روھلاندا ھېيىت نەزمىسى (ھېيىتلىق تىلەكلەر)

نۇرلان

         روھلاندا ھېيىت نەزمىسى
          (ھېيىتلىق تىلەك)

بەركەت تىلەپ ئەھلى ئالەمگە،
مېھىر چېچىپ كۇللى خانەمگە.
سۇلغۇنلارنى چۆمدۈرۈپ رەڭگە،
يېتىپ كەلدى ئۇلۇغ روزا ھېيىت.

قۇتلۇق ئاينىڭ شاپائىتى ئۇ،
رامىزاننىڭ ساخاۋىتى ئۇ.
كۆڭۈللەرنىڭ ھارارىتى ئۇ،
دەل-دەرەخلەر توقۇيدۇ بېيىت.

بالىلاردا ئالەمچە شادلىق،
ساما سالار بولۇپ قاناتلىق.
ھېيىت ئاقچىسى ئاجايىپ تاتلىق،
كۈندە نېسىپ بولماس بۇ بەخىت.

ئانلارنىڭ چېھرى قۇياشتەك،
داستىخانلار دىلغا تۇتاشتەك.
ھويلا-ساراي، گىلەم ئوتقاشتەك،
پاكىزلىقى ئىمانغا تەخىت.

ئاتىلارنىڭ چىرايىدا نۇر،
دوپپىسىدا ئاقىدۇ غۇرۇر.
سەنمۇ كۈلگىن، ساڭا ئايەمدۇر،
ئاپئاق ساقال ئەزىز مويسىپىت.

ئۇرۇق-تۇققان، قېرىنداشلار جەم،
دىللار دىلدىن سۇ ئىچەر بۇ دەم.
قىيداشلارغا كىرەر يېڭى تەم،
ئاداۋەتكە قويۇلۇپ چېكىت.

كوچا-كوينىڭ جامائىتى سەل،
ئەجدادلاردىن ئەنئەنىدۇر دەل.
قىرائەتلەر قەلىبلەرگە ھەل،
يادلىنىدۇ ياتقانلار-مېيىت.

سالام بەرگەن كۆكرەكلەردە زەر،
ئىلىك ئالغان يۈرەكلەر گۆھەر.
كىمنىڭ ھېيتى ئۇلۇغ بۇ قەدەر؟
تەرىپىنى كۈيلە، ناخشا ئېيىت.

ئالەم پاتماي قىنى-قىنىغا،
سۆيگۈ چاچار ھەر بىر يېىنغا.
ھېيىت گۈزەللىك ئىسلام دىنىغا،
تېچلىق ئامەت، ئىناقسىزلىق زىت.

بۈگۈن بايرام، بىزگە خاس بولسۇن،
ھېيىتلىرىمىز ئۇنتۇلماس بولسۇن.
ۋەتەن، ئەل-يۇرت گۈللەرگە تولسۇن،
ئېتىقادلىق بولسۇن قىز-يىگىت.

قەدرىگە يەت دوستلىرىم، زوقلان،
ھېيىتنى ئۇلۇغ بىلىدۇ نۇرلان.
ھېيىت بىلەن تەڭ ياشىغىن «روھلان»،
ھېيىت بېرىدۇ ھەممىمىزگە دىت.

سارسان

ياخشى  يىزىپسىز  ئاپىرىن   

Yaxa120

رەخمەت ياخشى يىزىپسىز تېخىمۇ تىرشىڭ.

تۈرگۈن

روھلاندىكىلەرنىڭ ھېيتلىقى ئوبدان بۇلىۋاتىدۇ، ھە.
ياخشى يېزىپسىز! قەلىمىڭىز بەرىكەتلىك بولغاي!

ئەلېجان

ياخشى يېزىپسىز! قەلىمىڭىز بەرىكەتلىك بولغاي

altaxna

ھەممەيلەن ياخشى يېزىپسىز دەپلا ئىنكاس يازماي بىرەر كۇبلىتتىن يېزىپ قويغان بولساق تېخىمۇ ئەۋجىگە چىقاتتى ئەسلى. باشتىكى ئىنكاسلار ئىلھامىمنى قاچۇرۋەتتى

نۇرلان

ئەلتەشنا ئەپەندىمنىڭ ئورۇنلۇق ئىنكاسىغا كۆپ رەھمەت.

ئىدرسجان

ياخشى يىزىپسىز تىخمۇ تېرشىڭ

نەۋرۇز

ئايەم مۇبارەك. ھەممەيلەننىڭ ھەر بىر كۈنى ئايەمدەك بولغاي

aydingkiqa

روھلان توردىكى بارلىق دوستلارنىڭ ئايىمىگە ،ئەتىدىكى روزا ھېيتىغا مۇبارەك بولسۇن!