قاينامى شېئىرىلىرىدىن تاللانما

爱你一万年?????

	قاينامىغا قىسقىچە ئىزىھات: ئابدۇرەھىم ياسىن قاينامى : 1975-يىلى 8-ئاينىڭ 17-كۈنى قورغاس ناھىيەسىدە  دېھقان ئائىلىسىدە تۇغۇلغان.تۈرلۈك سەۋەپلەر تۈپەيلىدىن تولۇقسىز ئوتتۇرىغىچە ئوقۇيالىغان.شۇندىن بېرى دېھقانچىلىق ھەم ئۇششاق تىجارەت بىلەن شۇغۇللىنىپ كېلىۋاتىدۇ.ئۇنىڭ ئەدەبى ئىجادىيىتى 1996-يىلىدىن تارتىپ باشلانغان بولۇپ ھازىرغىچە ئۇيغۇر ئاپتۇنۇم رايۇنىدىكى تۈرلۈك ئۇيغۇرچە مەتبۇئاتلاردا 250 پارچىغا يېقىن شېئىر ۋە نەسرلىرى ئېلان قىلىنغان.‹‹تەڭرىتاغ››،‹‹ئىلى دەرياسى››قاتارلىق مەتبۇئاتلاردا تەرجىمىھاللىرى بېرىلگەن ، بىر قىسىم شېئىر ۋە نەسىرلىرىگە ماقالە ، ئوبزۇرلار يېزىلىپ مۇئەييەنلەشتۈرۈلگەن.ئۇ ئىزچىل ھالدا شېئىر ۋە نەسر ئىجادىيىتى بىلەن شۇغۇللىنىپ كېلىۋاتىدۇ... پىنھاندىكى غېرىپسىنىش ساھىللاردا يۈرىمەن تېنەپ ، يۈزلىرىمنى سۆيىدۇ شامال . ھېسلىرىمدا تۈنەيدۇ ئازاپ ، تەبەسسۇملار تىترەر بىماجال . چەكسىزلىككە باقىمەن مۇڭلۇق ، خىياللىرىم چايقىلار ئەمما . تۇمان ئىچرە كۆرۈنەر ئۈمىد ، بىراق شۇنچە سىرلىق مۇئەمما . تىۋىشسىزلا دولقۇنلار ئازاپ ، پىنھانلاردا يېرىلار ھەسرەت . ۋىسالسىز شۇ قايغۇ-زارىمنى ، ساھىللارغا ئېيتتىم نەچچە رەت . يۈرەكلىرىم بىر غەلۋىرسىمان ، ئازاپلارنى قالماس يۇشۇرۇپ . ۋۇجۇدۇمغا سىڭگەن ئۇھسىنىش ، تىلەكلەرگە كېتەر قوشۇلۇپ... ( 1996.03.21 ) زارىقىش سېغىنىشقا ئورۇلۇپ يۈرەك ، سۈرىتىڭگە قارايمەن تۇيماي . نۇرلىنىدۇ خانەمدە ئىللىق ، شۇنچە تونۇش ماھى بىر چىراي . سۈكۈت بىلەن تەلمۈرۈپ ئۇزاق ، قارچۇغۇمدا سەن كەتكەن تەرەپ . پوچتالىيۇن كەلمەيدىغۇ ھېچ ، يۈرىكىمگە تەسەللى سۆرەپ . ئارام تاپار زارىقىش نىھال ،   سۈرىتىڭگە باغرىمنى ياقسام . ئاپتۇبۇستا خوش دېگەن دەملەر ، كىرىپ قاپتۇ چۈشۈمگە ئاخشام... ( 1996.03.27 ) ئالداپ قويدۇڭ ئۆزۈڭنى ئەمما تۇزۇپ كەتكەن پەيلىرىم تامام ، ئاتا قىلغاچ خۇشاللىق ساڭا . ئۇچۇپ كەتتىڭ يىراققا تەنھا ، پەرۋاز قىلدىم يەنىلا كۆكتە . ئۈمىد بەرگەچ بىر قانات ماڭا ، تەڭرىم نۇسرەت بەردى ھەم يانا . قەپەسلەرگە مەھكۇم بوپ يۈرەك ، تۇرماس ئەمدى ئۈنسىز ياش تۆكۈپ . تىلەمچىدەك بىلىنىپ ساڭا ، ئالدانمىدىم مەن ساڭا زىنھار . دېمەك سەنمۇ ئالدىيالمىدىڭ ، ئالدايمەن دەپ مېنى دىلرەبا ، ئالداپ قويدۇڭ ئۆزۈڭنى ئەمما... ( 1996.04.25 ) سۇناي ساڭا بىر قەدەھ مەينى سۇناي ساڭا بىر قەدەھ مەينى ، كەل تارتىنماي ئالغىن پەرىشتەم . يېتىرقىما بولما دەرگۇمان ، مەن تەرەپكە تاشلىغىن قەدەم . سۇناي ساڭا بىر قەدەھ مەينى ، كەلگىن ئۇنى ئالغىن قولۇڭغا . ئېيتاي ساڭا چوڭقۇر تەشەككۈر ، مەيلى راۋان بولغىن يولۇڭغا . سۇناي ساڭا بىر قەدەھ مەينى ، دىل خانەمگە ياققىن سەن چىراق . ئىچىۋەتكىن مەينى سەن تۈگەل ، قايتۇرۇپ بەر رومكىنى بىراق . ( 1996.04.28 ) ئىڭرىغان تىلەك ئايرىلدىم،ئايرىلدىڭ كەتتىڭ يول ئېلىپ ، چايقالغان دەملەردە مىسكىن بۇ روھىم . سەن كەتتىڭ ئەقلىمنى قويدۇم كاچاتلاپ ، چىڭ تۇتۇپ قېلىشقا يېتەتتى قۇربۇم . كولدۇرما ئاۋازى كەتتى يىراقلاپ ، توزانلىق يوللارغا كۆمۈلدى ۋىسال . يالقۇنلۇق ئۇپۇقتىن ئارمانلار سۈزۈپ ، ئەقىدەم بېتىگە رەڭ بېرەر خىيال . ئايرىلدىم،ئايرىلدىڭ كەتتىڭ يول ئېلىپ ، نىگاھلار ھەسرەتتىن ياسىدى قانات . بۇژغۇنلار ئىچىدە ئىڭرىغان تىلەك ، بەختكە پال سېلىپ يۈرىدۇ ھايات... ( 1996.12.05 )