مۇئەللىمنى تىللىما ! ( ئەلىشىرگە شېئىرىي چاخچاق)

نۇرلان

                        مۇئەللىمنى تىللىما !

(ئەلشىرنىڭ «مۇئەللىمنى تىللايمەن» ناملىق شېئىرىغا چاخچاق جاۋاب)

كۆز نۇرۇڭ بولمىش بالاڭ، ئوقۇيدىكەن يەسلىدە،
تىللىماققا بىر سۆزى، سەۋەب ئىكەن ئەسلىدە.
سەن بالاڭنى ئۆز تىلغا زورلىماقنىڭ قەستىدە،
مۇئەللىممۇ كۆرۈپسەن، تېخى گۆدەك پەسلىدە،
قىلما تولا خىجالەت، مۇئەللىمنى تىللىما!

مۇئەللىممۇ نائىلاج، ئەسلى شۇنداق سىياسەت،
« قوش تىل بىلەن تاپقۇلۇق، تەرەققىيات-ئىناۋەت»
بۇ شۇئارنى نەق سىلەر، توۋلىغانغۇ جامائەت؟
خەن مەكتەپتە ئوقۇغان باللىرىمىز كارامەت»
قىلدى تىلغا خىيانەت، مۇئەللىمنى تىللىما!

چىللىمىدىڭ نىمىشقا، ئانا تىلنى ئۆيۈڭگە؟
يەسلىمىزنىڭ ئەھۋالى ئايان تۇرسا كۆزۈڭگە.
گۇناھكاركەن مۇئەللىم، قۇلاق سالسام سۆزۈڭگە،
ئاھانەتنىڭ تېڭىنى، ئېلىپ قالغىن ئۆزۈڭگە،
تىللىغىنىڭ جىنايەت، مۇئەللىمنى تىللىما!

ئېيتالامسەن گېپىڭنى، « قوش تىل» دىگەن چوڭۇمغا؟
كۈچۈڭ يەتمەي ئېشەككە، تاياق سالما توقۇمغا.
ئۇچراپ تۇرار مۇئەللىم، ھەر تەرەپتىن زۇلۇمغا،
سېنىڭسىزمۇ ئۆزگىلەر، تەق تۇرىدۇ سوقۇمغا.
يۈرىكى دەرت-جاراھەت، مۇئەللىمنى تىللىما!

ئانا تىلدا دەرسنى، ئۆتمەكچىدى ئېدىتلىق،
خەنزۇ تىلدا بالاڭنى، قىلماقچىدى ساۋاتلىق.
ئىككى تىلنى تەڭ تۇتۇپ، تەربىيلىمەك ياراملىق،
مۇئەللىمنىڭ تىلىكى، شۇنداق ئىدى داۋاملىق.
ئۇمۇ سەندەك بىتاقەت، مۇئەللىمنى تىللىما!

«قوش تىل» دىگەن ئوقۇتۇش، شۇنداق ئىدى ئىشەنسەڭ،
خەنزۇتىلى بىلىم ئۇ، ھەغدادىنى چۈشەنسەڭ.
تۇتىلاتتى ئىككى تىل، ئۆچىرەتتە تەپمۇ-تەڭ،
بۇرمىلىدى«كىچىك پىت»،شۆھرەت ئۈچۈن، ئاھ، ئەتتەڭ...
باشلىق-مۇدىر كاساپەت، مۇئەللىمنى تىللىما!

«لاۋشى» دىگەن مۇئەللىم، «ئوقۇتقۇچى» دەيدۇ ھەم،
شۇنداق دىگەن سورۇندا، بولالمىدىڭ بەلكى جەم.
رەنجىمىگىن ئۇنىڭدىن، سەن ئەمەسقۇ ئەقلى كەم؟
«گامنام سىتەيىل» كەينىدىن، چىققۇسى ساما-ئەجەم.
قەلبىدە بار دىيانەت، مۇئەللىمنى تىللىما!

