزدىن ئەھۋال سورىسىڭىز، بىزمۇ بىكارچىلىقتا ئالدىراش يۈرۈيمىز. دەرىسلەرنىڭ ئاسانلىقىدا كىتاپلارنىڭ ئۈستىدىن ئۆزىمىزنى ئېتىۋالغۇدەك بولىۋاتىمىز. مەكتەپ يوللىرىنى كۈندەچىڭداپ، كۆزياشلىرىمىز بىلەن سۇ سېپىۋاتىمىز.
مەقسەتكە كەلسەك: بەئەينى پايتىمىدەك سۆرىلىپ، ئىتقا چاپلاشقان سالجىدەك چاپلىشىۋالغان ھېلىقى مەرەزنى باياتىن ئەسكى چاپاننى چۆرىگەندەك چۆرىۋتكەنىدىم، ئەمدى زېرىكىپ سىزگە خەت يىزىۋاتىمەن. دىسەم دىمىسەم، سىز ئۇنىڭدىن بەش تاپان ئاشسىڭىز ئاشىسىزكىن ھەرگىز ئارقىدا قالمايسىز . سىز بەلكىم يۇندىسىنى ئىت، تۈتۈنىنى بۇلۇت كۆرمەيدىغان بىر پىخسىققۇ دەيمەن. سىزنى ھەردائىم تەسەۋۋۇر قىلسام، كۆزىڭىز ئەلەس، يۈزىڭىز چوقۇر، ئوڭ پۇتىڭىز توكۇر، بۇرنىڭىز پۇچۇق، ئىڭىكىڭىز سوقا، تەقى-تۇرقىڭىز بەئەينى بۇقا، ئىككى مۈرىڭىز بېشىڭىزدىن ئىگىز، كالپۇكىڭىز سىرتقا چىقىپ تۇرغان، ھىڭگاڭ چىشلىرىڭىز بەئەينى بىگىز، يۈزىڭىز يايپاڭ، قۇلىقىڭىز سالپاڭ، ئۆزىڭىز ئۆتۈپ كەتكەن ھورۇن ھەم گالۋاڭ. كۆزىڭىزدىن ياش، ئېغىزىڭىزدىن شۆلگەي كەم بولمايدىغان، بۇنى ئاز دەپ گەپ قىلغاندا كېكەچلەيدىغان، ئامىرىكا، ئەنگىلىيە، ياۋرۇپانىڭ داڭلىق پوشكىلىنىڭ قېتىقا يۆگەپ چوڭ يولغا تاشلاپ قويسا، كوچىدىكى لالما ئىتمۇ پۇراپ قويمايدىغان مۇبارەك تېنىڭىز ھىدرو – سۇلفىتتىنمۇ ئۆتە پۇرايدىغان قىياپىتىڭىز، ئىسسىق تېنىمدىن مۇزدەڭ تەرلەرنى ئاققۇزۇپ، پاھ دېگەن ھالدا ئاھ دەپ كۆيدۈرىدۇ. ئوتىڭىزدا گۈلخان ، دەردىڭىزدە دەريا بولۇپ، كېچىلىرى سىز بىلەن سامان يولىدا يۈرۈپ چۈشەيدىغان بولۇپ قالدىم. سىزگە كۆيۈش ئەھدىمدۇر، سىزنى سۆيۈش پەخرىمدۇ. سىز بىلەن دىدارلىشىپ مەخپى بىرگە ئۆتۈش ئارمىنىمدۇ. ئەگەر قوشۇلسىڭىز، جالدۇر-جۇلدۇر ئاشخانامنى تەڭ ئاچاتتۇق. قەلەندەرلەر تاۋىقىدا بىرگە تاماق يەيتۇق. ئېشىپ قالغان تاماقلارنى بېرىپ بولسىمۇ، سىزگە ياخشى قارايتىم. كۆمۈر تارتالمىغان پويىزدەك ئاۋازىڭىز بىلەن خېرىدار چاقىرىپ بەرسىڭىز، سۆيۈنچە ئۈچۈن گىلدىڭ باشلار دېسكو خانىسىغا ئاپىرىپ، تېكىدەك سەكرىتىپ، بەش مىنۇت ئوينىتىپ كېلەتتىم. قايتىپ كەلگەندىن كىيىن، ئۈزۈپ تاشلاپ گاڭپەن قىلىپ بېرەتتىم. سىزنى رازى قىلاتتىم. بولامدۇ قانداق؟ ئويلىشىپ باقامسىز؟
جاۋابىڭىزنى تىرنىقىمنى چىشلەپ ، قوللىرىمنى غاجاپ تۆت-بەش كۆزۈم بىلەن كۈتىمەن. نا ئۈمىتتە قويمىغايسىز.
سىزگە يوشۇرۇن كۆيۈپ يۈرگۈچى: ….قېنى دەڭە مەن كىم؟
| 
يوللىغان ۋاقتى 2011-10-9 04:02:59
يوللىغان ۋاقتى 2011-10-9 11:45:19
