مۇھەببەت ئىلتىجاسى

Hiyalparas

         مۇھەببەت ئىلتىجاسى

ئۇھسىنىپ قالدىم يەنە غەمگە پېتىپ،
ئاھ! نېچۈن بۇنچە بولدى دىل بىئارام.
تىلغىنىپ كەتكەندەك ئېچىشار يۈرەك،
تەپچىرەپ قىزىل قان،سويۇلۇپ يارام.

پەرۋاسىز «مەن» قېنى، قالدى نەلەردە؟
ئۆتمۈشكە قايتقىم بار ئىزىمنى بويلاپ.
بىراق بۇ ئاسىي روھ باقماس مەيلىمگە،
خىيالىي بىرىنى مەھكەم قۇچاقلاپ.

بەزىدە تەن بېرىپ قالىمەن جىمىپ،
خىيالىي بولسىمۇ شىرىنلىكى راست.
ئەمما، ھەي!…ئەقلىمگە كەلگەندە توۋا،
نېمانچە قاراڭغۇ، ئۈمۈدسىز ھايات.

شىرىنلىك پەقەتلا خىيالدا مەۋجۇت،
ھەقىقەت_ۋىسال ئۇ، يىراق بەك يىراق.
توختىماس سېغىنىش، ئىزتىراپ چېكىش،
قىينايدۇ بىر خىلدا رەھىمسىز پىراق.

زېرىكىپ قالىمەن بەزى ئۆزۈمدىن،
ئامراقمەن ئازاپقا زادى نېمىشقا.
ۋىسال يا ئۇنتۇشنى قىلساڭچۇ نىسىپ،
قىلىمەن كىمگىدۇر شۇنداق ئىلتىجا.
           
      _خىيالپەرەس.   2014-يىل     23-دېكابىر.

نۇرلان

شېئىر خېلىلا ياخشى يېزىلىپتۇ، يەنىمۇ تىرىشىڭ.

ئۆمۇرۇم

بۇنداق ھىسياتتىكى ئادەم مەنلىمىكىن دىسەم يەنە بىرسى باركەنغۇ

سىھىر

قەدىرلەپ ئۆتكۈزگىن ھەر بىر مىنۇتنى ،
ئۆتكەن كۈن كەلمەيدۇ ئەمدى قايتىدىن.
كەينىڭگە تاشلىۋەت ،باققىن ئالدىڭغا،
ئازات قىل ئۆزۈڭنى دەردۇ -ئازاپتىن.

سۈيۈشمۇ سۆيۈلۈش ئۈچۈندۇر بىلسەڭ،
بولدى قىل بۇنچىلىك بولما بىئارام.
قىينىما ئۈزۈڭنى ھايات بەك قىسقا،
بىر كۈنلەر كىلىدۇ دەردىڭگە دەرمان.

بەك قاملىشىپ كەتمىسىمۇ ئازراق ئىنكاسلىق شىئىر يىزىپ باقتىم،،،،ھەر بىر ئادەم ئەڭ ئاۋال ئۈزىنى ،ئاندىن باشقىلارنى سۈيۈشى كىرەك،،،شىئىرىڭىز بەك ياخشى چىقىپتۇ ،ھارماڭ