« يامان دىسەڭ سەن ئۇنى، كىم بېرىدۇ ياخشىنى؟»
تۈلكىلەرگە جۆر بولۇپ، باشلىمىغىن ناخشىنى.
يەسلىدىكى مۇئەللىم، ئۆزگىلەردىن ئاشقىنى،
سەپسالغىنە ئەتراپقا، سەندە ئەقىل- باش قېنى؟
بولما دوستۇم ھاماقەت، مۇئەللىمنى تىللىما!

ئاچچىقلانساڭ خەيرىيەت، تەربىيە قىل دالدىدا،
ئاقىل بولساڭ سالام ئەت، چاندۇرمىغىن ئالدىدا.
يەسلىدىكى بالاڭغا، «سۈت» بەردى ئەقىل-خالتىدا،
قېنى قىززىق غورۇرنى، كەسكۈلۈكتۇر پالتىدا.
نادانلىق دەل قىيامەت، مۇئەللىمنى تىللىما!

تىللىمىغىن ئەلىشىر، ئويلاپ ئىش قىل دىت بىلەن،
ئۇمۇ سەندەك بەندە بىر، تۈزىلىدۇ «خىت» بىلەن.
كەيدى ئوخشاش جەندە بىر، ئوخشىمايدۇ « پىت» بىلەن،
سۆزلەپ يۈرمەي زەر-زىۋىر، يولۇڭغا ماڭ «غىت» بىلەن.
بولسۇن دىگىن سالامەت، مۇئەللىمنى تىللىما!

ADiL

پەچەت چىقىپتۇ.

kirimulla

ياخشى شىئېركەنغۇ بۇ!

ئىدرسجان

ئەلشىر ئەپەندىم كۆرگىدەك بولماپتۇ دە بۇ شىئرىڭىزنى، بەك پەچەت چىقپتۇ يارايسىز باركاللا.

غىلاپ

مەن  ئىنكاس  يازمايلا  ئۆتۈپ  كېتەي .

ئالمىچى

مىنىڭ كۆپ سۆزلىگىم يوق ھۈششش
来自安卓客户端

پەشتاق

بارىكاللا، ئەلشىرجانغا شۇنداق ياخشى چۈشەنچە بىرىپسىز، مۇئەللىمنى تىللاش ئالدىدا تۇرغانلارمۇ، مۇئەللىمنى تىللىغۇدەك ئاشۇ تىلىنىڭ يىتىلىشى يەنىلا مۇئەللىم ئارقىلىق بارلىققا كەلگەنلىكىنى بىلىپ قالار، تىللاشقا تىگىشلىكلىرىمۇ بار، لىكىنزە ، ھەي ......؟؟؟؟؟؟

نۇرلان

تورداشلارنىڭ رىبەتلەندۈرگىنىگە رەھمەت.  ئەلىشىر ئەپەندىممۇ بۇ تېمىنى چاخچاق نىيىتىدە يازدى دەپ ئويلايمەن، مېنىڭ  مەقسىدىممۇ شۇ. پەقەت دەم ئېلىش كۈنلىرىدە خوشاللىق ئىچىدە ئۆتۈش. ھەممىمىزنىڭ مەقسىتى: پەرزەنىتلەرنى ئىككىلا تىلدا ياراملىق قىلىپ تەربىيلەش. باشقا مەقسەت يوق.
مەنمۇ بىر مۇئەللىم بولغاچقا، مۇئەللىمنىڭ تەرىپىنى قىلىپ قالىدىكەنمەن.
ئەلىشىر ئەپەندىمنىڭ چاخچاققا توغرا مۇئامىلە قىلىدىغانلىقىغا ئىشىنىمەن.

تۈرگۈن

بىر بىرىدىن ئىسىل شىئېرلار چىقىۋاتىدۇ، دىسە .قەلەم كۆچىڭىزگە ئاپرىن.